सोलापूर: स्वातंत्र्यदिनाचे औचित्य साधून सोलापूर जिल्ह्यात ‘हर घर तिरंगा’ मोहिमेला अभूतपूर्व व उत्साही प्रतिसाद मिळाला. जिल्हा प्रशासनाच्या वतीने ९ ते १७ ऑगस्ट २०२६ या कालावधीत राबविण्यात येत असलेल्या या व्यापक मोहिमेअंतर्गत सोलापुरात एका भव्य बाईक रॅलीचे आयोजन करण्यात आले होते. विशेष म्हणजे, या रॅलीमध्ये खुद्द पालकमंत्री जयकुमार गोरे, आमदार देवेंद्र कोठे आणि जिल्हाधिकारी एस. कार्तिकेयन यांनी स्वतः मोटारसायकल चालवत सहभाग घेतला आणि उपस्थितांचा व तरुणांचा जोश वाढवला.

          जिल्हाधिकारी कार्यालयाच्या प्रांगणात पालकमंत्री जयकुमार गोरे यांच्या हस्ते या रॅलीचा दिमाखात शुभारंभ करण्यात आला. जिल्हाधिकारी कार्यालयापासून सुरू झालेली ही तिरंगा बाईक रॅली सात रस्ता, पोलीस लाईन रामवाडी आणि मरीआई चौकमार्गे जात एक्जीबिशन सेंटर येथे पोहोचली, जिथे या रॅलीचा समारोप करण्यात आला. मार्गावर ठिकठिकाणी नागरिकांनी रॅलीचे स्वागत केले, ज्यामुळे संपूर्ण सोलापूर शहर देशभक्तीच्या वातावरणात नाहून निघाले होते.

      जिल्हा प्रशासन, जिल्हा क्रीडा कार्यालय आणि ‘माय भारत’ यांच्या संयुक्त विद्यमाने या रॅलीचे अत्यंत नियोजनबद्ध आयोजन करण्यात आले होते. देशाच्या राष्ट्रध्वजाप्रती आदरभाव निर्माण करणे आणि ‘हर घर तिरंगा’ हा संदेश घराघरांपर्यंत पोहोचवणे हा यामागचा मुख्य उद्देश होता. या देशप्रेमाच्या प्रवासात शासकीय अधिकारी व कर्मचाऱ्यांनी मोठ्या संख्येने सहभाग नोंदवला. यावेळी अप्पर जिल्हाधिकारी गणेश निऱ्हाळी, निवासी उपजिल्हाधिकारी अभिजीत पाटील, तालुका क्रीडा अधिकारी राहुल गायकवाड यांच्यासह विविध विभागांचे प्रमुख अधिकारी, तरुण वर्ग आणि नागरिक मोठ्या संख्येने उपस्थित होते. या उपक्रमामुळे सोलापुरात स्वातंत्र्यदिनाचा उत्साह अधिकच द्विगुणीत झाला.

छत्रपती संभाजीनगर: युवाशक्तीच्या नवसंशोधनातील अतुलनीय योगदानामुळे उद्याचा विकसित भारत आणि विकसित महाराष्ट्र घडणार असल्याचा विश्वास मुख्यमंत्री देवेंद्र फडणवीस यांनी व्यक्त केला आहे. पंतप्रधान नरेंद्र मोदी यांच्या नेतृत्वाखाली आपला देश आज जगात एक बलशाली आणि संपन्न राष्ट्र म्हणून नावारूपाला येत आहे, असे सांगत त्यांनी कोकणातून समुद्रात वाहून जाणारे पाणी उजनी मार्गे मराठवाड्यात आणून मराठवाडा सुजलाम-सुफलाम करू आणि इथल्या पुढच्या पिढीला कधीही दुष्काळ पाहू देणार नाही, असा अत्यंत महत्त्वाचा संकल्प छत्रपती संभाजीनगरच्या धरतीवर जाहीर केला.

