मुंबई: अवघ्या काही मिनिटांत जलद डिलिव्हरी देण्यासाठी देशभरात लोकप्रिय असलेल्या ‘ब्लिंक कॉमर्स प्रायव्हेट लिमिटेड’च्या (Blinkit) मुंबईतील गोदामावर अन्न व औषध प्रशासनाने (FDA) अत्यंत धडक कारवाई केली आहे. मालाड परिसरातील या गोदामात अन्न सुरक्षेच्या नियमांचे थेट उल्लंघन, प्रचंड अस्वच्छता आणि झुरळांचा मोठा प्रादुर्भाव आढळल्यामुळे एफडीएनं या गोदामाचा अन्न परवाना तात्काळ प्रभावाने निलंबित केला आहे. अन्न व औषध प्रशासनाचे आयुक्त तुकाराम मुंढे यांच्या नेतृत्वाखाली राज्यभरात सुरू असलेल्या कठोर कारवायांच्या सत्रामुळे अन्न व किराणा सामाग्री पुरवठा करणाऱ्या व्यावसायिक वर्तुळात मोठी खळबळ उडाली आहे.

          एफडीएच्या वतीने मिळालेल्या सविस्तर माहितीनुसार, ७ ऑगस्ट रोजी प्रशासनाच्या पथकाने मालाड पश्चिम येथील सर्वोदय भुवनमधील ब्लिंकिटच्या गोदामाची अचानक पाहणी केली. या तपासणी दरम्यान गोदामामध्ये अत्यंत दयनीय आणि अस्वच्छ परिस्थिती असल्याचे निदर्शनास आले. भाजीपाला आणि फळे साठवण्याच्या मुख्य जागेमध्ये झुरळांचा मोठ्या प्रमाणावर सुळसुळाट असल्याचे आढळले. तसेच, शीतगृहामध्ये (Cold Room) मुदत संपलेले (Expired), खराब झालेले आणि छेडछाड केलेले पॅकेज्ड फूड उघड्यावर पडल्याचे दिसून आले. अन्न सुरक्षेचे अत्यंत महत्त्वाचे निकष मानल्या जाणाऱ्या FIFO आणि FEFO (फर्स्ट इन फर्स्ट आऊट आणि फर्स्ट एक्स्पायर्ड फर्स्ट आऊट) या शास्त्रीय पद्धतींचेही या गोदामात अजिबात पालन केले जात नव्हते.

        तपासणी दरम्यान या गोदामात कचरा व्यवस्थापनाचा पूर्ण अभाव, देखभालीतील गंभीर त्रुटी, अन्न हाताळणाऱ्या कर्मचाऱ्यांची कोणतीही वैद्यकीय तपासणी न करणे, आरोग्यविषयक नोंदींचा अभाव आणि आवश्यक वैयक्तिक स्वच्छतेची कमतरता यांसारख्या अनेक त्रुटी उघडकीस आल्या. ग्राहकांच्या आरोग्याशी थेट खेळणाऱ्या या गंभीर बाबींची एफडीएने अत्यंत गांभीर्याने दखल घेत या गोदामाचा अन्न परवाना पुढील आदेशापर्यंत निलंबित केला आहे. आयुक्त तुकाराम मुंढे यांच्या आक्रमक आणि शिस्तप्रिय भूमिकेमुळे राज्यभरात नियमभंग करणाऱ्या मोठ्या कंपन्यांवरही आता कठोर कारवाईचा बडगा उगारला जात आहे. ग्राहकांच्या आरोग्याशी तडजोड करणाऱ्या कोणत्याही आस्थापनांना सोडले जाणार नाही, असा स्पष्ट संदेश या माध्यमातून देण्यात आला आहे.

पुणे: नागरिकांच्या आरोग्याशी खेळणाऱ्या आणि अन्न सुरक्षेच्या नियमांचे उल्लंघन  करणाऱ्या आस्थापनांवर अन्न व औषध प्रशासनाने (FDA) अत्यंत कठोर भूमिका घेत धडक कारवाई केली आहे. पुणे आणि पिंपरी-चिंचवड परिसरातील विविध हॉटेल, बेकरी, रेस्टॉरंट्स तसेच खाद्यपदार्थ विक्री केंद्रांची कसून तपासणी करण्यात आली असून, नियमांचे गंभीर उल्लंघन करणाऱ्या तब्बल सहा प्रमुख आस्थापनांचे परवाने तात्काळ निलंबित करण्यात आले आहेत. याशिवाय कोंढवा बुद्रुक परिसरात विनापरवाना व संशयास्पदरित्या वाहतूक केला जाणारा सुमारे दीड लाख रुपयांचा ५९८ किलो मीठा मावा जप्त करण्यात आला असून, सांगली जिल्ह्यातही अशाच स्वरूपाची धडक कारवाई करण्यात आली आहे.

          अन्न व औषध प्रशासनाकडून हाती घेण्यात आलेल्या या विशेष मोहिमे दरम्यान अनेक धक्कादायक प्रकार उघडकीस आले. तपासणी केलेल्या काही आस्थापनांमध्ये प्रचंड अस्वच्छता, मानवी आरोग्याला अपायकारक ठरतील असे मुदत संपलेले (Expired) खाद्यपदार्थ साठवून ठेवणे, तसेच ‘अन्न सुरक्षा व मानके कायद्यातील’ (FSSAI) नियमांची पायमल्ली होत असल्याचे निदर्शनास आले. ग्राहकांच्या आरोग्याला थेट गंभीर धोका निर्माण करणाऱ्या या बाबींची दखल घेत प्रशासनाने कठोर पावले उचलली आहेत. या कारवाईत परवाने निलंबित करण्यात आलेल्या आस्थापनांमध्ये लोणावळ्यातील मोरवे येथील ‘द लोटस रिसॉर्ट’, बिबवेवाडी येथील ‘द मसल फूड्स’ (बेकरी), पिंपरी-चिंचवडमधील गणेशनगर येथील ‘हुमा बेकरी’, आंबेगाव बुद्रुकच्या दत्तनगर रस्त्यावरील ‘न्यू महाराष्ट्र बेकर्स’, सहकारनगर पर्वती येथील ‘मारकेश व्हेंचर्स’, तसेच कर्वेनगरमधील वारजे जकात नाक्याजवळील ‘स्विन्स्टा ईएनटी’ यांचा समावेश आहे.

         या कारवाईमुळे पुणे आणि पिंपरी-चिंचवड परिसरातील अन्न व्यावसायिकांमध्ये मोठी खळबळ उडाली आहे. नागरिकांना दर्जेदार व सुरक्षित अन्नपदार्थ उपलब्ध करून देणे ही सर्वच आस्थापनांची नैतिक जबाबदारी असून, नियमांचे उल्लंघन करणाऱ्यांवर यापुढेही अशीच कठोर कारवाई तीव्र केली जाईल, असा इशारा अन्न व औषध प्रशासनाकडून देण्यात आला आहे.