मुंबई: सीओईपी तंत्रज्ञान विद्यापीठात प्रवेश घेऊ इच्छिणाऱ्या हजारो विद्यार्थी आणि पालकांसाठी एक अत्यंत दिलासादायक आणि महत्त्वाची बातमी समोर आली आहे. उच्च व तंत्र शिक्षणमंत्री चंद्रकांतदादा पाटील यांच्या निर्देशानुसार विद्यापीठ प्रशासनाने शुल्क रचनेत सुधारणा करण्याचा निर्णय घेतला आहे. या सुधारीत शुल्क रचनेमुळे विविध मागास प्रवर्गातील विद्यार्थ्यांना तसेच विद्यार्थिनींना शासनाकडून मिळणाऱ्या शिक्षण शुल्क परताव्याचा (फ्रीशिप व स्कॉलरशिप) जास्तीत जास्त आर्थिक लाभ मिळण्याचा मार्ग मोकळा झाला आहे.

     शैक्षणिक वर्ष २०२६-२७ पासून प्रवेश घेणाऱ्या विद्यार्थ्यांसाठी विद्यापीठाने जाहीर केलेल्या नव्या शुल्क रचनेबाबत विद्यार्थी व विविध स्तरांतून निवेदने प्राप्त झाली होती. सामान्य आणि मध्यमवर्गीय विद्यार्थ्यांच्या या मागण्यांमागील संवेदन शीलता लक्षात घेऊन उच्च व तंत्र  शिक्षणमंत्री चंद्रकांत दादा पाटील यांनी तातडीने पावले उचलली. त्यांच्या दालनात अपर सचिव श्री. रेड्डी आणि इतर वरिष्ठ पदाधिकाऱ्यांच्या उपस्थितीत नुकतीच एक उच्चस्तरीय बैठक पार पडली. या बैठकीत सविस्तर चर्चा झाल्यानंतर, विद्यार्थ्यांच्या हिताचा विचार करून जाहीर केलेल्या सर्व शुल्क रचनेची फेररचना करण्याचे स्पष्ट निर्देश मंत्री महोदयांनी दिले.

     विद्यार्थ्यांना शिक्षण शुल्काच्या परताव्याचा अधिकाधिक लाभ मिळवून देणे हा या फेर रचनेचा मुख्य उद्देश आहे. त्यानुसार, शुल्क नियामक प्राधिकरणाच्या (FRA) मार्गदर्शक तत्त्वांनुसार प्रथम वर्षाच्या विद्यार्थ्यांसाठी ही सुधारीत रचना तयार करण्याचे मार्गदर्शित करण्यात आले आहे. या नव्या नियमांनुसार, शुल्क रचनेतील ‘इतर शुल्क’ (Other Fee) हे थेट ‘शिक्षण शुल्कात’ (Tuition fees) समाविष्ट करण्याचे निर्देश विद्यापीठ प्रशासनाला देण्यात आले आहेत.

कोणत्या प्रवर्गातील विद्यार्थ्यांना होणार फायदा

या महत्त्वपूर्ण निर्णयामुळे प्रामुख्याने इतर मागासवर्गीय (OBC), विमुक्त जाती व भटक्या जमाती (VJ/NT), आर्थिकदृष्ट्या दुर्बल घटक (EWS), तसेच सामाजिक व शैक्षणिक दृष्ट्या मागास प्रवर्ग (SEBC) प्रवर्गातील विद्यार्थी आणि सर्व विद्यार्थिनींना मोठा दिलासा मिळणार आहे. या घटकांना शासनाकडून मिळणाऱ्या शिक्षण शुल्काच्या परताव्याचा लाभ आता अधिक प्रभावीपणे घेता येईल. विद्यार्थ्यांच्या हिताच्या दृष्टीने हा अत्यंत सकारात्मक निर्णय घेतल्या बद्दल सीओईपी तंत्रज्ञान विद्यापीठाच्या प्रशासनाने राज्य शासनाचे आणि मंत्री चंद्रकांतदादा पाटील यांचे विशेष आभार मानले आहेत.

पुणे: भारताच्या आर्थिक वाढीत आणि राष्ट्रीय विकासात अर्थपूर्ण योगदान देतील अशा तंत्र उद्योजकांची आणि नवोन्मेषकांच्या नवीन पिढीला घडवणारी अग्रगण्य संस्था म्हणून सीओईपी तंत्रज्ञान विद्यापीठाने नावलौकिक मिळवला आहे. अभियंत्यांनी केवळ पारंपारिक रोजगार शोधण्याऐवजी इतरांसाठी संधी आणि नोकऱ्या निर्माण करतील अशी तंत्रज्ञान निर्मिती, उद्योग आणि संस्था स्थापन कराव्यात, असे प्रेरणादायी आवाहन महाराष्ट्राचे राज्यपाल तथा विद्यापीठांचे कुलपती जिष्णु देव वर्मा यांनी केले. सीओईपी तंत्रज्ञान विद्यापीठाच्या दीक्षान्त समारंभात ते प्रमुख पाहुणे म्हणून बोलत होते.

