पुणे: पुण्यातील आयटी हब म्हणून ओळखल्या जाणाऱ्या खराडी परिसरातून ऑनलाईन आर्थिक फसवणुकीची (Cyber Crime) एक धक्कादायक घटना समोर आली आहे. घरबसल्या चांगला पगार देणाऱ्या नोकरीचे (Job Fraud) आमिष दाखवून सायबर भामट्यांनी एका ४७ वर्षीय नागरिकाला तब्बल २२ लाख ७ हजार ५०५ रुपयांचा गंडा घातला आहे. या प्रकरणी पुणे शहर पोलिसांच्या खराडी पोलीस ठाण्यात गुन्हा दाखल करण्यात आला आहे.

मिळालेल्या माहितीनुसार, खराडी परिसरातील रहिवासी असलेल्या एका ४७ वर्षीय व्यक्तीने याप्रकरणी पोलिसांत रीतसर फिर्याद दिली आहे. त्यानुसार अज्ञात मोबाईल क्रमांक धारक आणि संबंधित लिंक धारकांविरुद्ध गुन्हे दाखल करण्यात आले आहेत. जानेवारी २०२६ ते मे २०२६ या पाच महिन्यांच्या कालावधीत ऑनलाईन माध्यमातून हा संपूर्ण फसवणुकीचा प्रकार घडला.

सायबर भामट्यांनी फिर्यादी यांच्याशी मोबाईलवर संपर्क साधला होता. आपण नागपूर येथून बोलत असल्याचे भासवून आरोपींनी फिर्यादीला एका चांगल्या जॉबची ऑफर दिली. सुरुवातीला मोठा आर्थिक फायदा करून देण्याचे आमिष दाखवून आरोपींनी फिर्यादीचा पूर्ण विश्वास संपादन केला. त्यानंतर वेगवेगळ्या बँक खात्यांवर आणि लिंकच्या माध्यमातून फिर्यादीकडून टप्प्याटप्प्याने तब्बल २२,०७,५०५/- रुपये उकळले. मात्र, फसवणूक झाल्याचे लक्षात येताच फिर्यादीने पोलिसात धाव घेतली.

या प्रकरणी खराडी पोलीस ठाण्यात गुन्हा रजीस्टर क्रमांक १७०/२०२६ नुसार भारतीय न्याय संहिता (BNS) कलम ३१९ (२), ३१८ (४) आणि माहिती तंत्रज्ञान कायदा (IT Act) कलम ६६ (डी) अन्वये गुन्हा नोंद करण्यात आला आहे. या प्रकरणाचा पुढील तपास खराडी पोलीस ठाण्याचे पोलीस निरीक्षक (गुन्हे) श्री. चंद्रसेन पालकर यांच्या मार्गदर्शनाखाली पोलीस करत आहेत. सुशिक्षित नागरिकांनी अशा ऑनलाईन जॉबच्या ऑफर्सला बळी पडू नये, असे आवाहन पोलिसांनी केले आहे.

पोलादपूर: रायगड आणि सातारा जिल्ह्यांच्या सीमेवर असलेल्या अत्यंत धोकादायक अशा आंबेनळी घाटात रविवारी रात्री एक भीषण आणि काळीज हेलावून टाकणारी दुर्घटना घडली. पर्यटकांची एक स्कॉर्पिओ गाडी अनियंत्रित होऊन तब्बल ५०० ते ७०० फूट खोल दरीत कोसळल्याने ८ जणांचा जागीच मृत्यू झाला. प्राथमिक माहितीनुसार, अपघातातील सर्व मृत हे सातारा जिल्ह्यातील कोरेगाव, आसगाव आणि सातारा शहरा परिसरातील रहिवासी असल्याचे समजते.

मिळालेल्या माहितीनुसार, हे सर्व पर्यटक महाबळेश्वर किंवा कोकण परिसरात फिरण्यासाठी आले असावेत असा अंदाज आहे. रविवारी रात्रीच्या सुमारास महाबळेश्वर ते पोलादपूर दरम्यान प्रवास करत असताना, चालकाचा गाडीवरील ताबा सुटल्याने स्कॉर्पिओ थेट खोल दरीत कोसळली. घाटातील तीव्र वळणे आणि रात्रीचा अंधार यामुळे ही दुर्घटना घडल्याची शक्यता वर्तवली जात आहे.

