नवी दिल्ली: भारताच्या स्वातंत्र्यदिनाचे औचित्य साधत राजधानी नवी दिल्लीतील कोपर्निकस मार्ग आणि कस्तुरबा गांधी मार्ग येथील दोन्ही महाराष्ट्र सदनांमध्ये स्वातंत्र्यदिन अत्यंत उत्साहात आणि देशभक्तीमय वातावरणात साजरा करण्यात आला. महाराष्ट्र शासनाच्या निवासी आयुक्त तथा सचिव डॉ. श्वेता सिंघल यांच्या हस्ते दोन्ही महाराष्ट्र सदनांमध्ये दिमाखात राष्ट्रध्वजारोहण करण्यात आले.

       ध्वजारोहण सोहळ्यानंतर महाराष्ट्र सुरक्षा बलाच्या शिस्तबद्ध पथकाने राष्ट्रध्वजाला मानद वंदना देत आकर्षक पथसंचलन केले. याप्रसंगी डॉ. श्वेता सिंघल यांनी उपस्थित सर्व अधिकारी, कर्मचारी आणि नागरिकांना स्वातंत्र्यदिनाच्या मनःपूर्वक शुभेच्छा दिल्या. राजधानी दिल्लीतील या महत्त्वाच्या सोहळ्याला निवासी आयुक्त (गुंतवणूक) सुशील गायकवाड, महाराष्ट्र परिचय केंद्राचे संचालक हेमराज बागुल, महाराष्ट्र सदनचे सहाय्यक निवासी आयुक्त नितीन शेंडे, जनसंपर्क अधिकारी मनीषा पिंगळे, सार्वजनिक बांधकाम विभागाचे उपअभियंता श्री. गंगवार, लेखा अधिकारी निलेश केदारे, व्यवस्थापक प्रमोद कोलपते, सारिका शेलार, प्रियंका नागे, सुरक्षा सहाय्यक अधिकारी अनिल चोरगे यांच्यासह नवी दिल्लीतील महाराष्ट्र शासनाच्या विविध कार्यालयांमध्ये कार्यरत अधिकारी, कर्मचारी आणि मान्यवर मोठ्या संख्येने उपस्थित होते. देशभक्तीच्या आणि चैतन्यमय वातावरणात पार पडलेल्या या सोहळ्यामुळे दिल्लीतील महाराष्ट्र सदन परिसर अभिमानाने भारून गेला होता.

नवी दिल्ली: येथील महाराष्ट्र सदनात ‘हर घर तिरंगा’ अभियानाला अत्यंत उत्साहात  आणि देशभक्तीपूर्ण वातावरणात सुरुवात झाली. देशाच्या स्वातंत्र्याचा अमृत महोत्सव आणि राष्ट्रध्वजाप्रती आदर व्यक्त करण्यासाठी महाराष्ट्र सदन परिसरात काढण्यात आलेल्या तिरंगा रॅलीने संपूर्ण परिसर तिरंगामय झाला होता. महाराष्ट्र सदनच्या नवी दिल्लीतील निवासी आयुक्त तथा सचिव डॉ. श्वेता सिंघल यांच्या प्रमुख उपस्थितीत या रॅलीचा शुभारंभ करण्यात आला.

        या रॅलीत महाराष्ट्र परिचय केंद्राचे संचालक हेमराज बागुल, सहाय्यक निवासी आयुक्त नितीन शेंडे, सहायक लेखा अधिकारी निलेश केदारे, महाराष्ट्र सदनाचे व्यवस्थापक प्रमोद कोलपते आणि सुरक्षा अधिकारी अनिल चोरगे यांच्यासह विविध विभागांचे अधिकारी, कर्मचारी आणि मोठ्या संख्येने नागरिक सहभागी झाले होते. हातात तिरंगा ध्वज घेऊन निघालेल्या या रॅलीमुळे संपूर्ण महाराष्ट्र सदन परिसर राष्ट्रभक्तीच्या घोषणांनी दुमदुमला होता. उपस्थितांनी यावेळी राष्ट्रध्वजाचा सन्मान करण्याचा संकल्प करत देशप्रेमाचा संदेश दिला.

