पुण्यात विश्वविक्रमाची नोंद; १२ हजार विद्यार्थ्यांचे सामूहिक गणेशस्तोत्र पठण ‘एशिया बुक ऑफ रेकॉर्डस्’मध्ये

पुणे: हिंदुस्थानातील पहिल्या सार्वजनिक गणेशोत्सवाचा ऐतिहासिक मान असलेल्या ‘श्रीमंत भाऊसाहेब रंगारी गणपती ट्रस्ट’च्या वतीने यंदाच्या गणेशोत्सवाच्या पार्श्वभूमीवर एक अत्यंत स्तुत्य आणि विक्रमी उपक्रम राबविण्यात आला आहे. पुण्यातील विविध शाळांमधील तब्बल १२ हजार ३६० विद्यार्थ्यांनी एकाच वेळी ऑनलाइन माध्यमातून सामूहिक गणेशस्तोत्र पठण करत एक नवा जागतिक व एसियाई विक्रम प्रस्थापित केला आहे. या अभूतपूर्व उपक्रमाची दखल घेत ‘एशिया बुक ऑफ रेकॉर्डस्’मध्ये या ऐतिहासिक कामगिरीची अधिकृत नोंद करण्यात आली असून, या यशामुळे पुणे शहराच्या शिरपेचात मानाचा आणखी एक तुरा रोवला गेला आहे.

      विद्यार्थ्यांमध्ये आपल्या प्राचीन संस्कृतीची ओळख निर्माण करणे, भारतीय परंपरांचे संस्कार रुजवणे आणि गणेशोत्सवाचे आध्यात्मिक व सांस्कृतिक महत्त्व पुढच्या पिढीपर्यंत पोहोचवणे या मुख्य उद्देशाखाली या विशेष उपक्रमाचे आयोजन करण्यात आले होते. ठरवून दिलेल्या वेळेत पुणे शहर आणि लगतच्या परिसरातील विविध शाळांमधील विद्यार्थ्यांनी ऑनलाईन प्लॅटफॉर्मवर एकत्र येत अत्यंत शिस्तीत आणि भक्तीमय वातावरणात गणेशस्तोत्राचे सामूहिक पठण केले. या विक्रमी सोहळ्यात कोथरूड येथील महेश विद्यालय (इंग्रजी व सेमी इंग्रजी), वाकड येथील धनिराज स्कूल, कोरेगाव पार्क येथील पूना स्कूल अँड होम फॉर ब्लाइंड, जागृती अंध शाळा, एरंडवणे येथील सिंहगड इन्स्टिट्यूट, ऐतिहासिक अहिल्यादेवी शाळा, रमणबाग स्कूल, केएचएस शाळा, हुजूरपागा (नारायण पेठ व कात्रज शाखा), क्लारा स्कूल, कटारिया स्कूल, प्राध्यापक नाथ हरी पुरंदरे शाळा, विद्या व्हॅली इंटरनॅशनल स्कूल आणि टिळक रोडवरील न्यू इंग्लिश स्कूल यांच्यासह अनेक अग्रगण्य शाळांमधील हजारो विद्यार्थ्यांनी अत्यंत उत्साहात सहभाग नोंदवला. विशेषतः अंध व दिव्यांग विद्यार्थ्यांचा या विशाल मोहिमेतील सहभाग अत्यंत प्रेरणादायी ठरला.

      या विक्रमी कामगिरीनंतर आयोजित करण्यात आलेल्या विशेष सोहळ्यात ‘एशिया बुक ऑफ रेकॉर्डस्’च्या न्याय निर्णायक अधिकारी चित्रा जैन यांच्या हस्ते या अधिकृत रेकॉर्डचे मानाचे प्रमाणपत्र ‘श्रीमंत भाऊसाहेब रंगारी गणपती ट्रस्ट’चे उत्सव प्रमुख व विश्वस्त पुनीत बालन यांच्याकडे सुपूर्द करण्यात आले. या ऐतिहासिक क्षणानंतर आपले विचार मांडताना पुनीत बालन म्हणाले की, गणेशोत्सव हा केवळ एका धार्मिक विधीपुरता किंवा आनंदाच्या उत्सवापुरता मर्यादित न राहता तो भावी पिढीमध्ये सुसंस्कार, धार्मिक जाणिवा आणि सामाजिक एकोपा निर्माण करण्याचे एक प्रभावी माध्यम ठरावा, हा आमचा सातत्याने प्रयत्न असतो. विद्यार्थ्यांना आपल्या समृद्ध संस्कृतीशी आणि बाप्पाच्या भक्तीशी जोडण्याच्या या संकल्पनेला १२ हजारहून अधिक विद्यार्थ्यांच्या सहभागाने अभूतपूर्व यश मिळवून दिले आहे. या विक्रमी उपक्रमाची ‘एशिया बुक ऑफ रेकॉर्डस्’मध्ये नोंद झाल्यामुळे गणेशभक्ती आणि भारतीय संस्कृतीचा हा संदेश आता अधिक व्यापकपणे लोकांपर्यंत पोहोचण्यास नक्कीच मदत होईल, असा विश्वास त्यांनी व्यक्त केला. ट्रस्टच्या या प्रेरणादायी आणि सांस्कृतिक उपक्रमाचे देशभरातून कौतुक केले जात आहे.