मुंबई: महाराष्ट्राच्या सुपीक मातीत पिकणारा कापूस आणि त्यापासून तयार होणारी दर्जेदार उत्पादने आता थेट जगातील उच्चभ्रू फॅशन मार्केट आणि मॉलमध्ये झळणार आहेत. कापूस उत्पादना पासून ते जागतिक बाजारपेठे पर्यंतची संपूर्ण साखळी अधिक मजबूत करून महाराष्ट्राला जागतिक एक्सपोर्ट हब (Global Export Hub) बनवण्यासाठी राज्य सरकार पूर्णपणे कटिबद्ध असल्याचे प्रतिपादन उपमुख्यमंत्री एकनाथ शिंदे यांनी केले. मुंबईतील जिओ वर्ल्ड सेंटर येथे ‘असोचेम’ (ASSOCHAM) च्या वतीने आयोजित ‘फार्म टू फॉरेन कॉन्क्लेव्ह २०२६’ या महत्त्वाच्या परिषदेत ते प्रमुख पाहुणे म्हणून बोलत होते.

         पंतप्रधान नरेंद्र मोदी यांच्या ‘विकसित भारत २०४७’ या स्वप्नाला भक्कम आधार देण्यासाठी राज्य सरकार ‘फाइव्ह एफ’ (5F) व्हिजनवर प्रभावीपणे काम करत असल्याचे उपमुख्यमंत्र्यांनी यावेळी स्पष्ट केले. यामध्ये फार्म ते फायबर (शेतापासून धागा), फायबर ते फॅक्टरी (धाग्यापासून कारखाना), फॅक्टरी ते फॅशन (कारखान्यातून फॅशन) आणि फॅशन ते फॉरेन (फॅशनमधून परदेश) असा सर्व समावेशक प्रवास निश्चित करण्यात आला आहे. याद्वारे राज्यातील कापूस, रेशीम, जूट आणि फळांचे जागतिक स्तरावर ब्रँडिंग करण्याचे उद्दिष्ट ठेवण्यात आले आहे. महाराष्ट्राची ऐतिहासिक ‘टेक्सटाईल हब’ म्हणून असलेली ओळख आणि मुंबईला मिळालेला आर्थिक राजधानीचा दर्जा यामध्ये कापड गिरण्यांचे मोठे योगदान होते. याच ऐतिहासिक वारशाचा वसा पुढे चालवत नागपूरचा ‘पीएम मित्रा पार्क’ (PM MITRA Park) आणि ‘अमरावती टेक्स्टाईल क्लस्टर’ राज्याच्या अर्थव्यवस्थेला एक नवी गती देतील, असा विश्वास त्यांनी व्यक्त केला.

        केवळ उत्पादनात वाढ करून चालणार नाही, तर ते उत्पादन ‘ग्रीन’, ‘डिजिटल’ आणि ‘पारदर्शक’ असणे आजच्या काळात गरजेचे आहे, असे सांगत उपमुख्यमंत्री शिंदे म्हणाले की, इचलकरंजी, सोलापूर आणि भिवंडीसह राज्यातील विविध भागांमध्ये ‘रेडीमेड गारमेंट क्लस्टर्स’ वेगाने उभारले जात आहेत. तसेच, विविध कल्याणकारी योजनांच्या माध्यमातून राज्यातील महिलांना आधुनिक शिलाई प्रशिक्षणाशी जोडून त्यांना आर्थिक दृष्ट्या स्वयंपूर्ण बनवण्याचे काम सरकार करत आहे. महाराष्ट्राच्या समृद्ध वारशाची ओळख असणारी पैठणी, कोल्हापुरी चप्पल यांसारख्या पारंपरिक उत्पादनांचा जागतिक विस्तार करण्यासाठी विशेष प्रयत्न सुरू आहेत. मुंबईतील भायखळा येथील ऐतिहासिक इंडिया युनायटेड मिलच्या जागेवर भव्य ‘टेक्स्टाईल, क्राफ्ट अँड कल्चरल म्युझियम’ उभारले जात असून यामुळे राज्याच्या सांस्कृतिक वारशाची मान जागतिक पातळीवर उंचावणार आहे.

       समृद्धी महामार्ग, नवी मुंबई आंतरराष्ट्रीय विमानतळ आणि जेएनपीए (JNPA) बंदरासारख्या अत्याधुनिक पायाभूत सुविधांमुळे आता राज्यातील उत्पादने अवघ्या काही तासांत आंतरराष्ट्रीय बाजारपेठेत पोहोचू शकतील, असा दावा त्यांनी केला. कापसापासून तयार होणाऱ्या धाग्यातून आपण केवळ कपडे विणत नसून, एका अर्थाने ‘विकसित भारताचे भविष्य’ विणत आहोत, असे सांगतानाच लंडन, न्यूयॉर्क आणि पॅरिसच्या नामांकित फॅशन शोरूम मध्ये लवकरच ‘मेड इन महाराष्ट्र’चा टॅग दिसेल, असा ठाम निर्धार उपमुख्यमंत्री एकनाथ शिंदे यांनी या परिषदेत व्यक्त केला. कार्यक्रमाच्या सुरुवातीला असोचॅमच्या विशेष वार्षिक अहवालाचे प्रकाशनही त्यांच्या हस्ते थाटात पार पडले.

