ठाणे: मराठी भाषा ही कोणतीही सक्ती नसून ती भक्तीची भाषा आहे. अमराठी बांधवांनी स्वेच्छेने मराठी भाषा स्वीकारणे ही महाराष्ट्राच्या सांस्कृतिक एकात्मतेची खरी ताकद आणि मोठे वैशिष्ट्य असल्याचे प्रतिपादन उपमुख्यमंत्री एकनाथ शिंदे यांनी ठाणे येथे केले. परिवहन विभाग, राज्य मराठी विकास संस्था, मुंबई मराठी साहित्य संघ आणि कोकण मराठी साहित्य परिषद यांच्या संयुक्त विद्यमाने आयोजित ‘हिंदुहृदय सम्राट बाळासाहेब ठाकरे मराठी भाषा पाठ्यक्रम अभियान’ या विशेष उपक्रमाच्या सांगता समारंभात ते प्रमुख पाहुणे म्हणून बोलत होते.

      या कार्यक्रमात बोलताना उपमुख्यमंत्री शिंदे म्हणाले की, हा केवळ एका अभियानाचा समारोप नसून मराठीच्या अभिमानाची एक धडाकेबाज सुरुवात आहे. "महाराष्ट्र माझा, मराठी माझी संवाद भाषा" हा महाराष्ट्राचा खरा जयघोष असून, मराठी भाषेची भक्ती ही संपूर्ण महाराष्ट्राला एकत्र जोडणारी मोठी शक्ती आहे. तब्बल १०५ दिवस चाललेल्या या स्तुत्य अभियानातून तब्बल १ लाख २५ हजार रिक्षा आणि टॅक्सी चालकांनी मराठी भाषा शिकून परीक्षा यशस्वीरीत्या उत्तीर्ण केली असून, या सर्व चालकांना समारंभात प्रमाणपत्रे प्रदान करण्यात आली. ‘लाभले आम्हास सौभाग्य बोलतो मराठी...’ या ओळींचा धागा पकडत त्यांनी मराठी ही आपली अस्मिता, स्वाभिमान आणि मायबोली असल्याचे सांगितले. कायद्याचा बडगा उगारण्या ऐवजी प्रेमाने आणि आपुलकीने भाषा शिकवण्याचा मार्ग परिवहन मंत्री प्रताप सरनाईक यांनी स्वीकारल्याचे कौतुक करत, "कायद्याने नव्हे तर प्रेमाने भाषा शिकता येते," असे गौरवोद्गार त्यांनी काढले. तसेच, मराठी शिकणाऱ्यांची टिंगल न करता त्यांच्याशी नेहमी मराठीतच संवाद साधावा, असे आवाहनही त्यांनी उपस्थितांना केले.

        यावेळी बोलताना त्यांनी दिवंगत शिवसेना प्रमुख हिंदुहृदय सम्राट बाळासाहेब ठाकरे यांच्या मराठी स्वाभिमानाच्या विचारांचे स्मरण केले. तसेच राज्य शासनाकडून मराठी भाषेला अभिजात भाषेचा दर्जा मिळवून देणे, लाडकी बहीण योजना, मुलींसाठी उच्च शिक्षणात सवलत, महिलांना एसटी बस प्रवासात ५० टक्के सूट, लेक लाडकी योजना आणि सरकारी कागद पत्रांमध्ये आईचे नाव अधिकृतपणे नोंदविण्याची मुभा देणारे ऐतिहासिक निर्णय घेण्यात आल्याची माहिती त्यांनी दिली. रिक्षा-टॅक्सी चालकांसाठी स्थापन करण्यात आलेल्या ‘धर्मवीर आनंद दिघे महामंडळा’चा सध्याचा ५० कोटी रुपयांचा निधी भविष्यात वाढवून १,००० कोटींपर्यंत नेण्याचा महत्त्वाकांक्षी संकल्पही त्यांनी यावेळी जाहीर केला. महाराष्ट्र आज उद्योग, स्टार्टअप, जीडीपी आणि परदेशी गुंतवणुकीत देशात अव्वल स्थानी असून दावोस परिषदेतही राज्यासाठी ३ ते ४ लाख कोटी रुपयांचे विक्रमी सामंजस्य करार झाल्याचे त्यांनी आवर्जून सांगितले.

