पुणे: पुणे शहरातील कोथ्रुड परिसरात एका अत्यंत क्षुल्लक कारणावरून घडलेल्या खुनाच्या थरारक घटनेने संपूर्ण परिसरात मोठी खळबळ उडाली आहे. आपण एकाच वस्तीत राहत असताना विरोधकांचे व्हॉट्सअप स्टेटस का ठेवले, या किरकोळ कारणावरून दोन अल्पवयीन मुलांनी एका १७ वर्षीय युवकाच्या डोक्यात हातोडीने निर्दयीपणे वार करून त्याचा निर्घृण खून केल्याची धक्कादायक माहिती समोर आली आहे. कोथ्रुड पोलिसांनी तातडीची कारवाई करत दोन्ही अल्पवयीन आरोपींना ताब्यात घेतले आहे.

         नील विजय नाईक (वय १७, रा. श्रावणधारा, कोथ्रुड) असे खून झालेल्या दुर्दैवी तरूण मुलाचे नाव आहे. प्राप्त माहिती नुसार, मंगळवारी सकाळी नेहमी प्रमाणे एआरएआय (ARAI) टेकडीवर फिरण्यासाठी गेलेल्या नागरिकांना जंगलात एका युवकाचा रक्ताच्या थारोळ्यात पडलेला मृतदेह निदर्शनास आला. डोक्यात गंभीर दुखापत झाल्याचे स्पष्ट दिसल्याने नागरिकांनी तातडीने याबाबत कोथरूड पोलिसांना माहिती दिली. पोलिसांनी घटनास्थळी धाव घेत पंचनामा केला आणि मृताची ओळख पटवली असता तो नील विजय नाईक असल्याचे निष्पन्न झाले.

       पोलिसांच्या प्राथमिक तपासात उघड झालेल्या माहितीनुसार, मृत नील नाईक आणि आरोपी असणारे दोघेही अल्पवयीन मुलगे एकाच परिसतात राहणारे आहेत. यापूर्वी आरोपींचा व अन्य काही मुलांसोबत वाद झाला होता आणि त्या वादातील ती मुले सध्या कारागृहात आहेत. नील नाईक याची त्या मुलांसोबत ओळख असल्यामुळे त्याने त्यांच्यापैकी एकाचे फोटो किंवा माहिती आपल्या मोबाईलच्या व्हॉट्सअपवर स्टेटस म्हणून ठेवली होती. हीच गोष्ट आरोपींच्या जिव्हारी लागली. "आपण एकाच वस्तीत राहणारे असताना, ज्यांनी आम्हाला मारहाण केली आणि जे आता जेलमध्ये आहेत, त्यांचे स्टेटस तू का ठेवतोस?" असा जाब विचारत त्यांनी नीलसोबत वाद घातला.

      हा वाद सुरुवातीला मिटल्या सारखा भासवून आरोपींनी मंगळवारी रात्री नीलला विश्वासात घेतले आणि फिरण्याच्या बहाण्याने एआरएआय टेकडीवरील निर्जन जंगलात नेले. तिथे पूर्व नियोजित बेतात किंवा संतापाच्या भरात त्यांनी सोबत आणलेल्या हातोडीने नीलच्या डोक्यात सपासप वार केले. या भीषण हल्ल्यात गंभीर जखमी होऊन नीलचा जागीच मृत्यू झाला. घटनेची गांभीर्य लक्षात घेत कोथरूड  पोलीस ठाण्याचे वरिष्ठ पोलीस निरीक्षक अरुण घोडके यांच्या मार्गदर्शनाखाली पोलिसांनी वेगाने तपासाची चक्रे फिरवत दोन्ही अल्पवयीन आरोपींना अवघ्या काही तासांत ताब्यात घेतले. अल्पवयीन मुलांमध्ये वाढणारी हिंसक प्रवृत्ती आणि क्षुल्लक कारणावरून टोकाचे पाऊल उचलण्याच्या या प्रकारामुळे पालकांसह नागरिकांमध्ये चिंतेचे वातावरण निर्माण झाले आहे.

