सातारा: आगामी गणेशोत्सवाच्या पार्श्वभूमीवर सातारा जिल्ह्यात कायदा व सुव्यवस्था अबाधित ठेवण्यासाठी पोलीस प्रशासनाने अत्यंत कठोर पावले उचलण्यास सुरुवात केली आहे. याचाच एक भाग म्हणून सातारा जिल्ह्यातील शिरवळ परिसरात दहशत माजवून शरीरा विरुद्धचे व मालमत्ते विरुद्धचे गंभीर गुन्हे करणाऱ्या तीन मुजोर सराईत गुन्हेगारांच्या टोळीवर पोलिसांनी मोठी कारवाई केली आहे. पोलीस अधीक्षक निखिल पिंगळे यांनी महाराष्ट्र पोलीस कायदा कलम ५५ अन्वये या कुख्यात टोळीला संपूर्ण सातारा आणि पुणे जिल्ह्याच्या हद्दीतून तब्बल एक वर्षाच्या कालावधीसाठी हद्दपार करण्याचे आदेश पारित केले आहेत, ज्यामुळे गुन्हेगारी वर्तुळात मोठी खळबळ उडाली आहे.
शिरवळ पोलीस ठाण्याच्या हद्दीत सातत्याने जबरी चोरी, मारामारी, दुखापत पोहोचवणे आणि इतर गंभीर स्वरूपाचे दखलपात्र गुन्हे करणाऱ्या एका सक्रिय टोळीची गेल्या काही दिवसांपासून प्रचंड दहशत निर्माण झाली होती. या टोळीचा म्होरक्या ओंकार दत्तात्रय क्षीरसागर (वय २५), तसेच त्याचे सहकारी वेदांत जितेंद्र जाधव (वय २०) आणि शुभम राजेंद्र भोई (वय २१, सर्व रा. शिरवळ, ता. खंडाळा, जि. सातारा) यांनी परिसरातील नागरिकांचे जगणे मुश्कील केले होते. या गुन्हेगारांवर वेळोवेळी अटक आणि विविध प्रतिबंधक कारवाया करूनही त्यांच्या गुन्हेगारी कारवायांमध्ये कोणतीही घट झाली नव्हती. कायद्याचा कोणताही धाक उरला नसल्यामुळे खंडाळा तालुका आणि शिरवळ परिसरातील सर्वसामान्य नागरिकांना मोठ्या प्रमाणावर या टोळीचा मनस्ताप सहन करावा लागत होता. नागरिकांमधून या मुजोर टोळीवर तातडीने कठोर कारवाई करण्याची तीव्र मागणी होत होती.
लोकांच्या वाढत्या तक्रारी आणि गुन्ह्यांची गंभीर दखल घेत शिरवळ पोलीस ठाण्याचे प्रभारी अधिकारी तथा पोलीस निरीक्षक महेश इंगळे यांनी या कुख्यात टोळी विरुद्ध महाराष्ट्र पोलीस कायदा कलम ५५ प्रमाणे सातारा व पुणे जिल्ह्यातून हद्दपार करण्याबाबतचा सविस्तर प्रस्ताव हद्दपार प्राधिकरण तथा पोलीस अधीक्षक यांच्याकडे सादर केला होता. या महत्त्वाच्या प्रस्तावाची सखोल चौकशी फलटण विभागाचे उपविभागीय पोलीस अधिकारी धन्यकुमार गोडसे यांनी पूर्ण केली होती.
या संपूर्ण प्रकरणाची सुनावणी सातारा जिल्ह्याचे हद्दपार प्राधिकरण तथा पोलीस अधीक्षक निखिल पिंगळे यांच्या समोर झाली. दोन्ही बाजूंचे कामकाज आणि पुरावे पाहता, सार्वजनिक शांततेला धोका निर्माण करणाऱ्या या तिन्ही आरोपींना संपूर्ण सातारा आणि पुणे जिल्ह्याच्या हद्दीतून एक वर्षासाठी तडीपार करण्याचे आदेश पोलीस अधीक्षकांनी दिले. या कारवाईमुळे परिसरातील गुन्हेगारांचे धाबे दणाणले आहेत.
आगामी गणेशोत्सवाच्या काळात जिल्ह्यात कोणतीही अनुचित घटना घडू नये आणि सर्वसामान्य नागरिकांना सण शांततेत व निर्भय वातावरणात साजरा करता यावा, यासाठी सराईत गुन्हेगारांवर हद्दपारीसह मोक्का (MCOCA) आणि एमपीडीए (MPDA) सारख्या अत्यंत कठोर कायदेशीर कारवाया आगामी काळातही तीव्र करण्यात येणार असल्याचे प्रशासनाकडून स्पष्ट करण्यात आले आहे. या यशस्वी कारवाईसाठी अपर पोलीस अधीक्षक श्रीमती डॉ. वैशाली कडुकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विश्वजीत घोडके, पोलीस हवादार प्रमोद सावंत, अमित सपकाळ, राजू कांबळे, शिवाजी भिसे, महिला पोलीस अंमलदार अनुराधा सणस आणि शिरवळ पोलीस ठाण्याच्या तपास पथकाने महत्त्वपूर्ण पुरावे गोवून कायदेशीर बाजू भक्कमपणे मांडली.
4.jpg)