नवी दिल्ली: सर्वोच्च न्यायालयात शिवसेना पक्ष आणि ‘धनुष्यबाण’ चिन्हाच्या अधिकारा बाबतची सुनावणी अंतिम टप्प्यात असताना, महाराष्ट्राचे उपमुख्यमंत्री तथा शिवसेना पक्षप्रमुख एकनाथ शिंदे यांनी आपल्या नवनिर्वाचित व इतर खासदारांसह नवी दिल्ली येथे पंतप्रधान नरेंद्र मोदी यांची सदिच्छा भेट घेतली आहे. पंतप्रधान नरेंद्र मोदी यांनी राष्ट्रीय लोकशाही आघाडीच्या (एनडीए) खासदारांसाठी आयोजित केलेल्या विशेष अल्पोपाहार बैठकीनंतर एकनाथ शिंदे आणि शिवसेनेच्या प्रमुख खासदारांनी पंतप्रधानांची स्वतंत्रपणे भेट घेतली. तब्बल एक तास चाललेल्या या बैठकीत महाराष्ट्रातील विविध विकासप्रकल्प, राज्यातील पावसाची सद्यस्थिती आणि मतदारसंघातील विकास कामांचा आढावा घेण्यात आला.

     या उच्चस्तरीय बैठकीला शिवसेनेचे गटनेते डॉ. श्रीकांत शिंदे, खासदार श्रीरंग बारणे, नरेश म्हस्के, रवींद्र वायकर, भाऊसाहेब वाकचौरे, संजय देशमुख, ओमराजे निंबाळकर, ज्योती वाघमारे आणि संजय दिना पाटील यांच्यासह अनेक प्रमुख खासदार उपस्थित होते. या भेटीदरम्यान पंतप्रधान नरेंद्र मोदी यांनी उपस्थित सर्व नवीन खासदारांच्या मतदार संघांतील कामांची आग्रही विचारपूस केल्याचे सांगण्यात आले.

     भेट संपल्यानंतर प्रसार माध्यमांशी संवाद साधताना उपमुख्यमंत्री एकनाथ शिंदे यांनी पंतप्रधान मोदींच्या कार्यपद्धतीचे कौतुक केले. पंतप्रधान तरुणांशी थेट संवाद साधत आहेत ही अत्यंत सकारात्मक बाब असून, सरसंघचालक मोहन भागवत यांनीही तरुण हेच राष्ट्राचे खरे भविष्य असल्याचे म्हटले आहे, त्यामुळे तरुणांशी सातत्याने संवाद होणे गरजेचे असल्याचे त्यांनी नमूद केले. यासोबतच संसदेचे कामकाज वारंवार रोखल्याबद्दल त्यांनी विरोधी पक्षांवर अत्यंत आक्रमक शब्दांत ताशेरे ओढले. संसदेत कोणतेही मतभेद असले तरी चर्चा सभागृहातच व्हायला हवी, मात्र विरोधी पक्ष विद्यार्थ्यांच्या आंदोलनांचा गैरवापर करून केवळ राजकीय स्वार्थ साधत आहेत, असा गंभीर आरोप शिंदेंनी केला. सुरुवातीला केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करण्यात आली होती आणि त्यांनी राजीनामा दिल्यानंतर विद्यार्थी शांत झाले, तरीही विरोधक जाणीवपूर्वक या विषयाचे राजकारण करत असल्याचे ते म्हणाले.

सर्वोच्च न्यायालयात शिवसेना पक्ष आणि चिन्हाबाबत सुरू असलेल्या कायदेशीर लढाईवरून एकनाथ शिंदे यांनी ठाकरे गटावर जोरदार निशाणा साधला. ठाकरे गटाचा खरोखरच न्यायसंस्थेवर आणि न्यायालयावर विश्वास आहे का, हे त्यांनी एकदा स्पष्ट केले पाहिजे, असा सणसणीत टोला त्यांनी लगावला. यापूर्वीही सुनावणीच्या प्रत्येक टप्प्यावर ते पेढे वाटत असत आणि सरकार घटनाबाह्य असल्याचा कांगावा करत असत. परंतु, देशाचे तत्कालीन सरन्यायाधीश धनंजय चंद्रचूड यांनी आपले सरकार पूर्णपणे कायदेशीर आणि घटनात्मक चौकटीत स्थापन झाले असल्याचे स्पष्टपणे सांगितले होते. त्यामुळे आजही तीच जुनी कॅसेट पुन्हा वाजवली जात असून, त्या सरकारचा आणि आमदारांचा कार्यकाळ आता यशस्वीपणे पूर्ण होत आला आहे, अशा शब्दांत शिंदे यांनी विरोधकांच्या टीकेला प्रत्युत्तर दिले. या राजकीय भेटीमुळे दिल्ली आणि महाराष्ट्राच्या वर्तुळात जोरदार चर्चा रंगली आहे.