पुणे: पुणे महानगरपालिकेच्या (PMC) मुख्य सभेत कोथरूड विधानसभा मतदार संघातील प्रभाग क्रमांक ९ मधील प्रस्तावित विकास कामांचा निधी फेरविचार प्रस्ताव आणून रद्द करण्यात आल्याने राजकीय वर्तुळात खळबळ उडाली आहे. हा निर्णय पूर्णपणे राजकीय द्वेष आणि वैमनस्यातून घेण्यात आल्याचा गंभीर आरोप माजी नगरसेवक अमोल बालवडकर यांनी केला असून, यामुळे प्रभाग ९ मधील नागरिकांच्या मूलभूत सुविधांचा प्रश्न ऐरणीवर आला आहे. राजकीय संघर्षात सर्वसामान्य नागरिकांच्या विकासाला वेठीस धरू नये, अशा शब्दांत त्यांनी आपला संताप व्यक्त केला आहे.

          प्रभाग क्रमांक ९ मधील रस्ते, ड्रेनेज लाईन, उद्याने तसेच इतर महत्त्वाच्या नागरी सुविधांच्या विकासासाठी यापूर्वी हा निधी अधिकृतपणे मंजूर करण्यात आला होता. मात्र, राजकीय दबावाखाली महानगरपालिकेच्या पदाधिकाऱ्यांच्या माध्यमातून मुख्य सभेत फेरविचाराचा प्रस्ताव आणून हा निधी रद्द करण्यात आल्याचा दावा बालवडकर यांनी केला आहे. यापूर्वी प्रभागातील विकास कामांचे ‘विशेष लेखा परीक्षण’ (Special Audit) करण्याचा घाट घालण्यात आला होता, आणि आता थेट प्रत्यक्ष विकास कामांचा निधीच रद्द करण्यात आल्यामुळे हा प्रकार केवळ अमोल बालवडकरांच्या विरोधातील राजकीय खेळी नसून थेट प्रभाग ९ मधील  सर्वसामान्य नागरिकांच्या विकासावर परिणाम करणारा निर्णय आहे, असे बालवडकर यांनी म्हटले आहे.

       या निर्णयानंतर आक्रमक भूमिका घेत अमोल बालवडकर म्हणाले की, “माझ्याशी राजकीय मतभेद असतील तर त्यांनी राजकीय पातळीवर थेट लढा द्यावा, मात्र त्यासाठी प्रभाग ९ मधील जनतेच्या हक्काची विकासकामे रोखणे अत्यंत चुकीचे आहे.” रस्ते, ड्रेनेज आणि उद्यानांसारख्या मूलभूत सुविधा या कोणत्याही व्यक्तीच्या वैयक्तिक मालमत्ता नसून त्या सामान्य नागरिकांच्या हक्काच्या गरजा आहेत. “स्वतः काम करायचे नाही आणि दुसऱ्यालाही काम करू द्यायचे नाही,” अशी भूमिका घेतल्यामुळेच कोथरूडच्या नागरिकांवर अन्याय होत असल्याची टीका त्यांनी केली.

         तसेच, अशा राजकीय अडथळ्यांमुळे प्रभागाच्या विकासाची गती कोणत्याही परिस्थितीत मंदावणार नाही, असा विश्वास त्यांनी व्यक्त केला. स्व. अजितदादा पवार यांनी नेहमीच विकासाला सर्वोच्च प्राधान्य देण्याची शिकवण दिली आहे, त्यांचा हाच विचार पुढे नेत उपमुख्यमंत्री सुनेत्रा पवार आणि खासदार पार्थ पवार यांच्या मार्गदर्शनाखाली प्रभागातील विकासकामे यापुढेही अधिक जोमाने व ताकदीने सुरू ठेवणार असल्याचे त्यांनी स्पष्ट केले. महानगर पालिकेचा विकास निधी हा कोणत्याही विशिष्ट व्यक्तीचा नसून नागरिकांच्या कष्टाच्या करातून जमा झालेला निधी आहे, त्यामुळे हा रद्द करण्यात आलेला निर्णय तात्काळ मागे घेऊन सर्व नियोजित विकासकामे पूर्ववत सुरू करावीत, अशी आक्रमक मागणी अमोल बालवडकर यांनी प्रशासनाकडे केली आहे.