मुंबई: २०२३ च्या नव्या लोकायुक्त कायद्यानुसार पुनर्रचित आणि विस्तारित करण्यात आलेल्या महाराष्ट्र लोकायुक्त संस्थेच्या कामकाजाला आता अधिकृत गती मिळणार असून, संस्थेवरील दोन न्यायिक सदस्यांचा आणि दोन बिगर-न्यायिक सदस्यांचा अत्यंत दिमाखदार शपथ विधी सोहळा मुंबईतील लोकभवन येथे पार पडला. राज्याचे राज्यपाल जिष्णु देव वर्मा यांनी सर्व नवीन सदस्यांना पदाची व गोपनीयतेची शपथ दिली. या महत्त्वाच्या नियुक्त्यांमुळे राज्यातील शासकीय पारदर्शकता आणि भ्रष्टाचार विरोधी यंत्रणा अधिक मजबूत होणार आहे.

         या शपथविधी सोहळ्यात सर्वप्रथम मुंबई उच्च न्यायालयाचे सेवानिवृत्त न्यायमूर्ती सुरेंद्र पंढरीनाथ तावडे यांना महाराष्ट्र लोकायुक्त संस्थेच्या पहिल्या न्यायिक सदस्य पदाची शपथ देण्यात आली. त्यानंतर, निवृत्त मुख्य जिल्हा न्यायाधीश सुवर्णा किशोर केवले यांनी संस्थेच्या दुसऱ्या न्यायिक सदस्य पदाची शपथ घेतली. याचबरोबर प्रशासकीय व सुरक्षा यंत्रणेचा दांडगा अनुभव असलेले सेवानिवृत्त अतिरिक्त मुख्य सचिव ओम प्रकाश गुप्ता आणि राज्याच्या माजी पोलीस महासंचालक रश्मी शुक्ला यांनी लोकायुक्त संस्थेचे बिगर-न्यायिक सदस्य म्हणून शपथ ग्रहण केली. शासनाच्या नियमा नुसार या सर्व सदस्यांची नियुक्ती पाच वर्षांच्या कार्यकाळासाठी किंवा ते वयाची ७० वर्षे पूर्ण करतील, यापैकी जी मुदत आधी येईल त्यापर्यंत असणार आहे.

        लोकभवन येथे पार पडलेल्या या उच्चस्तरीय सोहळ्याला उपमुख्यमंत्री एकनाथ शिंदे, लोकायुक्त न्यायमूर्ती विद्यासागर कानडे, मुख्य सचिव राजेश अग्रवाल यांच्यासह अनेक वरिष्ठ शासकीय अधिकारी व प्रमुख मान्यवर मोठ्या संख्येने उपस्थित होते. कार्यक्रमाची सुरुवात राष्ट्रगीत, राज्यगीत आणि ‘वंदे मातरम्’च्या गजरात झाली. राज्यपालांचे सचिव डॉ. प्रशांत नारनवरे यांनी सुरुवातीला सर्व सदस्यांच्या महाराष्ट्र लोकायुक्त संस्थेवरील नियुक्तीची अधिकृत शासनाची अधिसूचना वाचून दाखवली. शपथविधी सोहळा संपन्न झाल्यानंतर राज्यपालांच्या सूचनेनुसार सचिव डॉ. प्रशांत नारनवरे यांनी सर्व नियुक्त सदस्यांना त्यांच्या नियुक्तीची अधिसूचना सुपूर्द केली. राष्ट्रगीताने या सोहळ्याची सांगता करण्यात आली असून, या नव्या नियुक्त्यांमुळे महाराष्ट्रातील लोकशाही व प्रशासकीय उत्तरदायित्व अधिक दृढ होईल, असा विश्वास व्यक्त केला जात आहे.

मुंबई: भारतीय राजकारणातील एक अष्टपैलू, प्रतिभावंत व्यक्तिमत्त्व, अमोघ वक्ता आणि देशाच्या माजी परराष्ट्र मंत्री दिवंगत सुषमा स्वराज यांच्या जीवन कार्यावर आधारित ‘अग्निशिखा सुषमा स्वराज’ या हिंदी अनुवादित पुस्तकाची पहिली प्रत नुकतीच महाराष्ट्राचे राज्यपाल जिष्णु देव वर्मा यांना सस्नेह भेट देण्यात आली. डॉ. मेधा सोमय्या यांनी मूळ मराठी भाषेत लिहिलेल्या या पुस्तकाचा हिंदी अनुवाद प्रसिद्ध लेखक अमरजीत मिश्र यांनी केला आहे. राज्यपाल भवन येथे पार पडलेल्या या विशेष कार्यक्रमात राज्यपाल वर्मा यांनी सुषमा स्वराज यांच्या गौरवशाली राजकीय प्रवासाला आणि आठवणींना उजाळा दिला.

