पाणीकपातीचे संकट दूर! खडकवासला प्रकल्पात दमदार जलसाठा; पुणे शहरात सुरळीत पाणीपुरवठा

पुणे: जून महिन्यामध्ये ओढ दिलेल्या मान्सूनने आणि निर्माण झालेल्या पावसामुळे पुण्यात पाणीकपातीचे संकट ओढवले होते, मात्र धरणक्षेत्रात झालेल्या दमदार पावसामुळे पुणेकरांना मोठा दिलासा मिळाला आहे. खडकवासला धरणसाखळीत २० टीएमसीहून अधिक पाणीसाठा जमा झाल्यामुळे पालिकेने शहरातील पाणीकपात पूर्णपणे रद्द केली आहे. सध्या शहरात कोणतीही घोषित किंवा अघोषित पाणीकपात लागू नसून सर्व भागांत नियमितपणे पाणीपुरवठा सुरू असल्याचे स्पष्ट करण्यात आले आहे, ज्यामुळे नागरिकांची वर्षभराची पाण्याची चिंता मिटली आहे.

यंदा जून महिन्यात पावसाची मोठी तूट निर्माण झाल्यामुळे आणि एल निनोची शक्यता वर्तवल्यामुळे पालिकेने पुण्यात एक दिवसाआड पाणीपुरवठा करण्याचा निर्णय घेतला होता. त्यानंतर संत ज्ञानेश्वर महाराज आणि संत तुकाराम महाराज यांच्या पालखी सोहळ्याच्या पार्श्वभूमीवर हा निर्णय काही काळ मागे घेण्यात आला होता. मात्र, जुलैच्या सुरुवातीपासून धरणांच्या पाणलोट क्षेत्रात कोसळलेल्या मुसळधार पावसामुळे चित्र पूर्णपणे बदलले. धरणांमधील पाणीसाठ्यात विक्रमी वाढ झाल्याने पाणीकपातीचा निर्णय रद्द करावा लागल्याचे प्रशासनाकडून सांगण्यात आले आहे.

महापालिका प्रशासनाकडून सध्या उपलब्ध पाणीसाठ्याचे योग्य नियोजन करण्यात येत असून वितरण व्यवस्थेवर नियमित नजर ठेवली जात आहे. कोणत्याही भागात तांत्रिक बिघाड किंवा जलवाहिनी गळती झाल्यास त्यावर तातडीने उपाययोजना करण्याचे निर्देश संबंधित विभागाला देण्यात आले आहेत. जरी धरणांमध्ये पुरेसा जलसाठा उपलब्ध झाला असला, तरी नागरिकांनी पाण्याचा अपव्यय टाळून पाण्याचा वापर अत्यंत जपून आणि जबाबदारीने करावा, असे आवाहन प्रशासनाकडून करण्यात आले आहे.