‘तुमच्यासाठी स्टार असतील, माझ्यासाठी जाहिरातदार’; पान मसाला जाहिरात प्रकरणी तुकाराम मुंढेंची रोखठोक भूमिका

मुंबई: महाराष्ट्र अन्न व औषध प्रशासनाचे (FDA) आयुक्त तुकाराम मुंढे आपल्या धडाकेबाज कार्यशैलीसाठी आणि कठोर भूमिकेसाठी राज्यभर ओळखले जातात. आता त्यांनी अभिनेता शाहरुख खान, अजय देवगण आणि टायगर श्रॉफ या बॉलिवूड मधील दिग्गज अभिनेत्यांना बजावण्यात आलेल्या ‘कारणे दाखवा’ नोटिसांच्या मुद्यावर अत्यंत स्पष्ट, रोखठोक आणि तडाखेबंद भूमिका मांडली आहे. संबंधित नामवंत अभिनेत्यांनी वेगवेगळ्या जाहिरातींच्या माध्यमातून महाराष्ट्रात कायदेशीर रीत्या प्रतिबंधित असलेल्या पान मसाल्याची अप्रत्यक्ष जाहिरात केल्याचा गंभीर आरोप एफडीएने केला आहे. या संपूर्ण प्रकरणात सेलिब्रिटी असल्यामुळे कोणालाही कोणतीही विशेष सवलत किंवा सूट दिली जाणार नाही, असे त्यांनी ठणकावून सांगितले आहे.

        एका वृत्तवाहिनीला दिलेल्या विशेष मुलाखतीत बोलताना तुकाराम मुंढे यांनी स्पष्ट केले की, जनतेच्या दृष्टीने हे अभिनेते भलेही मोठे सुपरस्टार आणि लोकप्रिय चेहरे असतील, परंतु एफडीएसाठी ते केवळ उत्पादनांचे समर्थन करणारे ‘एंडोर्सर’ आणि जाहिरातदार आहेत, ज्यांनी कायद्याचे उल्लंघन केले आहे. महाराष्ट्र एफडीएच्या ग्रेटर मुंबई विभागाने गत ११ ऑगस्ट रोजी अभिनेता शाहरुख खान, अजय देवगण आणि टायगर श्रॉफ यांना अधिकृतपणे कारणे दाखवा नोटिसा बजावल्या होत्या. ‘विमल इलायची’च्या लोकप्रिय ठरलेल्या जाहिरातीच्या माध्यमातून राज्यात बंदी असलेल्या पान मसाला ब्रँडचा अप्रत्यक्ष प्रचार केला जात असल्याचा मुख्य आक्षेप या नोटिसांमध्ये घेण्यात आला होता. या तिन्ही अभिनेत्यांना प्रशासना कडून आपली बाजू स्पष्ट करण्यासाठी १५ दिवसांची कायदेशीर मुदत देण्यात आली होती.

       या नोटिसांच्या अनुषंगाने सद्यस्थिती स्पष्ट करताना मुंढे यांनी सांगितले की, नोटीस बजावलेल्या तीनपैकी दोन अभिनेत्यांनी एफडीएच्या नोटिसेला आपले लिखित उत्तर सादर केले आहे, तर एका अभिनेत्याकडून अद्यापही कोणतेही उत्तर प्राप्त झालेले नाही. ज्या अभिनेत्याचे उत्तर आलेले नाही, त्या प्रकरणात प्रशासनाने न्यायनिर्णयन आणि कायदेशीर खटल्या संबंधीची पुढील कठोर प्रक्रिया सुरू केली आहे. मात्र, प्रशासकीय नियमां नुसार उत्तर न देणाऱ्या त्या अभिनेत्याचे नाव अद्याप सार्वजनिक करण्यात आलेले नाही. ज्या दोन अभिनेत्यांनी आपली उत्तरे पाठवली आहेत, त्यांनी संबंधित उत्पादनाची आणि जाहिरातीची मुख्य जबाबदारी उत्पादक कंपनीचीच असल्याचे नमूद करत आपली बाजू मांडली आहे.

       एफडीएच्या नियमांनुसार, संबंधित अभिनेत्यांना त्यांची बाजू न्याय्य पद्धतीने मांडण्याची पूर्ण संधी दिली जाणार असून, या प्रकरणाची पुढील सुनावणी संबंधित साहाय्यक आयुक्तांच्या स्तरावर पार पडणार आहे. कायद्याच्या तरतुदीं नुसार केवळ उत्पादकच नव्हे, तर जाहिरातदार आणि उत्पादनाचे endorsement करणारे सेलिब्रिटी यांच्यावरही कायदेशीर जबाबदारी निश्चित करण्यात आली आहे. त्यामुळे या प्रकरणात कोणत्याही प्रभावाला किंवा दबावाला बळी न पडता, ठरवून दिलेल्या कायदेशीर प्रक्रियेनुसारच पुढील कठोर कायदेशीर कारवाई केली जाईल, असा स्पष्ट इशारा तुकाराम मुंढे यांनी दिला आहे. एफडीएच्या या आक्रमक आणि तडजोड न करणाऱ्या भूमिकेमुळे सेलिब्रिटींच्या जाहिरातींच्या विश्वात मोठी खळबळ उडाली आहे.