       ‘हर घर तिरंगा अभियान’ अंतर्गत छत्रपती संभाजीनगर येथे महात्मा जोतिबा फुले पुतळा (संभाजीपेठ) ते क्रांती चौक यादरम्यान एका भव्य व ऐतिहासिक तिरंगा रॅलीचे आयोजन करण्यात आले होते. या रॅलीत मुख्यमंत्री देवेंद्र फडणवीस स्वतः उत्साहाने सहभागी झाले होते. त्यांच्या समवेत विधान परिषदेचे सभापती प्रा. राम शिंदे, जलसंपदा मंत्री राधाकृष्ण विखे पाटील, जलसंपदा मंत्री गिरीश महाजन, पर्यावरण व वातावरणीय बदल मंत्री पंकजा मुंडे, इमाव कल्याण मंत्री अतुल सावे, रोहयो व पणन मंत्री जयकुमार रावल, वस्त्रोद्योग मंत्री संजय सावकारे, केंद्रीय राज्यमंत्री रक्षा खडसे, राज्यमंत्री मेघना बोर्डीकर, खासदार अशोक चव्हाण, खासदार स्मिता वाघ, आमदार रवींद्र चव्हाण, प्रशांत बंब, अनुराधा चव्हाण, मंगेश चव्हाण, राम भदाणे, महापौर समीर राजुरकर यांच्यासह उत्तर महाराष्ट्र व मराठवाड्यातील अनेक मान्यवर, लोकप्रतिनिधी आणि अथांग जनसमुदाय उपस्थित होता.

         रॅलीच्या सुरुवातीला मुख्यमंत्री फडणवीस यांनी महात्मा फुले व सावित्रीमाई फुले यांच्या पुतळ्यास पुष्पहार अर्पण करून अभिवादन केले. त्यानंतर निघालेली ही भव्य रॅली क्रांती चौकात समाप्त झाली. क्रांती चौकातील विशाल जनसमुदायाला संबोधित करताना मुख्यमंत्री म्हणाले की, “तिरंगा ही आमची आन, बान आणि शान आहे. या तिरंग्यासाठी हजारो देशभक्तांनी आपले बलिदान दिले आहे. हा तिरंगा म्हणजेच आमची खरी ओळख आहे. ९ ते १५ ऑगस्ट दरम्यान तिरंगा यात्रा काढून मातृभूमीचे देशप्रेमाने दर्शन घडवण्याचा पंतप्रधान नरेंद्र मोदींनी दिलेला संदेश नागरिकांनी अक्षरशः डोक्यावर घेतला आहे.” छत्रपती संभाजी नगरमधील या तिरंगा रॅलीने गर्दीचे सर्व जुने रेकॉर्ड मोडून काढले असून संपूर्ण शहरात तिरंग्याचे अभूतपूर्व वादळ पाहायला मिळत आहे, अशा शब्दांत त्यांनी संभाजीनगर वासियांच्या देशप्रेमाचे भरभरून कौतुक केले.

         गेल्या दशकात पंतप्रधान नरेंद्र मोदी यांच्या दूरदर्शी नेतृत्वाखाली देशाला नवी दिशा मिळाली असून जागतिक पातळीवर भारताची अर्थव्यवस्था चौथ्या क्रमांकावर पोहोचली आहे, असे सांगत मुख्यमंत्र्यांनी राज्याची अर्थव्यवस्था ५० लाख कोटी रुपयांपर्यंत नेल्याचे नमूद केले. देश बदलतोय, राज्य बदलतंय आणि त्यासोबतच मराठवाड्याचे चित्रही वेगाने बदलत आहे. तरुणांच्या नवसंशोधनाच्या जोरावर आपण देशात तिसरी स्टार्टअप इकोसिस्टम उभी केली असून, याच तरुणशक्तीच्या बळावर भारत ‘विकसित भारत’ म्हणून फिनिक्स भरारी घेत आहे, असे ते म्हणाले.

