भंडारा: भंडारा जिल्ह्यात एक अनुकूल आणि उद्योगस्नेही वातावरण निर्माण करून औद्योगिक गुंतवणुकीला मोठी चालना देण्यासाठी प्रशासनाने तातडीने पावले उचलण्याचे निर्देश उद्योगमंत्री डॉ. उदय सामंत यांनी दिले आहेत. जिल्हाधिकारी कार्यालयातील परिषद कक्षात आयोजित उद्योग विभाग, महाराष्ट्र औद्योगिक विकास महामंडळ (MIDC) आणि खादी व ग्रामोद्योग विभागाच्या उच्चस्तरीय आढावा बैठकीत ते बोलत होते. जिल्ह्यात प्रलंबित असलेले भूखंड आणि विविध कल्याणकारी योजनांच्या अंमलबजावणीचा यावेळी सविस्तर आढावा घेण्यात आला.

        बैठकीत भंडारा जिल्ह्यातील औद्योगिक क्षेत्राच्या सद्यस्थितीवर सखोल चर्चा करण्यात आली. जिल्ह्यात एकूण ७ औद्योगिक क्षेत्रे असून, त्याअंतर्गत १५७ विकसित भूखंड आहेत. यापैकी १३७ भूखंडांचे आतापर्यंत वाटप करण्यात आले असले, तरी त्यातील १९ औद्योगिक घटक सध्या बंद अवस्थेत आहेत आणि ३४ भूखंडांची मुदत संपलेली आहे. सध्या प्रत्यक्षात २० भूखंड वाटपा साठी उपलब्ध आहेत. हे सर्व भूखंड कायदेशीर प्रक्रिया पूर्ण करून प्राधान्याने नवीन उद्योजकांना उपलब्ध करून द्यावेत, जेणेकरून जिल्ह्यातील औद्योगिक व आर्थिक विकासाला गती मिळेल, असे स्पष्ट निर्देश डॉ. सामंत यांनी दिले. तसेच उद्योजकांना व्यवसाय सुरू करण्यासाठी लागणाऱ्या विविध परवानग्या आणि पायाभूत सुविधा संबंधित विभागांनी समन्वयाने विहित कालावधीत पूर्ण कराव्यात, अशी सूचनाही त्यांनी केली.

         या बैठकीत केंद्र शासनाच्या महत्त्वाकांक्षी ‘पीएम विश्वकर्मा योजने’ च्या अंमलबजावणीचा आढावा घेण्यात आला. अग्रणी बँकेचे व्यवस्थापक अण्णा ठाकरे यांनी दिलेल्या माहिती नुसार, जिल्ह्यात आतापर्यंत तब्बल ८० हजार ६६४ पारंपरिक कारागिरांची नोंदणी झाली आहे. त्यापैकी १६ हजार २६६ कारागिरांनी आपले प्रशिक्षण यशस्वी रीत्या पूर्ण केले असून, २ हजार ९६० लाभार्थ्यांना उद्योग सुरू करण्यासाठी नियमा नुसार कर्जवाटप देखील करण्यात आले आहे. याशिवाय, साकोली तालुक्यातील पिटेझरी येथे विकसित होत असलेल्या ‘मधाचे गाव’ (Honey Village) या नाविन्यपूर्ण प्रकल्पातील मधकेंद्र योजनेच्या प्रगतीचीही सविस्तर माहिती घेण्यात आली. ग्रामीण भागातील रोजगार निर्मिती साठी हा प्रकल्प अत्यंत महत्त्वाचा ठरणार आहे.

         या महत्त्वपूर्ण बैठकीस खासदार डॉ. प्रशांत पडोळे, आमदार नरेंद्र भोंडेकर, जिल्हाधिकारी सावनकुमार, जिल्हा उद्योग केंद्राचे सहायक आयुक्त हेमंत बदर, एमआयडीसीचे विभागीय व्यवस्थापक विवेक पोटे, विक्रीकर विभागाच्या सहायक आयुक्त उज्वला बनाईत, खादी व ग्रामोद्योग विभागाचे अधिकारी तसेच विविध औद्योगिक संघटनांचे पदाधिकारी प्रत्यक्ष उपस्थित होते. याशिवाय, उद्योग विभागाचे प्रधान सचिव पी. अंबलगम यांच्यासह संबंधित वरिष्ठ अधिकारी दूरदृश्य प्रणालीद्वारे (ऑनलाइन) या बैठकीस जोडले गेले होते. या सर्व निर्णयांच्या प्रभावी अंमलबजावणीमुळे भंडारा जिल्ह्यातील औद्योगिक क्षेत्राला आणि स्थानिक युवकांसाठी रोजगाराच्या नवीन संधींना मोठे प्रोत्साहन मिळणार आहे.