अपघाताची माहिती मिळताच स्थानिक प्रशासन, महाबळेश्वर व पोलादपूर पोलीस, महाबळेश्वर ट्रेकर्स आणि स्थानिक बचाव पथकांनी तातडीने घटनास्थळी धाव घेतली. दरी अत्यंत खोल आणि कठीण भूप्रदेशाची असल्याने रात्रीच्या अंधारात मदतकार्य राबवताना शोध पथकाला प्रचंड अडचणींचा सामना करावा लागला. रविवारी मध्यरात्रीपर्यंत बचाव पथकाच्या हाती दोन मृतदेह लागले होते.

आज सोमवार उजाडताच दरीमध्ये शोधमोहिमेला पुन्हा वेग देण्यात आला असून उर्वरित ६ मृतदेह बाहेर काढण्याचे युद्धपातळीवर प्रयत्न सुरू आहेत. अद्याप सर्व मृतांची नावे आणि ओळख पटवण्याचे काम पोलिसांकडून सुरू आहे. दरम्यान, सातत्याने अपघातांचे केंद्र ठरत असलेल्या आंबेनळी घाटातील या ताज्या दुर्घटनेमुळे सातारा आणि रायगड जिल्ह्यांवर मोठी शोककळा पसरली आहे.

पुणे: मसाज आणि स्पा सेंटरच्या नावाखाली छुप्या पद्धतीने चालणाऱ्या देहविक्रीच्या अड्ड्यांवर पुणे पोलिसांनी पुन्हा एकदा जोरदार प्रहार केला आहे. वाघोली परिसरातील एका स्पा सेंटरमध्ये सुरू असलेल्या हायप्रोफाईल वेश्याव्यवसायाचा गुन्हे शाखेने पर्दाफाश केला. या धडक कारवाईत पोलिसांनी ५ पीडित तरुणींची नरकयातनेतून सुटका केली असून, स्पा चालवणाऱ्या मुख्य आरोपीला बेड्या ठोकल्या आहेत.

पुणे शहर पोलिसांच्या अनैतिक मानवी वाहतूक व व्यापार प्रतिबंध कक्षाला (Anti-Human Trafficking Cell) वाघोली भागात स्पाच्या नावाखाली मुलींकडून चुकीची कामे करून घेतली जात असल्याची खात्रीशीर माहिती मिळाली होती. बकोरी फाटा येथील 'रेम्बो क्रॉसेस' इमारतीच्या पहिल्या मजल्यावर असलेल्या '९ सेन्सेस स्पा' (9 Senses Spa) मध्ये हा सगळा काळा धंदा सुरू होता.

माहिती मिळताच पोलीस निरीक्षक छगन कापसे यांच्या पथकाने कायदेशीर रणनीती आखली. या स्पा सेंटरमध्ये प्रथम एक बनावट ग्राहक (Dummy Customer) पाठवून तिथे सुरू असलेल्या गैरकृत्यांची खातरजमा करण्यात आली. तिथून सिग्नल मिळताच पोलिसांनी '९ सेन्सेस स्पा'वर अचानक छापा टाकला. या अनपेक्षित कारवाईमुळे तिथे उपस्थित असलेल्यांची एकच पळापळ झाली. पोलिसांनी घटनास्थळावरून ५ पीडित महिलांची सुटका केली आणि त्यांची सुरक्षित ठिकाणी रवानगी केली आहे.

या प्रकरणी पोलिसांनी कारवाई करत स्पा चालक महावीर सुदाम ससाने (वय २९, रा. साईनाथनगर, पेरणे फाटा, ता. हवेली) याला अटक केली आहे. त्याचा आणखी एक साथीदार या गुन्ह्यात सामील असून, पोलीस त्याचा शोध घेत आहेत. या दोन्ही आरोपींविरुद्ध वाघोली पोलीस ठाण्यात भारतीय न्याय संहिता (BNS) कलम १४३ (१) (३), ३ (५) आणि अनैतिक मानवी वाहतूक प्रतिबंध कायदा १९५६ च्या कलम ३, ४, ५ नुसार गुन्हा दाखल करण्यात आला आहे.

