पुणेकरांनो लक्ष द्या! ३० जुलैला शहरातील अनेक भागांचा पाणीपुरवठा पूर्णपणे बंद

पुणे : पुणेकरांसाठीएक अत्यंत महत्त्वाची आणि उपयोगाची बातमी समोर आली आहे. पुणे महानगरपालिकेच्या वतीने शहराच्या विविध भागांना पाणीपुरवठा करणाऱ्या लष्कर जलशुद्धीकरण केंद्र आणि पंपिंग स्टेशन येथे विद्युत व यांत्रिकी विभागामार्फत विविध प्रकारची तातडीची व महत्त्वाची देखभाल-दुरुस्तीची कामे हाती घेण्यात आली आहेत. या नियोजित दुरुस्ती व देखभालीच्या कामांमुळे येत्या गुरुवारी, ३० जुलै रोजी या जलशुद्धीकरण केंद्राच्या अखत्यारीतील संपूर्ण परिसराचा पाणीपुरवठा दिवसभर पूर्णपणे बंद राहणार आहे. तसेच, दुरुस्तीच्या या कामानंतर दुसऱ्या दिवशी म्हणजेच शुक्रवारी, ३१ जुलै रोजी सकाळी उशिरा आणि अत्यंत कमी दाबाने पाणीपुरवठा होण्याची शक्यता वर्तवण्यात आली असून, पुणे महानगरपालिकेच्या पाणीपुरवठा विभागाचे मुख्य अभियंता नंदकिशोर जगताप यांनी याबाबतची सविस्तर माहिती देत नागरिकांनी पाण्याचा योग्य साठा करून सहकार्य करावे, असे आवाहन केले आहे.

या दुरुस्ती आणि शटडाऊनमुळे पुणे शहरातील नेमक्या कोणत्या भागांचा पाणीपुरवठा विस्कळीत होणार आहे, याची सविस्तर यादी प्रशासनाकडून जाहीर करण्यात आली आहे:

• रामटेकडी टाकी परिसर: काळेपडळ, गाडीतळ, गोंधळेनगर, सातववाडी, हडपसर गावठाण अंशतः, महंमदवाडी गावठाण, वाडकर मळा, कृष्णानगर, राजीव गांधीनगर, रामटेकडी एसआरपीएफ, वैदूवाडी, भीमनगर, ससाणेनगर, मुंढवा, मगरपट्टा सिटी, केशवनगर आणि हांडेवाडी रोड इत्यादी परिसर.
• वानवडी व बकरी हिल टाकी परिसर: वानवडी गावठाण, कोंढवा गावठाण, शिवनेरीनगर, मिठानगर, कौसरबाग, साळुंखे विहार, एनआयबीएम रोड, उंड्री रोड, आझादनगर, केदारीनगर, शिंदे छत्री परिसर, संविधान चौक ते गंगा सॅटेलाइट चौक इत्यादी परिसर.
• हाय सर्व्हिस, सेंट्रल कॅम्प व रेसकोर्स टाकी परिसर: बी. टी. कवडे रोड, घोरपडी अंशतः, भारत फोर्ज परिसर, सेंट पॅट्रिक टाउन, संपूर्ण पुणे कँटोन्मेंट, कॅम्प परिसर, कमांड हॉस्पिटल, ईस्ट स्ट्रीट, पासपोर्ट कार्यालय परिसर आणि कोरेगाव पार्क ब्रिज इत्यादी परिसर.
• ठाकरसी टाकी परिसर: येरवडा गावठाण, इराणी मार्केट, गुंजन, साळवे भाजी मार्केट, गवळीवाडा, जिजामातानगर, मदर तेरेसानगर, कल्याणीनगर, संगमवाडी, शास्त्रीनगर आणि नगर रस्ता परिसर.
• लष्कर ते खराडी पंपिंग क्लोजर परिसर: खराडी गावठाण, ईऑन आयटी पार्क परिसर, चौधरी वस्ती, सातव वस्ती, चंदननगर, सुनीतानगर, सोमनाथनगर, गणेशनगर, आनंद पार्क, महावीरनगर आणि मुन्नुरवार सोसायटी इत्यादी परिसर.