वाई : संयमाचे, विश्वासाचे आणि गरजे पुरताच आधार देणारे वातावरण मुलांना मिळवून देणे हे संपूर्ण समाजाचे कर्तव्य आहे. असे पोषक वातावरण हेच मुलांसाठी खरे प्रोत्साहन आणि प्रशिक्षण ठरते, असे प्रतिपादन सातारा येथील मनोविकारतज्ज्ञ डॉ. अनिमिष चव्हाण यांनी केले.

वाई येथील पद्मश्री डॉ. ग. गो. जाधव सार्वजनिक मुक्तद्वार ग्रंथालयाच्या सभागृहात बालवाचकांनी लिहिलेल्या ‘माझी पहिली गोष्ट’ या पुस्तकाचा प्रकाशन समारंभ नुकताच पार पडला. ‘अ बुक कनेक्शन प्रकाशन संस्था, सातारा’ आणि पद्मश्री डॉ. ग. गो. जाधव सार्वजनिक ग्रंथालय यांच्या संयुक्त विद्यमाने या कार्यक्रमाचे आयोजन करण्यात आले होते.

कार्यक्रमाच्या प्रमुख पाहुण्या प्रसिद्ध कवयित्री डॉ. योगिता राजकर म्हणाल्या, “पालकांनी बालकांच्या सृजनशीलतेला प्रोत्साहन द्यावे. बालवयातच मुलांना व्यक्त होण्याची संधी दिल्यास आजची मुले उद्याचे लेखक आणि कवी बनतील.” मुलांना लहानपणापासून वाचनाची गोडी लागल्यास त्यांची कल्पनाशक्ती विकसित होते, शब्दसंपत्ती वाढते आणि नवनवीन कल्पनांच्या विश्वात रमण्याची संधी मिळते, असेही त्यांनी सांगितले.

कार्यक्रमाच्या अध्यक्षस्थानावरून बोलताना डॉ. अनिमिष चव्हाण यांनी मुलांना स्वतः शिकण्याची आणि चुका करून त्यातून सुधारण्याची संधी देण्याची गरज व्यक्त केली. मुलांना सतत प्रश्न विचारण्याची संधी पालक आणि शिक्षकांनी दिली पाहिजे. “मुलांना जग समजून घ्यायचे असते. त्यांना ते समजून घेऊ द्या आणि व्यक्त होऊ द्या,” असे त्यांनी सांगितले.

कार्यक्रमाच्या प्रारंभी ग्रंथमित्र डॉ. शिवाजीराव चव्हाण यांच्या प्रतिमेचे पूजन करून दीपप्रज्वलन करण्यात आले. ग्रंथालयाचे सहकार्यवाह प्रा. बाळासाहेब कोकरे यांनी प्रास्ताविक करून पाहुण्यांचा परिचय करून दिला. ज्येष्ठ संचालक डॉ. आनंदराव भोसले यांनी उपस्थितांचे स्वागत केले. ‘अ बुक कनेक्शन’च्या प्रतिनिधी सौ. स्मिता पोरे यांनी प्रकाशन संस्थेची भूमिका स्पष्ट केली.

ग्रंथालयाच्या कार्यवाह सुनिता कदम यांनी आभार मानताना या उपक्रमाचा उद्देश स्पष्ट केला. बालवाचकांमध्ये लेखनकलेचा विकास व्हावा, यासाठी मार्गदर्शनाची गरज असल्याचे त्यांनी सांगितले. मे महिन्यात चार दिवसांची कार्यशाळा घेऊन विद्यार्थ्यांना वाचन आणि लेखनाचे मार्गदर्शन करण्यात आले. त्यानंतर विद्यार्थ्यांनी स्वतः लिहिलेल्या कथांचे ‘माझी पहिली गोष्ट’ हे पुस्तक ‘अ बुक कनेक्शन, सातारा’ने प्रकाशित केले आहे. या पुस्तकात आठ विद्यार्थी लेखकांच्या कथांचा समावेश आहे.

सहायक ग्रंथपाल सौ. साधना राऊत यांनी सूत्रसंचालन केले. बालकथा लेखिका कु. शुभ्रा तळपाडे आणि पालक प्रतिनिधी श्री. अमोल राऊत यांनी मनोगत व्यक्त केले. विद्यार्थी, पालक आणि मान्यवरांच्या उपस्थितीत पुस्तकाचे प्रकाशन करण्यात आले.

कार्यक्रमाच्या यशस्वीतेसाठी ग्रंथालयाचे संचालक, ग्रंथपाल बाबासाहेब गाडे, सौ. साधना राऊत, सौ. अनिता शेंडे, राहुल गाडे यांच्यासह कर्मचारी आणि सभासदांनी सहकार्य केले. यावेळी शिक्षक, पालक, विद्यार्थी तसेच यशवंतनगर परिसरातील नागरिक मोठ्या संख्येने उपस्थित होते.

