पुणे: पुण्यातील एका धातू व्यापाऱ्याची मोठी फसवणूक केल्याचा प्रकार उघडकीस आला आहे. टांझानियाहून कमी किमतीचे कच्चे तांबे देण्याचे आमिष दाखवून तब्बल 3 कोटींची फसवणूक करण्यात आली. या प्रकरणी खडक पोलिसांनी मुंबईतील मालाड पूर्व येथील एका रहिवाशाला अटक केली आहे. ही फसवणूकीची घटना डिसेंबर २०२३ ते ऑगस्ट २०२४ दरम्यान घडली. संशयित आरोपी हा अनेक दिवसांपासून बेपत्ता होता. पोलिसांच्या हाती लागलेल्या माहितीनुसार तो कोलकत्त्यात लपून राहत होता. याची माहिती लागताच पोलिसांनी आरोपीला 22 नोव्हेंबर रोजी ताब्यात घेतले. आरोपीचे नाव भूपेंद्र आहे, ज्याला संजय कुमार राघव असेही म्हणतात.
पोलिसांनी दिलेल्या माहितीनुसार, आरोपी भूपेंद्र हा मूळचा नोएडाचा रहिवासी असून त्याने एक फेक बिझनेस प्रोफाइल तयार केली होती. यामध्ये त्याने दुबईबाहेर काम करतो व मी विविध धातुंचा व्यवहार करतो असा दावा केला आहे. मिळालेल्या माहितीनुसार, तक्रारदार हा पुण्यातील रविवार पेठेतील रहिवासी आहे. तो तांब्याच्या भांड्याचे उत्पादन करतो. त्याने डिसेंबर २०२३ मध्ये परवडणाऱ्या तांब्याच्या पुरवठ्यासाठी ऑनलाइन डीलर शोधण्यास सुरुवात केली. तेव्हा तो राघवच्या कंपनीला भेटला. अधिकाऱ्यांनी सांगितले की राघवने त्याला खात्री पटवून दिली की त्याचे दुबईमध्ये एक कार्यालय आहे आणि टांझानियामध्ये एक उत्पादन सुविधा आहे जी मोठ्या प्रमाणात कच्च्या तांब्याचा पुरवठा करण्यास सक्षम आहे. यावर विश्वास बसावा म्हणुन राघवने त्याला टांझानियाला देखील नेले तेथे असलेला तांब्याचा साठा दाखवला व हे तांबे भारतात पाठवण्याचे आश्वासन दिले. यावर विश्वास ठेऊन व्यापाऱ्याने तब्बल 3.8 कोटी रुपये संबंधिताला दिले.व्यापाऱ्याचा विश्वास संपादन करून भूपेंद्रने त्याची फसवणूक केली. तांबे पाठवण्याचे आश्वासन देऊन निव्वळ पैसे घेऊन तांबे पाठवले नाही. या घटनेनंतर पिडीताने खडक पोलिसांकडे तक्रार केली. या घटनेचा पुढील तपास पोलीस करत आहेत.