        सुषमा स्वराज यांच्या कार्याचा गौरव करताना राज्यपाल जिष्णु देव वर्मा म्हणाले की, त्या केवळ एक प्रतिभावंत राजकारणीच नव्हत्या, तर आपल्या प्रदीर्घ राजकीय वाटचालीत त्यांनी ज्या-ज्या पदांची धुरा सांभाळली, त्या प्रत्येक पदावर आपल्या कर्तृत्वाचा एक वेगळा व अनोखा ठसा उमटविला होता. त्या एक अमोघ वक्ता, उत्कृष्ट संसदपटू, लढवय्या विरोधी पक्षनेत्या आणि अत्यंत कार्यक्षम मंत्री म्हणून संपूर्ण देशास परिचित होत्या. आजच्या आधुनिक समाजात तरुण पिढीला त्यांच्यासारख्या समकालीन आदर्श व्यक्तिमत्त्वाची (रोल मॉडेलची) नितांत आवश्यकता असल्याचे त्यांनी सांगितले.

     यावेळी सुषमा स्वराज यांच्या संस्कृत भाषेवरील प्रभुत्वाचा विशेष उल्लेख करताना राज्यपाल म्हणाले की, स्वराज यांनी संस्कृत भाषेत दिलेले एक भाषण इतके अस्खलित आणि विद्वत्ताप्रचुर होते की, देशातील प्रत्येक संस्कृत विद्यार्थ्याने ते ऐकलेच पाहिजे. विद्यापीठांनी विद्यार्थ्यांच्या अभ्यासक्रमा साठी किंवा मार्गदर्शनासाठी सुषमा स्वराज यांचे ते भाषण उपलब्ध करून द्यावे, अशी शिफारस आपण करणार असल्याचे त्यांनी स्पष्ट केले.

     उत्तर पूर्वेकडील राज्यांच्या आठवणींना उजाळा देताना राज्यपाल म्हणाले की, त्याकाळी उत्तर पूर्वेकडील राज्यांमध्ये पक्षसंघटन काहीसे कमजोर असतानाही, सुषमाजी कार्यकर्त्यांच्या आग्रही निमंत्रणावरून आवर्जून त्या राज्यांचा दौरा करायच्या. विशेष म्हणजे, कोणत्याही जाहीर सभेत किंवा भाषणाला जाण्यापूर्वी त्या तिथल्या स्थानिक भाषेतील काही मूळ शब्द आणि वाक्ये आवर्जून समजून घ्यायच्या आणि आपल्या भाषणात त्यांचा वापर करायच्या. त्यांच्या या संवेदनशील आणि आदरयुक्त स्वभावामुळे त्या उत्तर पूर्वेकडील राज्यांमध्ये अत्यंत लोकप्रिय नेत्या बनल्या होत्या. कार्यक्रमा दरम्यान पुस्तकाच्या लेखिका डॉ. मेधा सोमैया आणि अनुवादक अमरजीत मिश्र यांनी आपले मनोगत व्यक्त करत पुस्तकामागची भूमिका स्पष्ट केली.

   या महत्त्वपूर्ण पुस्तक भेट सोहळ्या प्रसंगी माजी केंद्रीय मंत्री डॉ. किरीट सोमय्या, नगरसेवक डॉ. नील सोमय्या, मुंबईचे माजी उपमहापौर अरुण देव यांच्यासह विविध क्षेत्रांतील अनेक मान्यवर मोठ्या संख्येने उपस्थित होते.

मुंबई: अंध महिलांच्या टी-२० विश्वचषकावर आपले नाव कोरत देशाचा मान उंचावणाऱ्या भारतीय अंध महिला राष्ट्रीय क्रिकेट संघाच्या विश्वविजेत्या सदस्यांचा राज्यपाल जिष्णु देव वर्मा यांच्या हस्ते मुंबईतील राजभवनात एका विशेष कार्यक्रमात सत्कार करण्यात आला. भारतीय अंध महिला क्रिकेट संघाच्या आणि खेळाडूंच्या संघर्षमय व प्रेरणादायी प्रवासावर आधारित ‘देख ले ! इंडिया’ या माहितीपटाच्या विशेष प्रदर्शना निमित्त या सत्कार समारंभाचे आयोजन करण्यात आले होते.

