दहिवडी प्रतिनिधी प्रवीण राजे: सातारा जिल्ह्यातील राजकीयदृष्ट्या अत्यंत संवेदनशील आणि प्रतिष्ठेच्या समजल्या जाणाऱ्या माण-खटाव तालुक्यात जिल्हा परिषद आणि पंचायत समिती निवडणुकांचे बिगुल वाजले आहे. या निवडणुकीत प्रस्थापित सत्ताधारी आणि विरोधक यांच्यात चुरस असतानाच, शेखर गोरे यांनी आपली रणनीती स्पष्ट केल्याने संपूर्ण तालुक्याचे राजकीय समीकरण फिरवण्यासाठी त्यांची भूमिका निर्णायक ठरणार असल्याचे चित्र आहे.
'आंधळी'तून रणशिंग: पत्नी सोनलताई गोरे मैदानात
माण-खटावचे राजकारण नेहमीच गोरे बंधूंच्या भोवती फिरत आले आहे. मात्र, यावेळी शेखर गोरे यांनी मोठी खेळी खेळली आहे. आंधळी येथे झालेल्या भव्य मेळाव्यात आणि कार्यकर्त्यांच्या पक्षप्रवेश सोहळ्यात त्यांनी जाहीर केले की, त्यांच्या पत्नी सोनलताई गोरे या आंधळी जिल्हा परिषद गटातून निवडणूक लढवणार आहेत. विशेष म्हणजे, त्यांनी ही निवडणूक 'कमळ' चिन्हावरच लढणार असल्याचे स्पष्ट केल्याने भाजपमधील अंतर्गत समीकरणे आणि आगामी युती-आघाडीच्या राजकारणात मोठी खळबळ उडाली आहे. सध्या शेखर गोरेंनी आंधळी गटातील प्रत्येक गावात भेटीगाठी आणि दौऱ्यांचा धडाका लावला असून, मतदारांशी थेट संवाद साधण्यावर भर दिला आहे.
कुकुडवाड गटात राजेंद्र जाधव यांची उमेदवारी निश्चित?
केवळ आंधळीच नव्हे, तर इतर गटांतही शेखर गोरे यांनी आपली ताकद लावण्यास सुरुवात केली आहे. कुकुडवाड जिल्हा परिषद गटातून राजेंद्र जाधव निवडणूक लढवणार असल्याचे जवळपास निश्चित झाले आहे. या गडावर आपली पकड मजबूत करण्यासाठी गोरेंनी जोरदार मोर्चेबांधणी सुरू केली आहे.
माणदेशातील 'मास लीडर' आणि स्वतंत्र ताकद
शेखर गोरे यांची ओळख ही केवळ एक राजकीय नेता म्हणून नसून, दुष्काळी भागातील जनतेच्या प्रश्नांसाठी आक्रमक भूमिका घेणारा नेता अशी आहे. 'शेखरभाऊ' यांनी गेल्या काही वर्षांत वॉटर कप स्पर्धा, ऐन उन्हाळ्यात मोफत पाणीपुरवठा, चारा छावण्या आणि स्थानिक विकासकामांच्या माध्यमातून खटावच्या उत्तर भागासह माण तालुक्यात स्वतःचा एक स्वतंत्र मतदारसंघ तयार केला आहे. हा 'हक्काचा मतदार' ज्या बाजूला झुकेल, तिथे विजयाचे पारडे जड होणार आहे.
निर्णायक ठरणारी समीकरणे:
युवा कार्यकर्त्यांचे संघटन: शेखर गोरे यांच्याकडे तरुणांची मोठी फळी आहे. सोशल मीडिया आणि ग्राऊंड लेव्हलवर हे कार्यकर्ते निवडणूक फिरवण्याची क्षमता ठेवतात.
आमदारकीचे लक्ष्य: शेखर गोरे यांनी जिल्हा परिषद निवडणुकीनंतर विधानसभेच्या तयारीला लागणार असल्याचे आधीच जाहीर केले आहे. त्यामुळे आपली ताकद सिद्ध करण्यासाठी ते या निवडणुकीत सर्वस्व पणाला लावणार आहेत.
या गटांवर असणार विशेष नजर
आंधळी, कुकुडवाड, बिदाल, मार्डी, गोंदवले आणि खटाव भागातील औंधसारख्या महत्त्वाच्या जिल्हा परिषद गटांमध्ये शेखर गोरे यांची वैयक्तिक पकड आहे.
थोडक्यात सांगायचे तर...
माण-खटावच्या राजकारणात शेखर गोरे हा असा 'फॅक्टर' आहे ज्याला दुर्लक्षित करून कोणालाही सत्तेची खुर्ची गाठता येणार नाही. ते स्वतःच्या रणनीतीने 'किंग' बनणार की मित्रपक्षांसाठी 'किंगमेकर' ठरणार, हे येणारा काळच ठरवेल.
