पुणे: पुणे महानगरपालिकेत विविध पदांवर नोकरी मिळवून देण्याचे आमिष दाखवून पाच बेरोजगार तरुणांची तब्बल ६७ लाख रुपयांची फसवणूक केल्याची गंभीर घटना समोर आली आहे. महापालिकेच्या शाळेतील एका निवृत्त मुख्याध्यापकासह एकूण पाच जणांनी संगनमत करून हा बोगस नोकरीचा गोरखधंदा चालवला होता. या प्रकरणी सिंहगड रोड पोलीस ठाण्यात गुन्हा दाखल करण्यात आला असून, यामुळे महापालिका वर्तुळात आणि शहरात मोठी खळबळ उडाली आहे.

       याप्रकरणी खडकवासला परिसरातील नांदोशी येथे राहणाऱ्या २३ वर्षीय तरुणाने सिंहगड रोड पोलीस ठाण्यात फिर्याद दिली आहे. त्यानुसार, संजय अनंता भालेराव (रा. कर्वेनगर - महापालिकेच्या शाळेतील निवृत्त मुख्याध्यापक), शिवानंद बाळासाहेब पाटील (रा. कर्वेनगर), अमित दारवटकर, आनंद लोंढणवार आणि अमित सुहास देशपांडे अशी गुन्हा दाखल करण्यात आलेल्या पाचही संशयित आरोपींची नावे आहेत.

       पोलिसांनी दिलेल्या सविस्तर माहिती नुसार, फिर्यादची दोन वर्षांपूर्वी संजय भालेराव यांच्याशी ओळख झाली होती. याच ओळखीचा फायदा घेत आरोपींनी फिर्यादी आणि त्यांच्या इतर सहकाऱ्यांना पुणे महानगरपालिकेत सेवक, हवालदार आणि पर्यवेक्षक (सुपरवायझर) यांसारख्या महत्त्वाच्या पदांवर नोकरी लावण्याचे प्रलोभन दाखवले. सरकारी नोकरीच्या आशेपोटी फसवणूक झालेल्या तरुणांकडून आरोपींनी वेगवेगळ्या टप्प्यांतून तब्बल ६७ लाख रुपये लाटले. तरुणांचा विश्वास संपादन करण्यासाठी आरोपींनी महापालिकेचे बनावट शिक्के आणि उच्च पदस्थ अधिकाऱ्यांच्या खोट्या सह्या असलेली वैद्यकीय तपासणीची (Medical Checkup) पत्रे दिली. या बोगस पत्रांच्या आधारे तरुणांची वैद्यकीय तपासणी करून त्यांना बोगस वैद्यकीय प्रमाणपत्रेही सोपवण्यात आली.

       फसवणुकीची ही मालिका इथेच थांबली नाही, तर आरोपींनी महापालिकेचे बनावट शिक्के व अधिकाऱ्यांच्या खोट्या सह्या असलेले नियुक्ती आदेश (Appointment Letters) आणि अधिकृत ओळखपत्रे देखील पीडित तरुणांच्या हातात टेकवली. मात्र, प्रत्यक्षात नोकरीत रुजू होण्यासाठी किंवा खात्री करण्यासाठी जेव्हा तरुणांनी महापालिकेत जाऊन चौकशी केली, तेव्हा त्यांच्या हाती लागलेले सर्व कागदपत्रे आणि आदेश बनावट असल्याचे उघड झाले. आपली फसवणूक झाल्याचे लक्षात आल्यानंतर तरुणांनी आरोपींकडे भरलेले पैसे परत मागितले; परंतु आरोपींनी पैसे देण्यास स्पष्ट टाळाटाळ केली.

        दरम्यान, गेल्या काही दिवसांत महापालिकेत नोकरीचे आमिष दाखवून फसवणूक केल्याच्या अनेक घटना उघडकीस आल्या आहेत. अखेर निराश झालेल्या तरुणाने न घाबरता सिंहगड रोड पोलीस ठाण्यात धाव घेऊन रीतसर फिर्याद नोंदवली. या प्रकरणाचे गांभीर्य लक्षात घेऊन सिंहगड रोड पोलिसांनी तात्काळ सर्व आरोपींविरुद्ध गुन्हा दाखल केला असून, सहायक पोलीस निरीक्षक भुपेश साळुंके या प्रकरणाचा अधिक सखोल तपास करत आहेत. बोगस नोकरीच्या रॅकेटमागे आणखी किती जणांचा सहभाग आहे, याचा शोध पोलिसांकडून घेतला जात आहे.

