मुंबई: अण्णा भाऊ साठे संशोधन व प्रशिक्षण संस्था (आर्टी), मुंबईच्या वतीने अनुसूचित जाती प्रवर्गातील मातंग आणि त्यातील तत्सम उपजातींच्या पात्र संशोधक विद्यार्थ्यांसाठी अत्यंत महत्त्वाची बातमी समोर आली आहे. २०२३, २०२४ आणि २०२५ या कालावधीत पीएच.डी. (Ph.D.) करणाऱ्या विद्यार्थ्यांना 'अण्णा भाऊ साठे राष्ट्रीय संशोधन अधि छात्रवृत्ती' (ASNRF) देण्यासाठी ऑनलाईन पद्धतीने अर्ज मागविण्यात येत आहेत. आर्टीचे व्यवस्थापकीय संचालक सुनील वारे यांनी पात्र  विद्यार्थ्यांनी लवकरात लवकर अर्ज करण्याचे आवाहन केले आहे.

आर्टी संस्थेमार्फत राबविण्यात येणाऱ्या या विशेष योजनेचा लाभ मातंग, मांग, मिनीमादीग, दखनी-मांग, मांग-म्हशी, मदारी, गारुडी, राधेमांग, मांग-गारोडी, मादगी आणि मादिगा या जातींमधील संशोधक विद्यार्थ्यांना घेता येणार आहे. या विद्यार्थ्यांसाठी कनिष्ठ संशोधन अधिछात्रवृत्तीसाठी (JRF) दरमहा ३७ हजार रुपये, तर वरिष्ठ संशोधन अधि छात्रवृत्तीसाठी (SRF) दरमहा ४२ हजार रुपये इतकी आर्थिक मदत दिली जाणार आहे.

अर्ज करण्याची प्रक्रिया आणि कालावधी:

आर्टी, मुंबई संस्थेमार्फत १ जानेवारी २०२३ ते ३१ डिसेंबर २०२५ या कालावधीत पीएच.डी. करिता कायम नोंदणी असणाऱ्या अनुसूचित जातीतील विद्यार्थ्यांकडून हे अर्ज मागविण्यात आले आहेत. यासाठी पात्र आणि इच्छुक विद्यार्थ्यांनी ४ ऑगस्ट २०२६ ते ३ सप्टेबर २०२६ या निर्धारित कालावधीत आपले ऑनलाईन अर्ज सादर करणे आवश्यक आहे.

या योजनेचा सविस्तर तपशील, कालावधी, निवड पात्रता निकष, मार्गदर्शक सूचना आणि वेळापत्रक यांसारख्या संपूर्ण माहितीसाठी विद्यार्थ्यांनी आर्टी संस्थेच्या अधिकृत https://www.arti.org.in या संकेतस्थळाला भेट द्यावी. तसेच पात्र संशोधक विद्यार्थ्यांनी https://fellowship.trti-maha.in या लिंकवरून आपले ऑनलाईन अर्ज दाखल करावेत, असे आवाहन प्रशासनाकडून करण्यात आले आहे.