पुणे शहराचे पोलीस आयुक्त श्री. अमितेश कुमार, सह पोलीस आयुक्त श्री. संजय दराडे आणि अपर पोलीस आयुक्त (गुन्हे) श्रीमती तेजस्वीनी सातपुते यांच्या विशेष मार्गदर्शनाखाली ही कारवाई पूर्ण करण्यात आली. गुन्हे शाखेचे पोलीस उप-आयुक्त श्री. गौहर हसन, सहाय्यक पोलीस आयुक्त श्री. विजय कुंभार यांच्या सूचनेनुसार पोलीस निरीक्षक छगन कापसे, पोलीस अंमलदार भिवरकर, आंधळे, केदार, जाधव, रसाळ, कोंडे तसेच महिला अंमलदार कंक आणि खेडेकर यांच्या पथकाने ही कामगिरी बजावली.

 दहिवडी दि .२२:
माण तालुक्यामध्ये शनिवार, दिनांक २२ मे रोजी दुपारच्या सुमारास हवामानात अचानक बदल होऊन विजांच्या कडकडाटासह वादळी वारा आणि मुसळधार पावसाने जोरदार हजेरी लावली. या निसर्गाच्या प्रकोपात पिंगळी बुद्रुक  दहिवडी येथील रहिवासी आणि व्यवसायाने इलेक्ट्रिशियन असलेले शंकर रामचंद्र वाघमोडे (वय ४५) यांच्या अंगावर वीज पडल्याने त्यांचा जागीच दुर्दैवी मृत्यू झाला. सर्वांचे तांत्रिक प्रश्न चुटकीसरशी सोडवणारा अवलिया आज निसर्गाच्या विजेचा बळी ठरल्याने संपूर्ण पिंगळी गावावर शोककळा पसरली आहे.

​शनिवारी दुपारच्या सुमारास दहिवडीसह आजूबाजूच्या परिसराला अचानक वादळी वाऱ्याने घेरले. पाहता पाहता विजांच्या प्रचंड कडकडाटासह पावसाला सुरुवात झाली. याच दरम्यान  शंकर वाघमोडे यांच्या अंगावर  वीज पडल्याने त्यांचा जागीच मृत्यू झाला.

​गावातून हळहळ: एक कष्टाळू व्यक्तिमत्त्व हरपले
​शंकर वाघमोडे हे परिसरात एक कष्टाळू, प्रामाणिक आणि अत्यंत मनमिळावू व्यक्तिमत्त्व म्हणून परिचित होते. गावातील कोणाचेही विजेचे किंवा तांत्रिक काम असले की वाघमोडे हसतमुखाने मदतीला धावून जात असत. सर्वांच्या घरातील वीज दुरुस्त करणाऱ्या या हरहुन्नरी माणसाचा अंत विजेचा धक्का लागूनच व्हावा, या क्रूर नियतीच्या खेळाने पिंगळी ग्रामस्थ सुन्न झाले आहेत. त्यांच्या निधनाचे वृत्त समजताच परिसरातून तीव्र हळहळ व्यक्त होत आहे. स्व. शंकर वाघमोडे यांच्या पश्चात पत्नी, मुले आणि मोठा आप्तपरिवार आहे. त्यांच्या पार्थिवावर शनिवारी रात्री १० वाजेनंतर पिंगळी बुद्रुक येथील स्मशानभूमीत शोकाकुल वातावरणात अंत्यविधी पार पडणार आहेत.

लोहगाव: आज शनी जयंती आणि शनी अमावास्या हा अत्यंत पवित्र दुहेरी योग एकाच दिवशी आल्यामुळे, लोहगाव येथील शनी मंदिर परिसरात भाविकांची अलोट गर्दी पाहायला मिळाली. या विशेष पर्वणीनिमित्त दर्शनासाठी आलेल्या भाविकांनी स्वतःच कमालीची स्वयंशिस्त दाखवत रस्त्यापर्यंत लांबच लांब रांगा लावल्या आणि अत्यंत शांततेत दर्शनाचा लाभ घेत हा उत्सव साजरा केला.

