मुंबई: जागतिक चित्रपटसृष्टीतील सर्वोच्च आणि अत्यंत मानाच्या समजल्या जाणाऱ्या ९९व्या अकादमी पुरस्कारांसाठी (ऑस्कर) भारताकडून एक अत्यंत अभिमानास्पद आणि ऐतिहासिक घोषणा करण्यात आली आहे. भारताची अधिकृत एन्ट्री (Official Entry) म्हणून महाराष्ट्राच्या मातीतील समृद्ध लोककलेवर आणि संस्कृतीवर आधारित असलेल्या ‘गोंधळ’ (Gondhal) या मराठी चित्रपटाची निवड करण्यात आली आहे. ‘फिल्म फेडरेशन ऑफ इंडिया’ (FFI) च्या वतीने मुंबईत आयोजित करण्यात आलेल्या विशेष पत्रकार परिषदेत ही घोषणा करण्यात आली, ज्यामुळे संपूर्ण महाराष्ट्रात आणि देशभरातील कलावर्तुळात आनंदाची व उत्साहाची लाट पसरली आहे.
देशभरातील विविध प्रादेशिक भाषांमधील तब्बल ३० हून अधिक मातब्बर, भव्य बजेट आणि आंतरराष्ट्रीय पातळीवर चर्चेत असलेल्या चित्रपटांच्या तगड्या शर्यतीत ‘गोंधळ’ने बाजी मारली आहे. या शर्यतीत ‘बॉर्डर २’, ‘इक्कीस’, ‘धुरंधर १ व २’, ‘बायसन’, ‘देऊळबंद २’, ‘बालन’, ‘डोरोथी’ आणि ‘द शेप ऑफ मोमो’ यांसारख्या बलाढ्य आणि व्यावसायिक दृष्ट्या मोठ्या चित्रपटांचा समावेश होता. या सर्व तगड्या स्पर्धकांना मागे टाकत महाराष्ट्राच्या शतकानुशतके चालत आलेल्या पारंपरिक ‘गोंधळ’ या लोककलेचा बाज आणि धार्मिक-सामाजिक वारसा जागतिक पटलावर घेऊन जाण्यासाठी निवडला गेल्याने मराठी चित्रपटसृष्टीचा शिरपेचात मानाचा तुरा रोवला गेला आहे.
दिग्दर्शक संतोष डावखर यांच्या दिग्दर्शकीय पदार्पणातील या चित्रपटाची कथा अत्यंत मर्मभेदी असून मानवी भावनांचा आणि सामाजिक श्रद्धांचा प्रभावी वेध घेणारी आहे. लग्नानंतर वधू-वरांच्या आयुष्यातील अडचणी व संकटे दूर करण्यासाठी पारंपरिक पद्धतीने घातल्या जाणाऱ्या ‘गोंधळ’ या विधीच्या पार्श्वभूमीवर हा चित्रपट उभा राहिला आहे. यात श्रद्धा विरुद्ध अंधश्रद्धा यांमधील पुसट रेषा, मानवी संघर्ष आणि समाजातील बदलत्या मानसिकतेचे वास्तववादी चित्रण करण्यात आले आहे. चित्रपटाचे भव्य सादरीकरण, प्रगत तांत्रिक मूल्ये आणि दिग्दर्शकाची उत्तम पकड यामुळे या सिनेमाने आधीपासूनच समीक्षकांची मने जिंकली होती.
यापूर्वीच गोव्यामध्ये पार पडलेल्या प्रतिष्ठेच्या ‘इंटरनॅशनल फिल्म फेस्टिव्हल ऑफ इंडिया’ (IFFI) मध्ये या चित्रपटाला ‘सिल्व्हर पीकॉक’ (विशेष ज्युरी पुरस्कार) ने गौरविण्यात आले होते. नोव्हेंबर २०२५ मध्ये चित्रपटगृहात प्रदर्शित झालेल्या या चित्रपटाची कथा, पटकथा आणि संवाद स्वतः दिग्दर्शक संतोष डावखर यांनीच लिहिले आहेत, तर सहनिर्मितीची धुरा दीक्षा डावखर यांनी सांभाळली आहे. या चित्रपटात ज्येष्ठ अभिनेते किशोर कदम, इशिता देशमुख, योगेश सोहोनी, निषाद भोईर, अनुज प्रभू, सुरेश विश्वकर्मा, माधवी जुवेकर, ऐश्वर्या शिंदे आणि कैलास वाघमारे यांसारख्या कसलेल्या कलाकारांच्या दमदार अभिनय सादरीकरणाने चित्रपटाला वेगळ्याच उंचीवर नेले आहे.
फिल्म फेडरेशन ऑफ इंडियाचे अध्यक्ष अभय सिन्हा, सचिव धर्मेंद्र मेहरा, खजिनदार संग्राम शिरके आणि अध्यक्ष पी. शेषाद्री यांच्या प्रमुख उपस्थितीत ही ऐतिहासिक निवड जाहीर करण्यात आली. आता ‘गोंधळ’ हा चित्रपट ९९व्या ऑस्कर पुरस्कारांच्या आंतरराष्ट्रीय फिचर फिल्म श्रेणीत भारताचे प्रतिनिधित्व करणार आहे. मराठी मातीतील अस्सल लोककलेचा हा सुगंध आता जागतिक दरबारात दरवळणार असून, या चित्रपटाच्या ऑस्कर प्रवासा साठी संपूर्ण देश उत्सुकतेने पाहत आहे.
.jpg)
.jpg)