        या दिमाखदार सोहळ्यास उच्च व तंत्र शिक्षण मंत्री चंद्रकांतदादा पाटील, विद्यापीठाचे नियामक मंडळाचे अध्यक्ष विनायक पै, कुलगुरू प्रा. सुनील भिरुड, राज्यपालांचे सचिव डॉ. प्रशांत नारनवरे, कुलसचिव डॉ. दयाराम सोनवणे, तसेच परीक्षा व मूल्यमापन मंडळाच्या संचालक डॉ. यशोधरा हरिभक्त यांच्यासह अनेक मान्यवर, प्राध्यापक आणि पदवीधारक विद्यार्थी मोठ्या संख्येने उपस्थित होते.

        सीओईपी हा जवळपास दोन शतकांचा समृद्ध वारसा लाभलेली संस्था असून तिने देशाचे भविष्य घडवण्यात मोलाचे योगदान दिले आहे, असे गौरवोद्गार राज्यपाल जिष्णु देव वर्मा यांनी काढले. संस्थेने केवळ एक तांत्रिक शिक्षण संस्था न राहता विचार, नवोपक्रम आणि जागतिक पातळीवरील समस्या सोडवण्याचे केंद्र बनले पाहिजे. स्वच्छ ऊर्जा, जल सुरक्षा, शाश्वत गतिशीलता, प्रगत उत्पादन, कृत्रिम बुद्धिमत्ता (एआय), सेमीकंडक्टर्स आणि हवामान बदल यांसारख्या क्षेत्रातील आव्हानांकडे केवळ समस्या म्हणून न पाहता परिवर्तनात्मक उपायांच्या संधी म्हणून पाहिले पाहिजे, असे त्यांनी स्पष्ट केले. तसेच, माजी विद्यार्थ्यांचे बौद्धिक भांडवल विद्यापीठाच्या प्रयोगशाळा आणि स्टार्टअप परिसंस्थेशी जोडल्यास एक मजबूत नवोपक्रमाचे चक्र तयार होईल, असेही त्यांनी नमूद केले.

विद्यार्थिनींसाठी ४०० क्षमतेचे नवीन वसतिगृह आणि आर्थिक मदतीची घोषणा

कार्यक्रमात बोलताना उच्च व तंत्रशिक्षण मंत्री चंद्रकांतदादा पाटील यांनी विद्यापीठाच्या विकासासाठी आणि विद्यार्थ्यांच्या सोयीसाठी अनेक महत्त्वपूर्ण घोषणा केल्या. सीओईपीच्या कॅम्पसमध्ये मुलींसाठी वसतिगृहाची कमतरता लक्षात घेता, ४०० विद्यार्थिनी क्षमतेचे अत्याधुनिक वसतिगृह शासकीय निधी आणि सीएसआरच्या माध्यमातून तातडीने उभारण्यात येईल, अशी घोषणा त्यांनी केली. तसेच ग्रामीण भागातील ज्या विद्यार्थिनींना वसतिगृह भरणे अडचणीचे आहे, अशा १० विद्यार्थिनींना दरमहा १० हजार रुपयांप्रमाणे १० महिन्यांसाठी १ लाख रुपयांची आर्थिक मदत दिली जाईल. याशिवाय ‘कमवा आणि शिका’ योजने अंतर्गत ५० विद्यार्थ्यांना दरमहा २ हजार रुपये देण्याची घोषणाही त्यांनी केली.

        गेल्या दोन वर्षांत राज्य शासनाने ८ लाखांपेक्षा कमी उत्पन्न असलेल्या सर्व मुलींचे शिक्षण व परीक्षा शुल्क माफ केल्यामुळे उच्च शिक्षणातील मुलींचे प्रमाण झपाट्याने वाढले असून, यावर्षी मुलींची संख्या मुलांपेक्षाही अधिक होण्याची शक्यता असल्याचे त्यांनी सांगितले. सीओईपीने आयआयटीच्या दर्जाचे संशोधन करून विद्यार्थी संख्या १० हजारावर नेण्याचे ध्येय ठेवावे, असे आवाहन त्यांनी केले.

पदवीप्रदान सोहळ्यात विद्यार्थ्यांचा गौरव

       विद्यापीठाचे नियामक मंडळाचे अध्यक्ष विनायक पै यांनी मनोगतात सांगितले की, भारत आता 'उत्पादन-केंद्रित राष्ट्र' बनण्याच्या दिशेने वाटचाल करत असून, चिखली येथील नवीन संशोधन संकुल महाराष्ट्रातील सर्वोत्तम संशोधन केंद्रांपैकी एक ठरेल. कुलगुरू प्रा. सुनील भिरुड यांनी विद्यापीठाच्या प्रगतीचा अहवाल सादर करताना सांगितले की, या दीक्षान्त समारंभात पदवीच्या ८८९ आणि पदव्युत्तर पदवीच्या ५८२ विद्यार्थ्यांना अधिकृतपणे पदव्या प्रदान करण्यात आल्या आहेत. तसेच विविध शाखांमध्ये उत्कृष्ट यश संपादन करणाऱ्या गुणवंत विद्यार्थ्यांना सुवर्णपदके व प्रमाणपत्रे देऊन गौरविण्यात आले.