सातारा जिल्ह्यात पुन्हा खळबळ; उंब्रजमध्ये उसाच्या शेतात कुजलेला मृतदेह, आठवड्यातील तिसरी घटना

सातारा: सातारा जिल्ह्यात गेल्या काही दिवसांपासून रहस्यमय आणि धक्कादायक घटनांचे सत्र सुरूच असून, यामुळे सर्वसामान्य नागरिकांमध्ये भीतीचे वातावरण पसरले आहे. कराड तालुक्यातील उंब्रज परिसरातील एका उसाच्या शेतात अत्यंत कुजलेल्या अवस्थेत एक मृतदेह आढळून आल्याने संपूर्ण परिसरात मोठी खळबळ उडाली आहे. विशेष म्हणजे, अवघ्या आठ दिवसांच्या कालावधीत सातारा जिल्ह्याच्या विविध भागांत अशा प्रकारे मृतदेह सापडण्याची ही तिसरी घटना असल्यामुळे कायदा व सुव्यवस्थेचा प्रश्न पुन्हा एकदा ऐरणीवर आला आहे.

     प्राप्त माहिती नुसार, उंब्रज परिसरातील एका उसाच्या शेतात कामासाठी गेलेल्या लोकांना काही काळापासून तीव्र दुर्गंधी जाणवू लागली. त्यांनी कसून शोध घेतला असता, शेतात एक मृतदेह पडल्याचे त्यांच्या निदर्शनास आले. घटनेची माहिती वाऱ्यासारखी पसरताच परिसरात नागरिकांनी मोठी गर्दी केली. मृतदेह पूर्णपणे कुजलेल्या आणि सडलेल्या अवस्थेत असल्याने संबंधित व्यक्तीची ओळख पटवणे अत्यंतिक कठीण झाले आहे. घटनेचे गांभीर्य लक्षात घेऊन स्थानिक पोलिसांनी तातडीने घटनास्थळी धाव घेतली आणि परिसर सील करून पंचनामा केला. पोलिसांनी हा कुजलेला मृतदेह उत्तरीय तपासणीसाठी (Post-Mortem) पाठवला असून, वैद्यकीय अहवालानंतर मृत्यूचे नेमके कारण स्पष्ट होईल.

        सध्या पोलिसांकडून मृत व्यक्तीची ओळख पटविण्यासाठी जिल्ह्यातील तसेच लगतच्या परिसरातील बेपत्ता (Missing) व्यक्तींच्या नोंदींची कसून छाननी केली जात आहे. परिसरातील सीसीटीव्ही फुटेज आणि इतर तांत्रिक पुराव्यांच्या आधारे पोलीस या प्रकरणाचा वेगाने उलगडा करण्याचा प्रयत्न करत आहेत. गेल्या अवघ्या आठ दिवसांत सातारा जिल्ह्यात वेगवेगळ्या भागांत अशा प्रकारे मृतदेह मिळून आल्याच्या घटनांमुळे नागरिकांमध्ये तीव्र चिंता व दहशतीचे वातावरण निर्माण झाले आहे. यापूर्वीही जिल्ह्यात काही ठिकाणी उसाच्या शेतात किंवा निर्जन स्थळी मृतदेह सापडल्याचे प्रकार समोर आले होते. वारंवार घडणाऱ्या या गुन्ह्यांमुळे आणि रहस्यमय घटनांमुळे सर्वसामान्य नागरिकांमध्ये सुरक्षेबाबत प्रश्नचिन्ह उपस्थित होत असून, लवकरात लवकर या प्रकरणा मागील सत्य बाहेर आणावे, अशी मागणी स्थानिकांकडून केली जात आहे.