          ‘हर घर तिरंगा’ या अभियानाचे महत्त्व सांगताना प्रशासनाकडून नागरिकांना आवाहन करण्यात आले की, त्यांनी या उपक्रमात उत्स्फूर्तपणे सहभागी होऊन आपल्या घरावर तिरंगा फडकवावा आणि देशाचा स्वातंत्र्यदिन मोठ्या उत्साहात साजरा करावा. राष्ट्रध्वजा बद्दल असलेली आदर आणि अभिमानाची भावना अधिक वृद्धिंगत करण्यासाठी हे अभियान महत्त्वपूर्ण असल्याचे मत यावेळी व्यक्त करण्यात आले. या रॅलीच्या माध्यमातून दिल्लीत असलेल्या महाराष्ट्र सदनाने देशप्रेमाचा एक आगळावेगळा आविष्कार सादर केला असून, या उपक्रमामुळे उपस्थित सर्वांमध्ये देशभक्तीची नवी ऊर्जा संचारली आहे.

नवी दिल्ली: मराठी चित्रपटसृष्टीला राष्ट्रीय स्तरावर हक्काचे आणि मोठे व्यासपीठ मिळवून देण्याच्या उद्देशाने आयोजित करण्यात आलेल्या बहुप्रतिक्षित ‘दिल्ली मराठी चित्रपट महोत्सव – २०२६’ चा शानदार शुभारंभ अत्यंत उत्साहात पार पडला. राजधानी नवी दिल्ली येथील डॉ. आंबेडकर इंटरनॅशनल सेंटर येथे झालेल्या या सोहळ्यात ज्येष्ठ नेते तथा खासदार विनोद तावडे यांच्या प्रमुख हस्ते महोत्सवाचे दिमाखात उद्घाटन झाले. याच कार्यक्रमादरम्यान महाराष्ट्र सदन आणि महाराष्ट्र परिचय केंद्राच्या संयुक्त विद्यमाने सुरू करण्यात आलेल्या ‘दादासाहेब फाळके चित्रपट रसास्वाद मंडळाचे’ देखील अधिकृत उद्घाटन करण्यात आले.

    या ऐतिहासिक उद्घाटन सोहळ्यास खासदार विनोद तावडे यांच्यासह निवासी आयुक्त श्वेता सिंघल, दिल्ली मराठी प्रतिष्ठानचे संस्थापक वैभव डांगे, महाराष्ट्र चित्रपट, रंगभूमी आणि सांस्कृतिक विकास महामंडळाचे सहव्यवस्थापकीय संचालक प्रशांत साजणीकर, महाराष्ट्र परिचय केंद्राचे संचालक हेमराज बागुल आणि महामंडळाच्या वित्तीय सल्लागार चित्रलेखा खातू यांच्यासह अनेक मान्यवर व दिल्लीतील मराठी रसिक मोठ्या संख्येने उपस्थित होते.

