सराफा बाजारात सोन्याचे भाव खाली; दिल्ली ते मुंबई-पुण्यात किमती घसरल्या

नवी दिल्ली:

आठवड्याच्या पहिल्याच दिवशी म्हणजेच सोमवारी भारतीय सराफा बाजारात सोन्या-चांदीच्या दरात मोठी घसरण पाहायला मिळाली आहे. गेल्या काही दिवसांपासून सुरू असलेला घसरणीचा कल कायम राहिल्याने सोन्याचे भाव खाली आले आहेत, ज्यामुळे सोने खरेदीसाठी उत्सुक असलेल्या ग्राहकांना मोठा दिलासा मिळाला आहे. देशातील बहुतांश प्रमुख शहरांमध्ये २४ कॅरेट आणि २२ कॅरेट सोन्याच्या किमतीत घट नोंदवण्यात आली आहे. राजधानी दिल्लीत २४ कॅरेट सोन्याचा दर प्रति १० ग्रॅम १,४३,४३० रुपयांवर आला आहे, तर २२ कॅरेट सोन्याची किंमत १,३१,४४० रुपये प्रति १० ग्रॅम इतकी नोंदवली गेली आहे.

भारतीय बाजारासोबतच आंतरराष्ट्रीय बाजारातही मौल्यवान धातूंच्या दरात नरमाई पाहायला मिळत आहे. आंतरराष्ट्रीय बाजारात स्पॉट गोल्डचा दर घसरून प्रति औंस ४,०००.५५ डॉलरवर आला आहे, तर अमेरिकन गोल्ड फ्युचर्सच्या किमती प्रति औंस ४,००५.९ डॉलरच्या आसपास पोहोचल्या आहेत. या घसरणीमागे जागतिक घडामोडी आणि मध्य पूर्वेतील वाढता तणाव कारणीभूत असल्याचे मानले जात आहे. मध्य पूर्वेतील युद्धजन्य परिस्थितीमुळे कच्च्या तेलाच्या किमतीत वाढ झाली असून ब्रेंट क्रूडने प्रति बॅरल ९० डॉलरचा टप्पा ओलांडला आहे. वाढत्या महागाईवर नियंत्रण मिळवण्यासाठी अमेरिकेची मध्यवर्ती बँक 'फेडरल रिझर्व्ह' व्याजदरात वाढ करू शकते, अशी शक्यता वर्तवली जात आहे. व्याजदर वाढल्यास गुंतवणूकदार सोन्याऐवजी इतर पर्यायांकडे वळण्याची शक्यता असल्याने सोन्या-चांदीच्या बाजारावर दबाव निर्माण झाला आहे.

महाराष्ट्रासह देशातील प्रमुख शहरांचा विचार केल्यास मुंबई, कोलकाता, चेन्नई, पुणे आणि बंगळुरूमध्ये २४ कॅरेट सोन्याचा दर प्रति १० ग्रॅम १,४३,२८० रुपये इतका नोंदवला गेला आहे, तर २२ कॅरेट सोन्याचा भाव १,३१,३४० रुपयांवर आला आहे. सोन्याच्या पावलावर पाऊल टाकत चांदीच्या दरातही मोठी घसरण झाली आहे. बाजारात चांदीचा भाव प्रति किलो २,२९,९०० रुपयांवर आला आहे. आंतरराष्ट्रीय बाजारात स्पॉट सिल्व्हरचा दर ५६.४२ डॉलर प्रति औंसवर पोहोचला आहे. काही महिन्यांपूर्वी उच्चांक गाठणाऱ्या चांदीच्या किमती आता सातत्याने खाली येत असल्याचे चित्र आहे.