पुणे: महसूल, सार्वजनिक बांधकाम आणि राज्य उत्पादन शुल्क विभागासह विविध सरकारी खात्यांमध्ये उच्चपदावर नोकरी मिळवून देण्याचे मोठे आमिष दाखवून एका महिलेसह पाच तरुणांची तब्बल २४ लाख रुपयांची फसवणूक केल्याचा अत्यंत संताप जनक प्रकार पुणे शहरात उघडकीस आला आहे. आरोपींनी केवळ तोतयागिरी करून फसवणूक केली नाही, तर तरुणांचा विश्वास संपादन करण्यासाठी त्यांची थेट ससून रुग्णालयात मेडिकल तपासणी घडवून आणत बनावट नियुक्तीपत्रे दिली होती. याप्रकरणी पर्वती पोलिसांनी दोन मुख्य सूत्रधारांविरुद्ध कठोर गुन्हे दाखल केले आहेत.

         सूर्यकांत विठ्ठल सपकाळ (वय ४६, रा. सेवाधाम हॉस्पिटल शेजारी, तळेगाव दाभाडे) आणि योगेश अदिकराव पाटील (वय ४२, रा. कोल्हापूर) अशी गुन्हा दाखल करण्यात आलेल्या संशयित आरोपींची नावे आहेत. या प्रकरणी पर्वती पोलीस ठाण्यात एका पीडित महिलेने सविस्तर फिर्याद दिली आहे. पोलिसांकडून मिळालेल्या माहिती नुसार, फिर्यादी महिला पर्वती परिसरात राहून घरकाम करून आपला उदरनिर्वाह करते. सामाजिक कार्य करत असताना एप्रिल २०२० मध्ये तिची ओळख सूर्यकांत सपकाळ याच्याशी झाली. त्याने आपण महसूल खात्यात अधिकारी असून मंत्रालयात आपली उच्च स्तरावर ओळख असल्याचे सांगितले. तसेच महसूल, रेल्वे आणि इतर शासकीय विभागांमध्ये गरजवंतांना परमनंट नोकरी मिळवून देण्याचे सांगत त्याने पीडितेचा विश्वास संपादन केला.

       सुरुवातीला महसूल खात्यात शिपाई पदावर नोकरी लावण्याचे आमिष दाखवत त्याने ५ लाखांची मागणी केली. त्यानंतर ऑक्टोबर २०२२ मध्ये शिपाई पदासाठी २ लाख रुपये रोख आणि कागदपत्रे घरात येऊन घेतली. इतरा कडूनही अशाच प्रकारे प्रत्येकी २ लाख रुपये उकळण्यात आले. फसवणुकीचा हा बनाव अधिक खरा वाटावा म्हणून त्याने समाज कल्याण आयुक्तालय यांचे सही व शिक्का असलेले पत्र पाठवून या तरुणांची ससून रुग्णालयात वैद्यकीय तपासणी (मेडिकल) करून घेतली. सरकारी यंत्रणे मार्फत सर्व प्रक्रिया होत असल्याने तरुणांचा त्यावर पूर्णपणे विश्वास बसला. यानंतर आणखी काहींना उत्पादन शुल्क विभाग आणि सार्वजनिक बांधकाम विभागात ज्युनिअर इंजिनिअर व लिपिक पदावर नोकरीसाठी प्रत्येकी ७ लाखांची मागणी करत बनावट नियुक्तीपत्रे पाठवण्यात आली.

     फसवणूक करणारे कट रचत ८ एप्रिल २०२६ रोजी या सर्व तरुणांना कागदपत्रे व नियुक्तीपत्रे घेऊन जिल्हाधिकारी कार्यालयात बोलावले. तिथे योगेश पाटील हा व्यक्ती त्यांना भेटला आणि त्याने सर्व कागदपत्रे व पत्रे पुन्हा आपल्या ताब्यात घेत एका महिन्यात कामाची पूर्तता होईल, असे सांगून त्यांची बोळवण केली. त्यानंतर जेव्हा फिर्यादी आणि तरुणांनी नोकरी बाबत विचारणा सुरू केली, तेव्हा आरोपी उडवा उडवीची उत्तरे देऊ लागले. अखेर आपली फसवणूक झाल्याचे लक्षात आल्यानंतर त्यांनी भरलेले पैसे परत मागितले. त्यावेळी आरोपींनी दिलेला धनादेश बँकेत न जुमानता खात्यात पैसे नसल्याने बाऊन्स झाला. यानंतर पीडितेने तातडीने पर्वती पोलीस ठाण्यात धाव घेत तक्रार नोंदवली. पोलीस निरीक्षक अनिता हिवरकर या प्रकरणाचा अधिक सखोल तपास करत असून, या रॅकेटमध्ये आणखी कोणाचे हात आहेत का, याचा शोध घेतला जात आहे.