सातारा : सातारा शहरातील शाहुपूरी पोलीस ठाण्याच्या हद्दीत घडलेल्या दुचाकी चोरीच्या गुन्ह्याचा पोलिसांनी छडा लावला आहे. गुन्हे प्रकटीकरण शाखेच्या पथकाने एका संशयित आरोपीला अटक करून त्याच्याकडून १ लाख ३५ हजार रुपये किमतीच्या दोन चोरीच्या मोटार सायकल जप्त केल्या आहेत. या कारवाईमुळे वाहन चोरीच्या घटनांना आळा घालण्यासाठी पोलिसांच्या तपासाला महत्त्वाचे यश मिळाले आहे.

      शाहुपूरी पोलीस ठाण्यात १८ ऑगस्ट २०२६ रोजी दुचाकी चोरीची तक्रार दाखल झाली होती. शहरातील वाढत्या वाहन चोरीच्या पार्श्वभूमीवर पोलीस अधीक्षक निखिल पिंगळे, अपर पोलीस अधीक्षक वैशाली कडुकर आणि उपविभागीय पोलीस अधिकारी विपुल पाटील यांनी गुन्ह्याचा तातडीने तपास करण्याच्या सूचना दिल्या. त्यानुसार पोलीस निरीक्षक संग्राम शेवाळे यांनी गुन्हे प्रकटीकरण शाखेचे विशेष पथक तयार केले.

   तपासा दरम्यान पोलिसांनी चोरीच्या घटनेच्या ठिकाणासह परिसरातील सीसीटीव्ही फुटेजची तपासणी केली. त्याचवेळी मिळालेल्या गोपनीय माहिती नुसार चोरीतील संशयित आरोपी सातारा शहरातील राजवाडा परिसरात फिरत असल्याची माहिती पोलिसांना मिळाली. या माहितीच्या आधारे पोलिसांनी विठोबाचा नळ परिसरात सापळा रचून संशयिताला ताब्यात घेतले. ताब्यात घेतलेल्या संशयिताची चौकशी केल्यानंतर त्याने दुचाकी चोरी केल्याची माहिती पोलिसांना दिल्याचे सांगण्यात आले. त्यानंतर पोलिसांनी त्याच्याकडून चोरीच्या दोन मोटार सायकल हस्तगत केल्या.

       या प्रकरणी सुरज अनिल भोसले (वय ३२, रा. मोरे कॉलनी, मंगळवार पेठ, सातारा) याला अटक करण्यात आली आहे. त्याच्याकडून जप्त करण्यात आलेल्या दोन दुचाकींची एकूण किंमत १ लाख ३५ हजार रुपये असल्याचे पोलिसांनी सांगितले. या प्रकरणाचा पुढील तपास पोलीस हवालदार संदीप मदने करीत आहेत. ही कारवाई पोलीस अधीक्षक निखिल पिंगळे, अपर पोलीस अधीक्षक वैशाली कडुकर, उपविभागीय पोलीस अधिकारी विपुल पाटील आणि पोलीस निरीक्षक संग्राम शेवाळे यांच्या मार्गदर्शनाखाली करण्यात आली. गुन्हे प्रकटीकरण शाखेच्या पथकातील सुरेश घोडके, मनोज मदने, निलेश काटकर, ज्योतीराम पवार, महेश बनकर, अभय साबळे, सचिन पवार, स्वप्निल सावंत, सुमित मोरे, संग्राम फडतरे, विशाल धुमाळ आणि रोहित बाजारे यांनी या कारवाईत सहभाग घेतला.

       शहरातील वाहन चोरीच्या घटनांचा तपास वेगाने करून चोरीच्या वाहनांची जप्ती आणि आरोपींवर कारवाई करण्यासाठी पोलिसांकडून विशेष लक्ष दिले जात आहे. या कारवाईमुळे वाहन चोरी करणाऱ्या गुन्हेगारांवर पोलिसांचा वचक निर्माण होण्यास मदत होणार आहे.

