एचसीएमटीआर २०२८ पर्यंत पूर्ण; फडणवीसांचे कडक आदेश

पुणे:पुण्यातील वाहतूक कोंडीची समस्या सोडवण्यासाठी आणि शहराच्या विकासाला नवी गती देण्यासाठी अत्यंत महत्त्वाच्या मानल्या जाणाऱ्या उच्च क्षमता द्रुतगती वर्तुळाकार मार्गाबाबत (HCMR) एक अत्यंत मोठी आणि महत्त्वाची घडामोड समोर आली आहे. पुण्यातील हा महत्त्वाकांक्षी एचसीएमटीआर प्रकल्प २०२८ पर्यंत निश्चितपणे पूर्ण करण्याचे सक्त आदेश मुख्यमंत्री देवेंद्र फडणवीस यांनी दिले आहेत. तसेच प्रकल्पासाठी लागणाऱ्या सर्व शासकीय जागा महापालिकेला विनामोबदला हस्तांतरित करण्यात याव्यात आणि रिंगरोडच्या भूसंपादनासाठी रोख मोबदला देऊन ही प्रक्रिया तातडीने पूर्ण करावी, असे निर्देशही त्यांनी संबंधित प्रशासनाला दिले आहेत.

या उच्चस्तरीय बैठकीदरम्यान शहरातील वाहतुकीचे जाळे अधिक सुदृढ करण्यासाठी महत्त्वाकांक्षी मानल्या जाणाऱ्या 'पाताळलोक' प्रकल्पावरही विशेष चर्चा करण्यात आली. या प्रकल्पांतर्गत बोगद्यांच्या अलाइनमेंटचे काम आणि तांत्रिक बाबी लवकरात लवकर तज्ज्ञ व्यक्तींकडून व इंजिनिअर्सकडून तपासून घेण्याचे आदेश मुख्यमंत्री फडणवीस यांनी दिले आहेत. पुणेकरांचा प्रवास अधिक वेगवान, सुकर आणि सुरक्षित व्हावा यासाठी महापालिका आणि इतर संबंधित यंत्रणांनी प्रकल्पांची कामे वेळेत पूर्ण करण्यासाठी युद्धपातळीवर पावले उचलावीत, असे स्पष्ट निर्देश या वेळी देण्यात आले असून या निर्णयामुळे पुणे आणि पिंपरी-चिंचवड परिसरातील वाहतूक सुरळीत होण्याच्या आशा पुन्हा एकदा पल्लवीत झाल्या आहेत.