नो-बॉल टाकला तर थेट मॅचमधून आउट! बीसीसीआयचा कठोर नियम

मुंबई: भारतीय क्रिकेट नियामक मंडळाने (BCCI) आगामी २०२६-२-०२७ च्या देशांतर्गत क्रिकेट हंगामापूर्वी खेळाच्या नियमांमध्ये अत्यंत महत्त्वपूर्ण आणि कडक बदल लागू केले आहेत. क्रिकेट सामन्यांमध्ये पारदर्शकता राखण्यासाठी आणि खेळभावना जपण्यासाठी बीसीसीआयने हे पाऊल उचलले असून, यामध्ये सर्वात मोठा दणका जाणीवपूर्वक नो-बॉल टाकणाऱ्या गोलंदाजांना बसणार आहे. नव्या नियमांनुसार, जर कोणत्याही गोलंदाजाने मैदानात मुद्दाम फ्रंट-फूट नो-बॉल टाकला किंवा खेळपट्टीवर न पडणारा बीमरसारखा चेंडू टाकला, तर त्याला संपूर्ण सामन्यातून तत्काळ निलंबित करण्याचा अधिकार मैदानातील पंचांना देण्यात आला आहे.

यापूर्वीच्या नियमांनुसार जाणीवपूर्वक नो-बॉल टाकणाऱ्या गोलंदाजाला केवळ संबंधित डावापुरते गोलंदाजी करण्यापासून रोखले जात होते. मात्र, मेरीलेबोन क्रिकेट क्लबच्या (MCC) शिफारशींनुसार बीसीसीआयने नियमावलीतील ४१.८ या नियमात सुधारणा केली आहे. पुढील महिन्यात सुरू होणाऱ्या दुलिप ट्रॉफी स्पर्धेपासून हे नवे नियम लागू केले जाणार आहेत. याशिवाय, दिवसाच्या शेवटच्या षटकाबाबतच्या १२.५.२ या नियमातही बदल करण्यात आला असून, आता शेवटच्या षटकात विकेट पडली तरी ते षटक पूर्ण करणे बंधनकारक असेल. याआधी शेवटच्या षटकात गडी बाद झाल्यास पंच खेळ थांबवू शकत होते.

बीसीसीआयने सामन्याचा कृत्रिम किंवा सोयीस्कर निकाल मिळवण्यासाठी डाव घोषित करणे किंवा सोडून देणे यावरही १५.२ नियमानुसार पूर्णपणे बंदी घातली आहे. तसेच एकदिवसीय सामन्यांमध्ये ड्रिंक्स ब्रेकदरम्यान मुख्य प्रशिक्षकांना मैदानात जाऊन खेळाडूंशी चर्चा करण्याची आणि रणनीती आखण्याची परवानगी देण्यात आली आहे. यष्टीरक्षणाशी संबंधित नियमांमध्येही योग्य सुधारणा करण्यात आल्या असून, या कडक नियमांमुळे देशांतर्गत क्रिकेटमधील गैरप्रकारांना आळा बसेल आणि खेळाचा दर्जा अधिक उंचावेल असा विश्वास व्यक्त केला जात आहे.