या दिमाखदार सोहळ्याला राज्याचे राज्यपाल जिष्णु देव वर्मा यांच्यासह उपमुख्यमंत्री सुनेत्रा अजित पवार, विधान परिषदेचे सभापती प्रा. राम शिंदे, राजशिष्टाचार मंत्री जयकुमार रावल, महिला व बालविकास मंत्री आदिती तटकरे, मुंबईच्या महापौर रितु तावडे, एसएनडीटी महिला विद्यापीठाच्या कुलगुरु डॉ. उज्ज्वला चक्रदेव, क्रिकेट असोसिएशन फॉर ब्लाइंड इन इंडियाचे अध्यक्ष डॉ. महांतेश जी. के., संघाच्या प्रशिक्षिका शिखा शेट्टी यांच्यासह विविध दिव्यांग शाळा व संस्थांचे प्रतिनिधी मोठ्या संख्येने उपस्थित होते.

या प्रसंगी बोलताना राज्यपाल जिष्णु देव वर्मा म्हणाले की, काही दिवसांपूर्वी आपण या माहितीपटाचा ट्रेलर पाहिला होता. हा माहितीपट केवळ एखाद्या क्रिकेट संघाच्या विजयाची गाथा नसून, दिव्यांग महिला खेळाडूंमोरील सामाजिक व आर्थिक आव्हाने, त्यांच्या कुटुंबाच्या जबाबदारीची भावना, समानतेसाठी त्यांनी दिलेला लढा आणि अहोरात्र परिश्रमातून मिळवलेल्या विजयाचे अत्यंत सजीव चित्रण आहे. अंध महिला क्रिकेटपटूंनी केवळ विश्वचषकच जिंकला नाही, तर देशातील करोडो भारतीयांचे मन जिंकले आहे.

हा ‘देख ले ! इंडिया’ माहितीपट अधिकाधिक शाळा, महाविद्यालये आणि विद्यापीठांमध्ये दाखविण्यात यावा, जेणेकरून विद्यार्थ्यांमध्ये प्रेरणा निर्माण होईल, असे सांगत राज्यपालांनी विद्यापीठांनी दिव्यांग खेळाडूंना सरावासाठी आपल्या क्रीडा सुविधा उपलब्ध करून द्याव्यात अशी सूचना केली. तसेच, शासकीय संस्था, सार्वजनिक उपक्रम (PSU), कॉर्पोरेट आणि खासगी क्षेत्रांनी देखील या दिव्यांग खेळाडूंना रोजगाराच्या संधी उपलब्ध करून द्याव्यात, असे आवाहन त्यांनी यावेळी केले.

कोलंबो येथे झालेल्या अंतिम सामन्यात नेपाळचा पराभव करून विश्वचषक जिंकल्याबद्दल उपमुख्यमंत्री सुनेत्रा अजित पवार यांनी भारतीय संघाच्या सर्व खेळाडूंचे मनःपूर्वक कौतुक केले. हा ऐतिहासिक विजय म्हणजे आत्मविश्वासाचे प्रतीक असल्याचे त्यांनी सांगितले. “दिव्यांग खेळाडूंना सहानुभूतीची गरज नसून त्यांना संधीची गरज असते, आणि या अंध महिला क्रिकेटपटूंना जेव्हा संधी मिळाली, तेव्हा त्यांनी तिचे सोने करून दाखवले,” असे कौतुक त्यांनी केले. तसेच ‘देख ले इंडिया’ माहितीपटाच्या निर्मात्या शांती मोहन आणि दिग्दर्शक मुकुंद मूर्ती यांचेही त्यांनी अभिनंदन केले. याशिवाय, कार्यक्रमादरम्यान राज्यपाल व उपमुख्यमंत्र्यांच्या हस्ते खेलरत्न आणि अर्जुन पुरस्कार विजेत्या दिव्यांग खेळाडू डॉ. दीपा मलिक यांचाही विशेष सत्कार करण्यात आला.

या सत्कार सोहळ्यात भारतीय अंध महिला क्रिकेट संघाच्या कर्णधार दीपिका टी. सी., उपकर्णधार गंगा कदम, सिमू दास, प्रिया खीर, अनु कुमारी, जमुना राणी टुडू, काव्या, अनेखा देवी, बसंती हंसदा, सिमरणजित कौर, सुनीता सराटे, पर्बती मरांडी, फुला सोरेन, काव्या एन. आर., सुषमा पटेल आणि दुर्गा येवले या सर्व प्रतिभावान खेळाडूंचा सन्मान करण्यात आला. तसेच क्रिकेट असोसिएशन फॉर ब्लाइंड इन इंडियाचे अध्यक्ष डॉ. महांतेश जी. के. आणि चित्रपट निर्माते-दिग्दर्शकांचाही गौरव करण्यात आला.