सातारा : सार्वजनिक शांतता, कायदा व सुव्यवस्था अबाधित राखण्यासाठी सातारा पोलिसांनी नियमांचे उल्लंघन करणाऱ्या डीजे चालक आणि साऊंड सिस्टीम मालका विरोधात मोठी कारवाई केली आहे. सातारा शहर आणि शाहूपुरी पोलीस ठाण्यांच्या हद्दीत एकूण ७ गुन्हे दाखल करण्यात आले असून, संबंधित आरोपींविरुद्ध भारतीय न्याय संहितेच्या विविध कलमांनुसार गुन्ह्यांची नोंद करण्यात आली आहे. तसेच ध्वनी प्रदूषण (नियमन व नियंत्रण) नियमांनुसारही पुढील कायदेशीर कारवाईचा प्रस्ताव तयार करण्यात येत आहे.

ही कारवाई पोलीस अधीक्षक निखिल पिंगळे आणि अपर पोलीस अधीक्षक डॉ. वैशाली कडुकर यांच्या मार्गदर्शनाखाली करण्यात आली. सक्षम प्राधिकाऱ्यांनी जारी केलेल्या आदेशांचे उल्लंघन करून डीजे व साऊंड सिस्टीमचा वापर केल्याप्रकरणी संबंधित चालक व मालकांवर कारवाई करण्यात आली.

पुढे शाहूपुरी पोलीस ठाण्यात चार, तर सातारा शहर पोलीस ठाण्यात तीन गुन्हे दाखल करण्यात आल्याची माहिती पोलिसांनी दिली आहे.

शाहूपुरी पोलीस ठाण्यात दाखल गुन्हे :

• गुन्हा क्र. २२१/२६ – आरोपी रोहित बाचल व रोहन गोरे (साऊंड मालक) यांच्याविरुद्ध भारतीय न्याय संहिता कलम २२३ अन्वये गुन्हा दाखल करण्यात आला.
• गुन्हा क्र. २२२/२६ – आरोपी आरिफ मुलाणी (साऊंड मालक) याच्याविरुद्ध भारतीय न्याय संहिता कलम २२३ अन्वये गुन्हा दाखल करण्यात आला.
• गुन्हा क्र. २२३/२६ – आरोपी सूरज दिनकर पवार (साऊंड मालक) याच्याविरुद्ध भारतीय न्याय संहिता कलम २२३ अन्वये गुन्हा दाखल करण्यात आला.
• गुन्हा क्र. २२४/२६ – आरोपी अभिषेक रवींद्र चव्हाण (साऊंड मालक) याच्याविरुद्ध भारतीय न्याय संहिता कलम २२३ अन्वये गुन्हा दाखल करण्यात आला.

सातारा शहर पोलीस ठाण्यात दाखल गुन्हे :

• गुन्हा क्र. ६१३/२६ – आरोपी विवेक सुनील भोसले (साऊंड मालक) याच्याविरुद्ध भारतीय न्याय संहिता कलमे २२३ व २८५ अन्वये गुन्हा दाखल करण्यात आला.
• गुन्हा क्र. ६१३/२६ – आरोपी प्रतीक सुनील माने (साऊंड मालक) याच्याविरुद्ध भारतीय न्याय संहिता कलमे २२३ व २८५ अन्वये गुन्हा दाखल करण्यात आला.
• गुन्हा क्र. ६१३/२६ – आरोपी सूरज सुधीर सपकाळ (साऊंड मालक) याच्याविरुद्ध भारतीय न्याय संहिता कलमे २२३ व २८५ अन्वये गुन्हा दाखल करण्यात आला

सातारा पोलिसांनी नागरिकांना ध्वनी प्रदूषणा संदर्भातील नियमांचे काटेकोर पालन करण्याचे आवाहन केले आहे. सार्वजनिक शांतता भंग होईल असे कृत्य टाळावे, तसेच प्रशासनाच्या आदेशांचे उल्लंघन करणाऱ्यांविरुद्ध यापुढेही कठोर कायदेशीर कारवाई सुरूच राहणार असल्याचा इशारा पोलिसांनी दिला आहे.