​सकाळपासूनच मंदिरात दर्शनासाठी येणाऱ्या नागरिकांची संख्या मोठी होती. शनी जयंती आणि अमावास्येच्या या दुर्मिळ योगाला धार्मिकदृष्ट्या विशेष महत्त्व असल्यामुळे परिसरातील नागरिक मोठ्या संख्येने दर्शनासाठी बाहेर पडले होते. मंदिरात शनी देवाच्या मूर्तीवर नेहमीप्रमाणे अभिषेक आणि धार्मिक विधी पार पडले.

​दर्शनासाठी आलेल्या भाविकांनी स्वतःहून मोठा समजूतदारपणा दाखवला. रस्त्यावरून थेट मंदिरापर्यंत प्रत्येकाने रांगेत उभे राहून शिस्तबद्ध पद्धतीने दर्शन घेतले, ज्यामुळे कुठेही गोंधळ उडाला नाही. शनी देवाच्या दर्शनाने शनी दोषांचे निवारण होते या श्रद्धेने रात्री उशिरापर्यंत भाविकांची मंदिरात दर्शनासाठी रीघ लागली होती. साधेपणा आणि भक्तीभावाच्या वातावरणात भाविकांनी हा दुहेरी उत्सव साजरा केला.

सातारा: जादा परताव्याचे आमिष दाखवून गुंतवणूकदारांची फसवणूक केल्याप्रकरणी सातारा येथील 'विश्वकर्मा सुपरमार्ट सर्व्हिसेस' आणि 'विश्वकर्मा सुपरमार्ट प्रा. लि.' या कंपन्यांच्या संचालकांविरोधात पोलिसांनी कडक पावले उचलली आहेत. या प्रकरणाचा तपास आता आर्थिक गुन्हे शाखेकडे वर्ग करण्यात आला असून, सर्व गुंतवणूकदारांना आवश्यक कागदपत्रांसह हजर राहण्याचे आवाहन करण्यात आले आहे.

काय आहे प्रकरण?

विश्वकर्मा सुपरमार्टच्या कोडोली (सातारा) आणि इतर शाखांमध्ये गुंतवणूक केल्यास वार्षिक १३.५ टक्के दराने परतावा देण्याचे आमिष दाखवण्यात आले होते. मात्र, या परताव्याच्या नावाखाली गुंतवणूकदारांची मोठी आर्थिक फसवणूक झाली. याप्रकरणी सातारा शहर पोलीस ठाण्यात कलम ४०६, ४०९, ४२०, ३४ आणि महाराष्ट्र ठेवदारांचे (वित्तीय संस्थांमधील) हितसंबंधांचे संरक्षण अधिनियम १९९९ च्या कलमांनुसार गुन्हा दाखल करण्यात आला आहे. ज्या गुंतवणूकदारांनी या कंपनीत पैसे गुंतवले आहेत, त्यांनी आपली तक्रार आणि पुरावे नोंदवण्यासाठी खालील कालावधीत आर्थिक गुन्हे शाखेच्या कार्यालयात उपस्थित राहावे असे आवाहन करण्यात आले आहे.

तारीख: ३ जानेवारी २०२६ ते ९ जानेवारी २०२६
वेळ: सकाळी १०.०० ते सायंकाळी ६.०० वाजेपर्यंत
ठिकाण: आर्थिक गुन्हे शाखा, पोलीस अधीक्षक कार्यालय, सातारा.

 सोबत आणायची आवश्यक कागदपत्रे:

गुंतवणूकदारांनी खालील कागदपत्रांच्या मूळ प्रती आणि दोन छायांकित (झेरॉक्स) प्रती सोबत आणणे अनिवार्य आहे:
१. गुंतवणुकीचा पुरावा (मूळ ठेव पावती, प्रमाणपत्र).
२. ज्या बँक खात्यातून व्यवहार झाला, त्या खात्याचे स्टेटमेंट.
३. बँक पासबुकच्या पहिल्या पानाची स्पष्ट छायांकित प्रत.
४. आधार कार्ड आणि पॅन कार्ड.
५. जर काही परतावा (व्याज/मुद्दल) मिळाला असेल, तर त्याचे पुरावे किंवा बँक स्टेटमेंट.
६. बँक खात्याचे जे वारसदार असतील, त्यांचे आधार कार्ड व पॅन कार्ड.