      या दिमाखदार सांगता सोहळ्याला उद्योग मंत्री उदय सामंत, परिवहन मंत्री प्रताप सरनाईक, खासदार नरेश म्हस्के, आमदार रवींद्र फाटक, प्रसिद्ध साहित्यिक पद्मश्री मधु मंगेश कर्णिक, मराठी भाषा सचिव किरण कुलकर्णी, परिवहन आयुक्त राजेश नार्वेकर, अप्पर परिवहन आयुक्त रवी गायकवाड, अभियान समन्वयक सल्लागार डॉ. ज्योती ठाकरे यांच्यासह अनेक मान्यवर अधिकारी, विविध पदाधिकारी आणि मोठ्या संख्येने रिक्षा-टॅक्सी चालक बंधू-भगिनी उपस्थित होते. "मायबोलीची भक्ती आणि मराठीचा सन्मान हीच आपल्या महाराष्ट्राची खरी शक्ती आहे," असा संदेश यावेळी देण्यात आला.

ठाणे: प्रशासकीय अधिकाऱ्यांच्या क्रीडा, आरोग्य आणि परस्पर संवादाला एक नवी व सकारात्मक दिशा देणाऱ्या ठाण्यातील तब्बल १०० वर्षे जुन्या ऐतिहासिक ‘ऑफिसर्स क्लब’चे नुकतेच पुनरुज्जीवन करण्यात आले आहे. या नव्या आणि अत्याधुनिक स्वरूपातील क्लबचे उद्घाटन राज्याचे उपमुख्यमंत्री एकनाथ शिंदे यांच्या हस्ते देशाच्या ८० व्या स्वातंत्र्यदिनाचे औचित्य साधून अत्यंत उत्साहात संपन्न झाले. एका शतकाचा गौरवशाली वारसा जपत या वास्तूला आधुनिकतेची जोड दिल्यामुळे ठाण्यातील अधिकारी वर्गामध्ये प्रचंड आनंद आणि उत्साहाचे वातावरण पाहायला मिळत आहे.

       प्रशासकीय कामकाजाच्या धबडग्यात आणि व्यस्त दिनक्रमातून अधिकाऱ्यांना मानसिक व शारीरिक विरंगुळा मिळावा, त्यांचे आरोग्य उत्तम राहावे तसेच अधिकाऱ्यांमधील परस्पर सौहार्द आणि संवाद वाढीस लागावा, या प्रमुख उद्देशाने या ऐतिहासिक वास्तूचा संपूर्ण कायापालट करण्यात आला आहे. जुन्या वास्तूचे पावित्र्य आणि ऐतिहासिक सौंदर्य कायम राखत यामध्ये अनेक आधुनिक सुविधांची भर घालण्यात आली आहे. या नूतनी करण केलेल्या क्लबमध्ये आता अत्याधुनिक बॅडमिंटन कोर्ट, टेबल टेनिस, बिलियर्ड्स टेबल, सुसज्ज व्यायाम शाळा (जिम) आणि उच्च दर्जाचा आकर्षक कॅफेटेरिया अशा विविध सुविधा उपलब्ध करून देण्यात आल्या आहेत. या सर्व सुविधांमुळे अधिकाऱ्यांना कामाच्या ताणातून बाहेर पडून तंदुरुस्त राहण्यासाठी हक्काचे ठिकाण उपलब्ध झाले आहे.

        या ऐतिहासिक क्लबचा सर्व अधिकाऱ्यांनी अधिकाधिक सक्रिय वापर करून या परिसरास आरोग्य, क्रीडा आणि संवादाचे एक चैतन्यमय केंद्र बनवावे, असे आवाहन ठाण्याचे जिल्हाधिकारी तथा ऑफिसर्स क्लबचे अध्यक्ष डॉ. श्रीकृष्ण पांचाळ यांनी या वेळी केले. शंभर वर्षांचा जुना वारसा जतन करत वास्तूचे नूतनीकरण करणे हे प्रशासकीय दृष्ट्या अतिशय आव्हानात्मक काम होते. मात्र, सार्वजनिक बांधकाम विभाग (पीडब्ल्यूडी) आणि क्रीडा विभागाच्या सर्व अधिकारी-कर्मचाऱ्यांनी घेतलेले विशेष परिश्रम आणि वेळेत काम पूर्ण करण्याची त्यांची जिद्द यामुळे हे शिवधनुष्य यशस्वीपणे पेलले गेले. याप्रकरणी संबंधित सर्व अधिकारी व कर्मचाऱ्यांचे जिल्हा प्रशासन आणि उपस्थित मान्यवरांकडून विशेष कौतुक करण्यात आले असून, या नव्या वास्तूमुळे प्रशासकीय अधिकारी वर्गाला उत्तम आरोग्या सोबतच एकत्र येण्यासाठी एक दर्जेदार व अत्याधुनिक व्यासपीठ लाभले आहे.