शिवसेना-धनुष्यबाण प्रकरणावर आज सर्वोच्च न्यायालयात सुनावणी

नवी दिल्ली:शिवसेना पक्ष आणि पक्षाचे अधिकृत निवडणूक चिन्ह असलेल्या ‘धनुष्यबाण’ संदर्भातील बहुचर्चित आणि महत्त्वपूर्ण वादावर आज सर्वोच्च न्यायालयात अत्यंत महत्त्वाची सुनावणी पार पडणार आहे. सरन्यायाधीश सूर्यकांत, न्यायमूर्ती जॉयमाल्या बागची आणि न्यायमूर्ती बी. मोहना यांच्या विशेष खंडपीठासमोर या प्रकरणाची सुनावणी होणार असून, या सुनावणीदरम्यान प्रकरणाच्या अंतिम युक्तिवादाबाबत आणि पुढील कायदेशीर प्रक्रिया संदर्भात सर्वोच्च न्यायालयाकडून काही महत्त्वाचे निर्देश दिले जाण्याची दाट शक्यता वर्तवली जात आहे.

शिवसेना पक्षाचे नाव आणि निवडणूक चिन्हाच्या कायदेशीर अधिकाराशी संबंधित हा वाद गेल्या चार वर्षांहून अधिक काळापासून सर्वोच्च न्यायालयात प्रलंबित आहे. आज होणाऱ्या सुनावणीत पुढील सुनावणीचे निश्चित वेळापत्रक, अंतिम युक्तिवादाची प्रक्रिया आणि संपूर्ण खटल्याच्या सुनावणीसंदर्भात न्यायालय काय भूमिका घेते, याकडे संपूर्ण महाराष्ट्राच्या राजकीय वर्तुळासह देशभराचे लक्ष लागले आहे. आजच्या न्यायालयाच्या आदेशानंतर या दीर्घकाळ प्रलंबित असलेल्या राजकीय संघर्षाच्या पुढील कायदेशीर प्रक्रियेला वेग येण्याची चिन्हे आहेत.