     ज्या गुंतवणूकदारांनी दहीवडी पोलीस ठाणे (सातारा) किंवा वडगाव निंबाळकर पोलीस ठाणे (पुणे) येथे आधीच तक्रार नोंदवून आपले जबाब दिले आहेत, त्यांना साताऱ्यातील कार्यालयात पुन्हा हजर राहण्याची आवश्यकता नाही.गुंतवणूकदारांची रक्कम परत मिळवण्याच्या कायदेशीर प्रक्रियेसाठी हे पुरावे अत्यंत महत्त्वाचे आहेत. तरी संबंधित सर्वांनी विहित वेळेत उपस्थित राहावे, असे आवाहन पोलीस अधीक्षक कार्यालय, सातारा यांच्या वतीने करण्यात आले आहे.

​ढाका/नवी दिल्ली: बांगलादेशातील अस्थिरता आणि हिंसाचाराचे सत्र थांबण्याचे नाव घेत नाहीये. गेल्या आठवड्यात झालेल्या दोन विद्यार्थी नेत्यांच्या हत्येनंतर आता या प्रकरणाला आंतरराष्ट्रीय वळण लागले आहे. या हत्येतील मुख्य आरोपी मेघालय सीमेवरून बेकायदेशीरपणे भारतात घुसल्याचा दावा ढाका महानगर पोलिसांनी (DMP) केला आहे.
​नेमकी घटना काय?
​विद्यार्थी नेते शरीफ उस्मान हादी यांच्या हत्येचा तपास करत असताना बांगलादेश पोलिसांना महत्त्वाची माहिती मिळाली. अतिरिक्त आयुक्त एस.एन. नजरुल इस्लाम यांनी पत्रकार परिषदेत सांगितले की, हत्येतील मुख्य आरोपी फैसल करीम मसूद आणि आलमगीर शेख हे स्थानिक साथीदारांच्या मदतीने हलुआघाट सीमा ओलांडून भारतात पळून गेले आहेत. सीमेपलीकडे एका व्यक्तीने त्यांचे स्वागत केले आणि टॅक्सीने ते मेघालयाच्या दिशेने रवाना झाले.
​भारतात दोन संशयित ताब्यात?
​मिळालेल्या अनधिकृत माहितीनुसार, या आरोपींना सीमा ओलांडण्यास मदत करणाऱ्या दोन व्यक्तींना भारतीय सुरक्षा यंत्रणांनी ताब्यात घेतले आहे. मात्र, भारतीय परराष्ट्र मंत्रालय किंवा सीमा सुरक्षा दलाने (BSF) अद्याप या वृत्ताला अधिकृत दुजोरा दिलेला नाही.
​अल्पसंख्याकांवरील अत्याचाराचा उद्रेक
​दुसरीकडे, बांगलादेशातील मैमनसिंग भागात एका हिंदू कामगाराची निर्घृण हत्या झाल्याने संतापाची लाट उसळली आहे. २९ वर्षीय दीपू चंद्र दास या तरुणाला इस्लामी कट्टरपंथीयांच्या जमावाने झाडाला बांधून जिवंत जाळल्याची धक्कादायक घटना घडली. १८ डिसेंबर रोजी झालेल्या या लिंचिंग प्रकरणात आतापर्यंत १२ जणांना अटक करण्यात आली आहे.
​
​ 

