राज्यात अनेक ठिकाणी बिबट्याचा वावर वाढला असून लोकांमध्ये भीतीचे वातावरण पसरले आहे. पुणे विमानतळावर टॅक्सीवेजवळ पुन्हा एकदा बिबट्या दिसल्याची पुष्टी पुणे वन विभागाच्या अधिकाऱ्यांनी शनिवारी केली. सहाय्यक वनसंरक्षक मंगेश ताटे यांनी TOI ला सांगितले की, त्यांना काही दिवसांपूर्वी पुणे विमानतळ अधिकाऱ्यांकडून याबाबतचा संदेश मिळाला होता.
पुण्यातील अनेक भागात बिबट्याने हाहाकार मजवला आहे. अनेकांना यामुळे दुखापत झाली असून वन विभागाने सुरक्षेच्या दृष्टीने अनेक ठिकाणी जाळे व पिंजरे बसवले आहेत. बिबट्या कदाचित विमानतळावरील काही उघड्यांमधून आत घुसला असावा. लक्ष ठेवले जात आहे," असे अधिकाऱ्याने सांगितले.
हाती आलेल्या माहितीनुसार, वन अधिकाऱ्यांच्या मते, काही महिन्यांपूर्वी विमानतळावर दिसलेला तोच बिबट्या आहे, जो शुक्रवारी पहाटे १.३० वाजता टॅक्सीवेजवळ आणि त्यापूर्वी आणखी एकदा दिसला होता. यापूर्वी देखील लोहगाव भागात, वडगाव शिंदे परिसरात बिबट्या दिसला होता. त्याला पकडण्यासाठी विमानतळ क्षेत्राबाहेरील विविध ठिकाणी ट्रॅप कॅमेरे आणि पिंजरे बसवण्यात आले होते. रेसक्यू टीमच्या वरिष्ठ अधिकाऱ्यांनी सांगितले होते की, ऑगस्टच्या मध्यात विमानतळाच्या आत बिबट्या शेवटचा दिसला होता. तथापि, अलीकडेच लोहेगावमधील काही गावांनी दावा केला होता की त्यांना बिबट्या फिरताना दिसला होता आणि तेव्हापासून वन विभागाचे अधिकारी तपासणी करत आहेत.