मुंबई: भारतीय राजकारणातील एक अष्टपैलू, प्रतिभावंत व्यक्तिमत्त्व, अमोघ वक्ता आणि देशाच्या माजी परराष्ट्र मंत्री दिवंगत सुषमा स्वराज यांच्या जीवन कार्यावर आधारित ‘अग्निशिखा सुषमा स्वराज’ या हिंदी अनुवादित पुस्तकाची पहिली प्रत नुकतीच महाराष्ट्राचे राज्यपाल जिष्णु देव वर्मा यांना सस्नेह भेट देण्यात आली. डॉ. मेधा सोमय्या यांनी मूळ मराठी भाषेत लिहिलेल्या या पुस्तकाचा हिंदी अनुवाद प्रसिद्ध लेखक अमरजीत मिश्र यांनी केला आहे. राज्यपाल भवन येथे पार पडलेल्या या विशेष कार्यक्रमात राज्यपाल वर्मा यांनी सुषमा स्वराज यांच्या गौरवशाली राजकीय प्रवासाला आणि आठवणींना उजाळा दिला.

        सुषमा स्वराज यांच्या कार्याचा गौरव करताना राज्यपाल जिष्णु देव वर्मा म्हणाले की, त्या केवळ एक प्रतिभावंत राजकारणीच नव्हत्या, तर आपल्या प्रदीर्घ राजकीय वाटचालीत त्यांनी ज्या-ज्या पदांची धुरा सांभाळली, त्या प्रत्येक पदावर आपल्या कर्तृत्वाचा एक वेगळा व अनोखा ठसा उमटविला होता. त्या एक अमोघ वक्ता, उत्कृष्ट संसदपटू, लढवय्या विरोधी पक्षनेत्या आणि अत्यंत कार्यक्षम मंत्री म्हणून संपूर्ण देशास परिचित होत्या. आजच्या आधुनिक समाजात तरुण पिढीला त्यांच्यासारख्या समकालीन आदर्श व्यक्तिमत्त्वाची (रोल मॉडेलची) नितांत आवश्यकता असल्याचे त्यांनी सांगितले.

     यावेळी सुषमा स्वराज यांच्या संस्कृत भाषेवरील प्रभुत्वाचा विशेष उल्लेख करताना राज्यपाल म्हणाले की, स्वराज यांनी संस्कृत भाषेत दिलेले एक भाषण इतके अस्खलित आणि विद्वत्ताप्रचुर होते की, देशातील प्रत्येक संस्कृत विद्यार्थ्याने ते ऐकलेच पाहिजे. विद्यापीठांनी विद्यार्थ्यांच्या अभ्यासक्रमा साठी किंवा मार्गदर्शनासाठी सुषमा स्वराज यांचे ते भाषण उपलब्ध करून द्यावे, अशी शिफारस आपण करणार असल्याचे त्यांनी स्पष्ट केले.

     उत्तर पूर्वेकडील राज्यांच्या आठवणींना उजाळा देताना राज्यपाल म्हणाले की, त्याकाळी उत्तर पूर्वेकडील राज्यांमध्ये पक्षसंघटन काहीसे कमजोर असतानाही, सुषमाजी कार्यकर्त्यांच्या आग्रही निमंत्रणावरून आवर्जून त्या राज्यांचा दौरा करायच्या. विशेष म्हणजे, कोणत्याही जाहीर सभेत किंवा भाषणाला जाण्यापूर्वी त्या तिथल्या स्थानिक भाषेतील काही मूळ शब्द आणि वाक्ये आवर्जून समजून घ्यायच्या आणि आपल्या भाषणात त्यांचा वापर करायच्या. त्यांच्या या संवेदनशील आणि आदरयुक्त स्वभावामुळे त्या उत्तर पूर्वेकडील राज्यांमध्ये अत्यंत लोकप्रिय नेत्या बनल्या होत्या. कार्यक्रमा दरम्यान पुस्तकाच्या लेखिका डॉ. मेधा सोमैया आणि अनुवादक अमरजीत मिश्र यांनी आपले मनोगत व्यक्त करत पुस्तकामागची भूमिका स्पष्ट केली.

   या महत्त्वपूर्ण पुस्तक भेट सोहळ्या प्रसंगी माजी केंद्रीय मंत्री डॉ. किरीट सोमय्या, नगरसेवक डॉ. नील सोमय्या, मुंबईचे माजी उपमहापौर अरुण देव यांच्यासह विविध क्षेत्रांतील अनेक मान्यवर मोठ्या संख्येने उपस्थित होते.