​सोलापूर: राज्यातील आगामी महानगरपालिका निवडणुकांचे पडघम वाजू लागले असतानाच सोलापूरच्या राजकारणातून एक मोठी बातमी समोर येत आहे. जागावाटपाच्या मुद्द्यावरून भाजप आणि शिवसेना (शिंदे गट) यांच्यातील चर्चा फिसकटली असून, आता सोलापुरात 'शिवसेना-राष्ट्रवादी (अजित पवार गट)' अशी नवी युती आकारास आली आहे. भाजपने सन्मानजनक जागा न दिल्याने हा टोकाचा निर्णय घेतल्याचे शिंदे गटाचे नेते सिद्धाराम म्हेत्रे यांनी स्पष्ट केले आहे.
​५१-५१ चा नवा फॉर्म्युला
​सोलापूर महानगरपालिकेच्या एकूण १०२ जागांसाठी आता शिवसेना आणि राष्ट्रवादी काँग्रेस ५०-५० टक्क्यांच्या फॉर्म्युल्यानुसार निवडणूक लढवणार आहेत. या दोन्ही पक्षांत प्रत्येकी ५१ जागांवर एकमत झाले असून, सोलापूरचा महापौर देखील या युतीचाच असेल, असा विश्वास दोन्ही पक्षांच्या नेत्यांनी व्यक्त केला आहे.
​भाजपसोबत का फिस्कटले समीकरण?
​जागावाटपाच्या चर्चेबाबत माहिती देताना माजी मंत्री सिद्धाराम म्हेत्रे म्हणाले की, "आम्ही सुरुवातीला भाजपकडे ४२ जागांची मागणी केली होती, परंतु भाजपने केवळ ८ जागा देण्याची तयारी दर्शवली. त्यानंतर आम्ही ३० जागांचा मध्यममार्ग काढला, तरीही त्यांच्याकडून कोणताही सकारात्मक प्रतिसाद मिळाला नाही. अखेर स्वाभिमानासाठी आम्ही राष्ट्रवादीसोबत जाण्याचा निर्णय घेतला."
​विकासासाठी एकत्रित पाऊल
​राष्ट्रवादीचे संपर्क मंत्री दत्तात्रय भरणे आणि सिद्धाराम म्हेत्रे यांच्यात काल रात्री झालेल्या बैठकीनंतर या युतीवर शिक्कामोर्तब करण्यात आले. राज्याच्या सत्तेत आम्ही सोबत आहोतच, शिवाय नगरविकास आणि अर्थ खाते आमच्याच नेत्यांकडे असल्याने सोलापूरच्या विकासाला या युतीमुळे मोठी गती मिळेल, असेही यावेळी सांगण्यात आले.
​महत्त्वाचे मुद्दे:
​भाजपसोबतची युती तुटली; शिंदे गट आणि अजित पवार गट एकत्र.
​दोन्ही पक्ष प्रत्येकी ५१ जागांवर निवडणूक लढवणार.
​पुणे, पिंपरी-चिंचवडनंतर सोलापुरातही महायुतीचे गणित बिघडले.
​सन्मानजनक जागा न मिळाल्याने शिंदेंच्या शिवसेनेचा भाजपला जय महाराष्ट्र.

   यमुना एक्सप्रेसवेवर शनिवारी रात्री उशिरा एका चालकाच्या निष्काळजीपणामुळे भीषण साखळी अपघात झाला. ओव्हरटेकिंग लेनमध्ये चालकाने अचानक ब्रेक लावल्याने एकामागोमाग एक तीन गाड्या एकमेकांवर आदळल्या. या धडकेनंतर तिन्ही गाड्यांनी भीषण पेट घेतला, मात्र सुरक्षा रक्षकांच्या तत्परतेमुळे ११ प्रवाशांना गाड्यांमधून सुखरूप बाहेर काढण्यात यश आले.
​नेमकी घटना काय?
​मिळालेल्या माहितीनुसार, आग्रा-ग्रेटर नोएडा मार्गावर रबुपुरा पोलीस ठाण्याच्या हद्दीत २० व्या किलोमीटरच्या मैलाच्या दगडाजवळ हा अपघात झाला. वेगात असलेल्या एका कारने अचानक ब्रेक दाबला. यामुळे मागून येणाऱ्या दोन कारची समोरील कारशी जोरदार धडक झाली. धडक इतकी भीषण होती की काही वेळातच तिन्ही गाड्यांनी पेट घेतला.
​देवदूत बनून धावले सुरक्षा रक्षक
​घटनेची माहिती मिळताच जेपी इन्फ्राटेकची 'क्विक रिस्पॉन्स टीम' (QRT) रुग्णवाहिका, क्रेन आणि अग्निशमन दलासह घटनास्थळी दाखल झाली. गाड्या आगीच्या विळख्यात असतानाच या पथकाने शौर्य दाखवत खिडक्यांमधून सर्व ११ प्रवाशांना बाहेर काढले. अग्निशमन दलाच्या पाच गाड्यांनी अथक प्रयत्नांनंतर आग विझवली, मात्र तोपर्यंत एक कार पूर्णपणे जळून खाक झाली होती.
​दोन प्रवासी गंभीर जखमी
​या अपघातात दोन जण गंभीर जखमी झाले असून त्यांना तातडीने ग्रेटर नोएडा येथील कैलास रुग्णालयात दाखल करण्यात आले आहे. उर्वरित प्रवाशांना किरकोळ दुखापत झाली असून त्यांना प्राथमिक उपचारानंतर घरी सोडण्यात आले आहे. पोलिसांनी या प्रकरणी तपास सुरू केला असून एक्सप्रेसवेवरील वाहतूक पूर्ववत करण्यात आली आहे.