नागपूर: भंडारा जिल्ह्यातील ४१ शाळकरी विद्यार्थ्यांनी भारतीय अंतराळ संशोधन संस्था (ISRO) येथील विशेष अभ्यास दौरा अत्यंत यशस्वीरीत्या पूर्ण केला आहे. हा दौरा आटोपून नागपूर विमानतळावर परतलेल्या या तरुण विद्यार्थ्यांचे भंडारा जिल्ह्याचे पालकमंत्री डॉ. पंकज भोयर यांनी विमानतळावर पुष्पगुच्छ देऊन आणि अत्यंत उत्साहात स्वागत केले. या प्रसंगी विद्यार्थ्यांच्या चेहऱ्यावर इस्रो भेटीचा आनंद स्पष्टपणे झकत होता.

      या स्वागत सोहळ्याला जिल्हाधिकारी सावन कुमार, शिक्षण उपसंचालक माधुरी सावरकर, भंडारा डायटचे प्राचार्य राजेंद्र रुद्रकार तसेच शिवलिंग पडवे यांच्यासह विविध विभागांचे वरिष्ठ अधिकारी उपस्थित होते. विमानतळावर पोहोचल्यानंतर पालकमंत्री डॉ. पंकज भोयर यांनी सर्व विद्यार्थ्यांची आस्थेने चौकशी केली आणि इस्रो भेटी दरम्यान त्यांना आलेले अनुभव सविस्तरपणे जाणून घेतले. विद्यार्थ्यांमधील विज्ञान आणि संशोधनाची आवड पाहून पालकमंत्र्यांनी त्यांचे विशेष कौतुक केले.

     अभ्यासदौऱ्या दरम्यान विद्यार्थ्यांना इस्रोच्या संशोधन केंद्राला प्रत्यक्ष भेट देण्याची सुवर्णसंधी मिळाली होती. अंतराळ संशोधन, उपग्रह तंत्रज्ञान, अवकाश विज्ञान आणि भारतीय अंतराळ कार्यक्रमाचे विविध पैलू विद्यार्थ्यांनी अतिशय जवळून अनुभवले. इस्रोमधील वैज्ञानिक व तांत्रिक कार्यपद्धती प्रत्यक्ष समजून घेतल्यामुळे आपल्या ज्ञानात मोठी भर पडल्याची भावना विद्यार्थ्यांनी पालकमंत्र्यांसमोर व्यक्त केली. या अभ्यासामुळे विद्यार्थ्यांमध्ये वैज्ञानिक दृष्टिकोन रुजण्यास मदत झाली असून, भविष्यात विज्ञान आणि तंत्रज्ञान क्षेत्रात करिअर करण्यासाठी त्यांना मोठी प्रेरणा मिळाली आहे.

       विद्यार्थ्यांशी संवाद साधताना पालकमंत्री डॉ. पंकज भोयर म्हणाले की, अशा प्रकारच्या शैक्षणिक अभ्यास दौर्यांमुळे विद्यार्थ्यांच्या ज्ञानात भर पडण्या सोबतच त्यांच्यातील उपजत संशोधक वृत्तीला योग्य दिशा मिळते. विद्यार्थ्यांनी या दौऱ्यातून मिळालेल्या अमूल्य अनुभवाचा उपयोग आपल्या पुढील शैक्षणिक प्रवासात करावा आणि देशाच्या वैज्ञानिक प्रगतीत आपले महत्त्वपूर्ण योगदान द्यावे, अशी अपेक्षा व्यक्त करत त्यांनी सर्व विद्यार्थ्यांना उज्ज्वल भविष्यासाठी मनःपूर्वक शुभेच्छा दिल्या.