बार्शीत काळजाचा थरकाप उडवणारी घटना! पोटच्या गोळ्याची हत्या करून मृतदेहासह आई पोहोचली पोलीस ठाण्यात

सोलापूर:

सोलापूर जिल्ह्यातील बार्शीमध्ये एका अत्यंत हृदयद्रावक आणि काळजाचा थरकाप उडवणाऱ्या घटनेने संपूर्ण महाराष्ट्र हादरला आहे. सततच्या कौटुंबिक वादाला आणि पतीच्या जाचाला कंटाळून एका २६ वर्षीय जन्मदात्या आईनेच आपल्या अवघ्या १० महिन्यांच्या चिमुकलीची निर्घृण हत्या केल्याचा भयंकर प्रकार उघडकीस आला आहे. पूजा योगेश खुर्दामळे असे या आरोपी मातेचे नाव असून, तिने टोकाचे पाऊल उचलत आपली १० महिन्यांची मुलगी शक्ती हिचा आधी गळा दाबला आणि नंतर तिला पाण्याच्या बादलीत बुडवून ठार मारले. एवढ्यावरच न थांबता या मातेने आपल्या ६ वर्षांच्या मोठ्या मुलीचा, तेजलचाही उशीने तोंड दाबून जीव घेण्याचा प्रयत्न केला. मात्र, "आई, मी शाळा शिकते, मला मारू नकोस" अशा काळीज पिळवटून टाकणाऱ्या आर्त विनवणीमुळे पूजाचे मन पाझरले आणि तिने मोठ्या मुलीला जिवंत सोडले.

या भयंकर आणि क्रूर कृत्यानंतर पूजाने आपल्या १० महिन्यांच्या मृत चिमुकलीचा देह थेट खांद्यावर घेतला आणि ती स्वतः चालत बार्शी शहर पोलीस ठाण्यात हजर झाली. पोलिसांसमोर तिने आपल्या गुन्ह्याची स्पष्ट कबुली देत, "माझ्या पतीच्या त्रासाला कंटाळून मी माझ्या मुलीची हत्या केली आहे, मला आता अटक करा" अशी मागणी केली. ही धक्कादायक घटना पूजाचे वडील कामावर गेल्यानंतर घरात कोणीही नसताना घडली. या घटनेचे गांभीर्य ओळखून बार्शी शहर पोलिसांनी तातडीने पूजाविरुद्ध भारतीय न्याय संहिता (BNS) कलम १०३ (१) आणि १०९ अंतर्गत खुनाचा आणि खुनाच्या प्रयत्नाचा गुन्हा दाखल केला आहे. एका आईनेच पतीच्या रागापोटी आपल्या पोटच्या गोळ्याचा असा निर्दयीपणे अंत केल्यामुळे परिसरात मोठी खळबळ उडाली असून, पोलीस आता या प्रकरणाचा आणि पतीकडून होणाऱ्या कथित छळाचा सखोल तपास करत आहेत.