शेतकऱ्यांसाठी आनंदाची बातमी! कोल्हापुरात कर्जमाफीच्या याद्या उद्यापासून प्रसिद्ध होणार

कोल्हापुर:

राज्य शासनाकडून जाहीर करण्यात आलेल्या 'पुण्यश्लोक अहिल्यादेवी होळकर कर्जमाफी योजने'च्या अंमलबजावणीने कोल्हापूर जिल्ह्यात प्रचंड वेग घेतला आहे. जिल्ह्यातील सर्व पात्र थकबाकीदार शेतकरी सभासदांची संपूर्ण माहिती आणि डेटा प्रशासनाकडून शासनाच्या अधिकृत पोर्टलवर यशस्वीरित्या अपलोड करण्यात आला आहे. या बहुप्रतिक्षित योजनेतील पात्र लाभार्थी शेतकऱ्यांच्या याद्या मंगळवारपासून (२१ जुलै) टप्प्याटप्प्याने प्रसिद्ध केल्या जाणार आहेत. याद्या प्रसिद्ध होताच पात्र शेतकऱ्यांची बायोमेट्रिक पडताळणी पूर्ण केली जाईल आणि त्यानंतर कर्जमाफीची रक्कम थेट शेतकऱ्यांच्या बँक/कर्ज खात्यात वर्ग करण्याची प्रक्रिया सुरू होणार आहे. त्यामुळे जिल्ह्यातील थकबाकीदार शेतकऱ्यांना मोठा दिलासा मिळण्याची शक्यता आहे.

प्रशासनाकडून मिळालेल्या माहितीनुसार, जिल्ह्यातील प्रत्येक पात्र शेतकऱ्यांपर्यंत या योजनेचा लाभ पारदर्शकपणे आणि लवकरात लवकर पोहोचावा यासाठी सहकार विभाग आणि बँकांकडून युद्धपातळीवर काम सुरू आहे. ज्या शेतकऱ्यांची नावे प्रसिद्ध होणाऱ्या याद्यांमध्ये समाविष्ट असतील, त्यांनी आपल्या जवळच्या महासेवा केंद्रात किंवा बँकेत जाऊन बायोमेट्रिक प्रमाणीकरण (ई-केवायसी) पूर्ण करणे आवश्यक असणार आहे. ही पडताळणी पूर्ण होताच प्रत्यक्ष अनुदान वितरण प्रक्रियेला गती दिली जाईल. या योजनेमुळे कोल्हापूर जिल्ह्यातील हजारो अडचणीत सापडलेल्या शेतकऱ्यांचा सातबारा कोरा होण्याचा मार्ग मोकळा झाला आहे.