दहिवडी: म्हसवड नगरपालिकेची निवडणूक म्हटली की डोळ्यांसमोर उभे राहायचे ते कार्यकर्त्यांमधील वाद, तुंबळ हाणामारी आणि त्यानंतर दाखल होणारे पोलिसांमधील गुन्हे. मात्र, यावेळच्या निवडणुकीने एक नवा इतिहास रचला आहे. सहाय्यक पोलीस निरीक्षक (API) अक्षय सोनवणे यांच्या शिस्तबद्ध नियोजनामुळे आणि कडक अंमलबजावणीमुळे म्हसवडची निवडणूक अत्यंत शांततेत आणि निर्भय वातावरणात पार पडली आहे.
​राजकीय संघर्षाला खाकीचा लगाम
​म्हसवड नगर परिषदेत नामदार जयकुमार गोरे आणि विरोधी गटाच्या कार्यकर्त्यांमध्ये नेहमीच टोकाचा राजकीय संघर्ष पाहायला मिळतो. या संघर्षाचे रूपांतर अनेकदा वादात होते. मात्र, अक्षय सोनवणे यांनी आपल्या कार्यकाळात कोणत्याही राजकीय दबावाला बळी न पडता काम केले. त्यांनी कोणत्याही पक्षाचा कार्यकर्ता असो, कायद्याचे उल्लंघन करणाऱ्यांना सज्जड दम दिला. स्थानिक राजकारणात कोणाच्याही सांगण्यावरून हस्तक्षेप न करता, त्यांनी 'खाकी'ची ताकद आणि निष्पक्षता दाखवून दिली.
​३२ गुन्हेगारांवर तडीपारीची कारवाई
​निवडणूक काळात शांतता भंग होऊ नये यासाठी सोनवणे यांनी अत्यंत धाडसी निर्णय घेतले. रेकॉर्डवरील तब्बल ३२ भुरट्या गुन्हेगारांना निवडणूक काळात तडीपार करून त्यांनी गुन्हेगारी जगताचे कंबरडे मोडले. या आक्रमक पवित्र्यामुळेच निवडणुकीत कुठेही अनुचित प्रकार घडला नाही.
​सातारा जिल्ह्यातील 'सर्वोत्कृष्ट पोलीस अधिकारी'
​अक्षय सोनवणे यांच्या कामाची दखल केवळ म्हसवडमध्येच नव्हे, तर संपूर्ण जिल्ह्यात घेतली जात आहे. सातारा जिल्ह्यातील ३२ पोलीस ठाण्यांमधील अधिकाऱ्यांच्या कामगिरीचा विचार करता, सोनवणे यांनी आपल्या कार्यकुशलतेने 'सर्वोत्कृष्ट पोलीस अधिकारी' असा मान मिळवला आहे. सर्वांना समान वागणूक आणि कायद्याचे राज्य ही त्यांची कार्यपद्धती सध्या सातारा जिल्ह्यामध्ये चर्चेचा विषय ठरली आहे.
      ​"आजपर्यंतच्या इतिहासात म्हसवडची निवडणूक इतकी शांत कधीच झाली नव्हती. हे केवळ अक्षय सोनवणे यांच्या निस्पृह आणि कणखर धोरणामुळे शक्य झाले आहे," अशी भावना आता स्थानिक नागरिकांमधून व्यक्त होत आहे.

