पुणे: पुणे शहरात प्रशासनाचे नियम धाब्यावर बसवून मानवी वस्तीत आणि राहत्या घरात बेकायदेशीर पणे देशी-विदेशी दारूचा साठा करून तिची छुप्या पद्धतीने विक्री करणाऱ्या एका अवैध धंद्याचा गुन्हे शाखेच्या युनिट ३ च्या पथकाने पर्दाफाश केला आहे. सिंहगड रोड परिसरातील हिंगणे खुर्द येथील साईनगर भागात अचानक छापा टाकून पोलिसांनी तब्बल १ लाख २४ हजार ६३५ रुपयांच्या देशी व विदेशी मद्याच्या बाटल्या जप्त केल्या आहेत. याप्रकरणी दोघा संशयितांना अटक करण्यात आली असून, या धडक कारवाईमुळे शहरात विनापरवाना मद्यविक्री करणाऱ्यांचे धाबे दणाणले आहेत.

     अंकितकुमार सूरजन बिंद (वय २०, रा. साईनगर, हिंगणे खुर्द, सिंहगड रोड) आणि आदित्य राजू शिंदे (रा. शंकर मंदिराजवळ, जनता वसाहत) अशी अटक करण्यात आलेल्या दोघा आरोपींची नावे आहेत. गुन्हे शाखेचे युनिट ३ चे पथक नेहमी प्रमाणे सिंहगड रोड परिसरात गस्त घालत असताना, हिंगणे खुर्दधील साई नगरमध्ये राहणाऱ्या अंकित कुमार बिंद याने आपल्या स्वतःच्या घरात बेकायदेशीर पणे मद्याचा साठा करून तो ग्राहकांना चढ्या भावाने विकत असल्याची गुप्त माहिती पोलीस अंमलदार पंढरीनाथ शिंदे आणि काटकर यांना मिळाली. या माहितीच्या आधारे पोलिसांच्या पथकाने तत्काळ संबंधित घरावर छापा टाकला.

     पोलिसांनी घरात झडती घेतली असता तेथे मोठ्या प्रमाणावर विविध ब्रँडच्या देशी आणि विदेशी मद्याच्या बाटल्या आढळून आल्या. पोलिसांनी सुमारे १ लाख २४ हजार रुपयांचा हा संपूर्ण मद्यसाठा जप्त करून अंकित कुमार बिंद याला ताब्यात घेतले. त्याच्याकडे कसून चौकशी केल्यानंतर त्याने आपला मित्र आदित्य शिंदे याच्या सोबत मिळून हा अवैध मद्यविक्रीचा व्यवसाय भागीदारीत चालवत असल्याची कबुली दिली. त्यानंतर पोलिसांनी तात्काळ दुसऱ्या आरोपीलाही बेड्या ठोकल्या आणि दोघांना पुढील कायदेशीर कारवाई साठी सिंहगड रोड पोलीस ठाण्याच्या ताब्यात दिले. ही यशस्वी कारवाई उच्च पोलीस अधिकाऱ्यांच्या मार्गदर्शनाखाली गुन्हे शाखेच्या पथकाने पार पाडली असून, अशा प्रकारे घरगुती स्वरूपात चालणाऱ्या अवैध धंद्यांवर कठोर कारवाई सुरूच राहणार असल्याचे पोलिसांनी स्पष्ट केले आहे.

पिंपरी: राज्याच्या पोलीस दलातील तब्बल १५० पोलीस निरीक्षकांच्या विनंती व प्रशासनिक बदल्यांचे आदेश नुकतेच जारी करण्यात आले आहेत. या व्यापक फेरबदलांचा मोठा प्रभाव पिंपरी-चिंचवड पोलीस आयुक्तालयावरही पाहायला मिळत असून, विविध पोलीस घटकांमधून १२ नवीन पोलीस निरीक्षकांची पिंपरी-चिंचवड आयुक्तालयात बदली झाली आहे. यासोबतच आयुक्तालयातील दोन निरीक्षकांना अन्य घटकांमध्ये कार्यभार सांभाळण्यासाठी पाठवण्यात आले असून, आयुक्तालयांतर्गतच ६ पोलीस निरीक्षकांच्या अंतर्गत बदल्या करण्यात आल्या आहेत.

      या नवीन बदलांनुसार, विविध ठिकाणांहून पिंपरी-चिंचवड आयुक्तालयात रुजू होणाऱ्या अधिकाऱ्यांमध्ये पोलीस निरीक्षक प्रशांत आरदवाड (दहशतवाद विरोधी पथक, मुंबई), हेमंत कदम (धाराशिव), रवींद्र कदम (पुणे शहर), सिद्धराम म्हेत्रे (गुन्हे अन्वेषण विभाग, पुणे), विजयकुमार शिंदे (गुन्हे अन्वेषण विभाग, पुणे), देवेंद्र चव्हाण (पोलिस प्रशिक्षण केंद्र, खंडाळा), सुरेखा घार्गे (मुंबई शहर), चंद्रकांत जाधव (नांदेड), राजेंद्र निकाळजे (ठाणे शहर), गोताराम शेवाळे (ठाणे शहर), सोमनाथ जाधव (छत्रपती संभाजीनगर शहर) आणि अमोल गवळी (पोलिस प्रशिक्षण केंद्र, सोलापूर) यांचा समावेश आहे. यापैकी रवींद्र कदम यांची यापूर्वी सोलापूर येथील पोलीस प्रशिक्षण केंद्रात बदली आदेशाधीन होती. दुसरीकडे, पिंपरी-चिंचवड आयुक्तालयातून निरीक्षक प्रदीप रायण्णावर यांची रायगड येथे, तर शत्रुघ्न माळी यांची नवी मुंबई येथे बदली करण्यात आली आहे.

      आयुक्तालयांतर्गत कायदा व सुव्यवस्था अधिक प्रभावी करण्यासाठी ६ पोलीस निरीक्षकांच्या अंतर्गत बदल्या करण्यात आल्या आहेत. यामध्ये संतोष पाटील यांची तळेगाव एमआयडीसी पोलीस ठाण्यातून गुन्हे शाखेत, अर्जुन घोडे पाटील यांची निगडी पोलीस ठाण्यातून गुन्हे शाखेत, तर विजयानंद पाटील यांची पिंपरी पोलीस ठाण्यातून तळेगाव एमआयडीसी पोलीस ठाण्यात बदली झाली आहे. तसेच, नरेंद्र ठाकरे यांची नियंत्रण कक्षातून गुन्हे शाखेत, प्रदीप पाटील यांची नियंत्रण कक्षातून वाहतूक शाखेत, तर तेजस्विनी कदम यांची गुन्हे शाखेतून वाहतूक शाखेत वर्णी लागली आहे. या नवीन नियुक्त्यामुळे औद्योगिक नगरीतील पोलीस यंत्रणा अधिक गतिमान होऊन कायदा आणि सुव्यवस्था राखण्यास मोठी मदत होईल, अशी अपेक्षा व्यक्त केली जात आहे.