    उद्घाटन प्रसंगी उपस्थितांना मार्गदर्शन करताना खा. विनोद तावडे यांनी मराठी साहित्य, नाटक आणि चित्रपटांचा भारतीय चित्रपटसृष्टीवर पडलेला सखोल प्रभाव अत्यंत प्रभावीपणे अधोरेखित केला. दिल्लीसह संपूर्ण देशभरात मराठी कला, संस्कृती आणि साहित्याबद्दल नितांत आदर असल्याचे सांगत त्यांनी, मराठी चित्रपट व नाट्यकृतींनी अनेक हिंदी आणि इतर प्रादेशिक भाषांमधील उत्कृष्ट चित्रपटांना कशी प्रेरणा दिली, याचा इतिहास उजळवला. ‘रायगडाला जेव्हा जाग येते’, ‘पाठलाग’, ‘कुंकू’, ‘शांतता! कोर्ट चालू आहे’, ‘नटसम्राट’, ‘अशी ही बनवाबनवी’ आणि ‘फेकाफेकी’ यांसारख्या अजरामर मराठी कलाकृतींनी भारतीय चित्रपट सृष्टीला नेहमीच समृद्ध केले आहे, असे नमूद करत त्यांनी भारतरत्न लता मंगेशकर, विजयाबाई मेहता आणि शांता शेळके यांच्या गौरवशाली स्मृतींना उजाळा दिला. उत्कृष्ट कलाकृती निर्मिती मागील समर्पण, शिस्त आणि सूक्ष्म निरीक्षण यामुळेच मराठी कलाकृती काळाच्या कसोटीवर खऱ्या अर्थाने टिकल्या आहेत, असे सांगत भविष्यात दिल्लीत केवळ चित्रपटच नव्हे तर भव्य ‘मराठी नाट्य महोत्सवाचा’ देखील विस्तार व्हावा, अशी अपेक्षा त्यांनी व्यक्त केली.

    याप्रसंगी बोलताना निवासी आयुक्त श्वेता सिंघल यांनी ‘दादासाहेब फाळके चित्रपट रसास्वाद मंडळ’ स्थापन करण्यामागची मुख्य भूमिका स्पष्ट केली. मराठी चित्रपट केवळ मनोरंजनाचे साधन नसून ते प्रेक्षकांना सखोल विचार करायला प्रवृत्त करतात, असे सांगून त्यांनी महाराष्ट्राची समृद्ध सांस्कृतिक परंपरा राजधानीतील मराठी व इतर भाषिक नागरिकांपर्यंत पोहोचवणे हा यामागचा मुख्य उद्देश असल्याचे सांगितले. यापुढे महाराष्ट्र सदनामध्ये नियमितपणे उत्कृष्ट मराठी चित्रपटांचे प्रदर्शन आयोजित केले जाणार असून, कार्यालयीन वेळेनंतरही नागरिकांना दर्जेदार मराठी चित्रपटांचा आनंद घेता येईल, असे त्यांनी जाहीर केले. महाराष्ट्र आणि दिल्ली यांच्यातील सांस्कृतिक सेतू अधिक मजबूत करणारी ही एक महत्त्वाची सुरुवात असल्याचे त्यांनी नमूद केले. याशिवाय सहव्यवस्थापकीय संचालक प्रशांत साजणीकर यांनी चित्रनगरीचा गौरवशाली इतिहास व मराठी चित्रपट सृष्टीतील योगदानावर सविस्तर प्रकाश टाकला.

   दिल्ली मराठी प्रतिष्ठानचे संस्थापक वैभव डांगे यांनी प्रास्ताविकात, राजधानीत पहिल्यांदाच आयोजित झालेला हा महोत्सव मराठी चित्रपट सृष्टीसाठी एक ऐतिहासिक मैलाचा पत्थर ठरेल, असे मत व्यक्त केले. दिल्लीतील मराठी बांधवांना एकत्र आणत मराठी संस्कृतीचा वारसा जपण्याचे कार्य प्रतिष्ठान करत असल्याचे त्यांनी सांगितले. कार्यक्रमाचे सूत्रसंचालन विवेक गार्गे यांनी केले. दरम्यान, यापुढे दरवर्षी ऑगस्ट महिन्याच्या पहिल्या शुक्रवार, शनिवार आणि रविवारी हा ‘दिल्ली मराठी चित्रपट महोत्सव’ नियमितपणे आयोजित केला जाणार असल्याची अधिकृत घोषणा करण्यात आली. तसेच महाराष्ट्र सदनामध्ये वर्षभर दर महिन्याला एका शनिवारी मराठी चित्रपटांचे नियमित प्रदर्शन आणि चित्रपट रसास्वाद उपक्रम राबविला जाणार असून, यामुळे राजधानीत मराठी संस्कृतीचा वारसा अधिक जोपासण्यास मदत होणार आहे.