        डॉ. बाबासाहेब आंबेडकरांनी देशाला जगातील सर्वोत्तम संविधान दिले असल्याचे आठवण करून देत मुख्यमंत्री म्हणाले की, आपण आपल्या हक्कांसोबतच देशासाठीची कर्तव्येही कायम लक्षात ठेवली पाहिजेत. मराठवाड्याला देशापेक्षा १३ महिने उशिरा स्वातंत्र्य मिळाले असून, निजाम शाहीच्या राजवटीतून मुक्ती मिळवण्यासाठी हजारो देशभक्तांनी रक्ताचे पाणी केले आहे. त्यांचे स्मरण करून आज आपण देशासाठी, राज्यासाठी आणि समाजासाठी प्रामाणिकपणे जगण्याची प्रतिज्ञा करूया, असे आवाहन त्यांनी केले. कार्यक्रमाची सुरुवात ‘वंदे मातरम्’ व राज्यगीताने झाली, तर राष्ट्रगीताने या ऐतिहासिक सोहळ्याची सांगता करण्यात आली. स्वातंत्र्यसैनिक, तरुण-तरुणी, सामाजिक कार्यकर्ते आणि विविध ढोल-लेझीम व संबळ पथकांच्या निनादात दुमदुमलेल्या या रॅलीने संपूर्ण शहर राष्ट्रभक्तीच्या रंगात न्हाऊन निघाल्याचे पाहायला मिळाले.

नवी दिल्ली: येथील महाराष्ट्र सदनात ‘हर घर तिरंगा’ अभियानाला अत्यंत उत्साहात  आणि देशभक्तीपूर्ण वातावरणात सुरुवात झाली. देशाच्या स्वातंत्र्याचा अमृत महोत्सव आणि राष्ट्रध्वजाप्रती आदर व्यक्त करण्यासाठी महाराष्ट्र सदन परिसरात काढण्यात आलेल्या तिरंगा रॅलीने संपूर्ण परिसर तिरंगामय झाला होता. महाराष्ट्र सदनच्या नवी दिल्लीतील निवासी आयुक्त तथा सचिव डॉ. श्वेता सिंघल यांच्या प्रमुख उपस्थितीत या रॅलीचा शुभारंभ करण्यात आला.

        या रॅलीत महाराष्ट्र परिचय केंद्राचे संचालक हेमराज बागुल, सहाय्यक निवासी आयुक्त नितीन शेंडे, सहायक लेखा अधिकारी निलेश केदारे, महाराष्ट्र सदनाचे व्यवस्थापक प्रमोद कोलपते आणि सुरक्षा अधिकारी अनिल चोरगे यांच्यासह विविध विभागांचे अधिकारी, कर्मचारी आणि मोठ्या संख्येने नागरिक सहभागी झाले होते. हातात तिरंगा ध्वज घेऊन निघालेल्या या रॅलीमुळे संपूर्ण महाराष्ट्र सदन परिसर राष्ट्रभक्तीच्या घोषणांनी दुमदुमला होता. उपस्थितांनी यावेळी राष्ट्रध्वजाचा सन्मान करण्याचा संकल्प करत देशप्रेमाचा संदेश दिला.

          ‘हर घर तिरंगा’ या अभियानाचे महत्त्व सांगताना प्रशासनाकडून नागरिकांना आवाहन करण्यात आले की, त्यांनी या उपक्रमात उत्स्फूर्तपणे सहभागी होऊन आपल्या घरावर तिरंगा फडकवावा आणि देशाचा स्वातंत्र्यदिन मोठ्या उत्साहात साजरा करावा. राष्ट्रध्वजा बद्दल असलेली आदर आणि अभिमानाची भावना अधिक वृद्धिंगत करण्यासाठी हे अभियान महत्त्वपूर्ण असल्याचे मत यावेळी व्यक्त करण्यात आले. या रॅलीच्या माध्यमातून दिल्लीत असलेल्या महाराष्ट्र सदनाने देशप्रेमाचा एक आगळावेगळा आविष्कार सादर केला असून, या उपक्रमामुळे उपस्थित सर्वांमध्ये देशभक्तीची नवी ऊर्जा संचारली आहे.