निपक्षपाती पोलीस अधिकारी
         सपोनि. अक्षय सोनवणे यांनी त्यांच्या कार्यकाळामध्ये केले नाही. कोणत्याही पक्षाचा कार्यकर्ता असो कायद्यापुढे कोणालाही त्यांनी क्षमा केलेली नाही. अनेकदा त्यांच्यावरती राजकीय दबाव आणण्याचाही प्रयत्न झाला होता मात्र त्या दबावाला कधीही बळी पडले नाहीत. स्थानिक राजकारण्यांच्या दबावाला बळी पडून कधीही कोणाला नाहक त्रास दिला नाही. त्यामुळे सपोनि. अक्षय सोनवणे हे आदर्श पोलीस अधिकारी म्हणून जिल्ह्यामध्ये त्यांची ख्याती आहे.

नांदेड: नांदेड येथील विमानतळ पोलीस ठाण्यातील एका पोलीस उपनिरीक्षकास (PSI) एक लाख रुपयांची लाच स्वीकारताना लाचलुचपत प्रतिबंधक विभागाने (ACB) रंगेहात पकडले आहे. या कारवाईमुळे पोलीस दलात मोठी खळबळ उडाली असून, या प्रकरणात एका पोलीस कॉन्स्टेबलवरही गुन्हा दाखल करण्यात आला आहे.

नेमके प्रकरण काय?
मिळालेल्या माहितीनुसार, या प्रकरणातील २५ वर्षीय महिला तक्रारदार यांच्या वडिलांविरुद्ध विमानतळ पोलीस ठाण्यात एक अदखलपात्र (NC) गुन्हा दाखल होता. या गुन्ह्यामध्ये अटकेची कारवाई टाळण्यासाठी आणि तक्रारदाराच्या वडिलांना मदत करण्यासाठी पोलीस उपनिरीक्षक गोविंद बालाजीराव जाधव (वय ५७) यांनी एक लाख रुपयांच्या लाचेची मागणी केली होती.

एसीबीचा सापळा आणि अटक
तक्रारदाराने या मागणीबाबत लाचलुचपत प्रतिबंधक विभागाकडे तक्रार केली होती. विभागामार्फत करण्यात आलेल्या पडताळणी दरम्यान, पोलीस उपनिरीक्षक जाधव यांनी लाच मागितल्याचे निष्पन्न झाले. तसेच पोलीस कॉन्स्टेबल वैजनाथ संभाजी तांबोळी (वय ४३) यांनी या लाच मागणीसाठी प्रोत्साहन (अपप्रेरणा) दिल्याचे समोर आले.२३ डिसेंबर २०२५ रोजी रात्री १०:३० ते २०:१२ च्या दरम्यान, नांदेड येथील नमस्कार चौक, ब्रम्हसिंग नगर भागात सापळा रचण्यात आला. 'किंग कोब्रा बिअर बार'च्या पाठीमागे असलेल्या तक्रारदाराच्या वडिलांच्या घरी, १ लाख रुपयांची लाच स्वीकारताना पीएसआय गोविंद जाधव यांना पंचांसमक्ष रंगेहात पकडण्यात आले. गोविंद बालाजीराव जाधव (पोलीस उपनिरीक्षक, विमानतळ पोलीस स्टेशन) याला अटक करण्यात आले असून वैजनाथ संभाजी तांबोळी (पोलीस कॉन्स्टेबल) सहभाग असल्याचे निष्पन्न झाले आहे. याप्रकरणी विमानतळ पोलीस ठाण्यात भ्रष्टाचार प्रतिबंधक कायद्याच्या कलम ७ आणि १२ अन्वये गुन्हा दाखल करण्यात आला आहे.

     ही कारवाई लाचलुचपत प्रतिबंधक विभाग, नांदेड परिक्षेत्राचे पोलीस अधीक्षक संदीप पालवे, अपर पोलीस अधीक्षक अशोक कदम आणि पोलीस उपअधीक्षक प्रशांत पवार यांच्या मार्गदर्शनाखाली पोलीस निरीक्षक करीमखान पठाण व त्यांच्या पथकाने केली.कोणत्याही शासकीय कामासाठी सरकारी अधिकारी किंवा कर्मचारी लाचेची मागणी करत असल्यास, तात्काळ लाचलुचपत प्रतिबंधक विभागाच्या टोल-फ्री क्रमांक १०६४ वर किंवा कार्यालयीन क्रमांकावर संपर्क साधावा, असे आवाहन प्रशासनाकडून करण्यात आले आहे.