पुण्यात गणेशोत्सवात अनोखा उपक्रम; ‘माझा बाप्पा, माझी ऊर्जा’ मोहिमेतून सौरऊर्जेचा जागर

पुणे: पुण्यात यंदाच्या गणेशोत्सवात श्रद्धा, भक्ती आणि सामाजिक दायित्वाचा एक अत्यंत अभिनव आणि प्रेरणादायी संगम पाहायला मिळत आहे. स्वच्छ ऊर्जा क्षेत्रातील अग्रेसर असलेल्या ‘विक्रम सोलर लिमिटेड’च्या वतीने पुण्यात ‘माझा बाप्पा, माझी ऊर्जा’ या विशेष मोहिमेचे शानदार आयोजन करण्यात आले आहे. या मोहिमेच्या माध्यमातून गणेशभक्तांच्या भक्तीचा आणि बाप्पाच्या चरणांशी होणाऱ्या प्रत्येक ‘चरणस्पर्शा’चा थेट उपयोग गरजू ग्रामसमूह किंवा शाळांसाठी सौरऊर्जा प्रकल्प उभारण्यासाठी केला जाणार आहे, ज्यामुळे पारंपारिक भक्तीला स्वच्छ व शाश्वत ऊर्जेची एक नवी आणि पर्यावरणपूरक जोड मिळाली आहे.

       टिळक रस्त्यावरील प्रसिद्ध शेंडगे वाडी सार्वजनिक गणेशोत्सव मंडळ येथे या आगळ्यावेगळ्या मोहिमेचा औपचारिक शुभारंभ करण्यात आला. या उपक्रमांतर्गत दोन विशेष ‘सोलर एक्सपिरियन्स व्हॅन’ पुण्याच्या विविध भागांत दाखल झाल्या असून, याद्वारे नागरिकांना आणि भक्तांना बाप्पाच्या चरणांना स्पर्श करण्याचे आमंत्रण दिले जात आहे. विशेष म्हणजे, जसा भक्त बाप्पाच्या चरणांना स्पर्श करतो, तसा बाप्पाभोवती उभारलेला सौर ‘ऊर्जामंडल’ (Solar Aura) प्रकाशमान होतो. भक्तीच्या एका क्षणाचे रूपांतर अक्षय ऊर्जेच्या योगदानात कसे होते, याचा अत्यंत प्रत्ययकारी आणि नाविन्यपूर्ण अनुभव या फिरत्या व्हॅनच्या माध्यमातून भक्तांना घेता येत आहे. बाप्पासोबतचा हा प्रत्येक भक्तिमय संवाद ‘ऊर्जा पॉईंट्स’मध्ये जमा होत असून, हे सर्व पॉईंट्स एकत्र करून निवडलेल्या एखाद्या गरजू शाळेत वा ग्रामसमूहात सौरऊर्जा प्रकल्प उभारण्याच्या उपक्रमाला हातभार लावला जाणार आहे.

        अक्षय ऊर्जा ही केवळ व्यावसायिक किंवा शहरी वापरापुरती मर्यादित न राहता समाजातील शेवटच्या घटकापर्यंत आणि गरजूंपर्यंत पोहोचावी, हा यामागचा मुख्य उद्देश आहे. गणेशोत्सवा सारख्या महाउत्सवाच्या माध्यमातून स्वच्छ व हरित ऊर्जेचा संदेश सर्वसामान्यांपर्यंत पोहोचवतानाच लोक सहभागातून दीर्घकालीन सकारात्मक सामाजिक बदल घडविण्याचा विक्रम सोलरचा मानस आहे. याविषयी बोलताना विक्रम सोलरचे मुख्य कार्यकारी अधिकारी (सीईओ) समीर नागपाल यांनी सांगितले की, गणेशोत्सव हा श्रद्धा, एकोपा आणि समाजाप्रती आपली बांधिलकी व्यक्त करण्याचा उत्तम अवसर आहे. स्वच्छ ऊर्जा ही प्रत्येकासाठी अधिक शाश्वत भविष्य निर्माण करण्याशी जोडलेली असून, ‘माझा बाप्पा, माझी ऊर्जा’ या मोहिमेतून आम्ही या दोन्ही भावनांना एकत्र आणले आहे.

       प्रत्येक चरणस्पर्श हा जरी भक्तीचा वैयक्तिक क्षण असला, तरी त्यातून एखाद्या गावाला किंवा शाळेला हक्काची वीज मिळवून देण्याचा मोठा सामूहिक परिणाम साधता येतो, असे त्यांनी स्पष्ट केले. ही मोहीम कंपनीच्या ‘सिक्सेस फॉर सोलर’ या लोकप्रिय संकल्पनेला पुढे नेणारी असून, यातून जनसामान्यांच्या आनंदाच्या क्षणांना सामाजिक विकासाची जोड दिली जात आहे. उत्सवाचा हा काळ संपल्यानंतरही या उपक्रमातून निर्माण झालेली सकारात्मक ऊर्जा आणि सामाजिक हित कायमस्वरूपी पुढे सुरू राहणार असल्याने पुणेकरांकडून या अभिनव मोहिमेचे जोरदार स्वागत होत आहे.