नवी दिल्ली: केंद्र सरकारकडून प्रत्येक महिन्याच्या पहिल्या तारखेला इंधनाचे सुधारित दर जाहीर केले जातात. या पार्श्वभूमीवर ऑगस्ट महिन्याच्या सुरुवातीलाच देशातील व्यावसायिक आणि उद्योजकांसाठी एक अत्यंत दिलासादायक बातमी समोर आली आहे. तेल विपणन कंपन्यांनी व्यावसायिक वापराच्या एलपीजी सिलिंडरच्या दरात मोठी कपात केली असून, १९ किलोचा व्यावसायिक सिलिंडर २०० रुपयांपेक्षा जास्त किमतीने स्वस्त झाला आहे. हे नवीन दर आजपासून देशभरात लागू झाले आहेत.
केंद्र सरकारच्या या निर्णयामुळे देशातील प्रमुख शहरांमध्ये व्यावसायिक गॅसच्या दरात लक्षणीय घट झाली आहे:
- दिल्ली: राजधानी दिल्लीमध्ये १९ किलोच्या व्यावसायिक गॅस सिलिंडरच्या दरात २०२ रुपयांची कपात करण्यात आली आहे. यापूर्वी १ जुलै रोजी दिल्लीत या सिलिंडरची किंमत २९३० रुपयांपर्यंत होती.
- कोलकाता: कोलकात्यामध्ये व्यावसायिक एलपीजी सिलिंडरच्या दरात तब्बल २०९ रुपयांची मोठी कपात नोंदवली गेली आहे. या कपातीनंतर कोलकातामध्ये १९ किलोच्या सिलिंडरची नवीन किंमत २,८७२.५० रुपयांवर आली आहे, जी आधी ३,०८१.५० रुपये इतकी होती.
- पटना: पाटणामध्येही १९ किलोग्रामच्या व्यावसायिक एलपीजी सिलिंडरची किंमत ३,२२७ रुपयांपर्यंत खाली आली आहे.
इराणमधील संकटाच्या आणि जागतिक घडामोडींच्या पार्श्वभूमीवर महिन्याच्या पहिल्याच दिवशी मिळालेल्या या दिलासामुळे हॉटेल व्यावसायिक, रेस्टॉरंट मालक आणि इतर लघु उद्योजकांना मोठा आर्थिक आधार मिळाला आहे. नवीन वर्षातील व्यावसायिक सिलिंडरच्या किमतीतील ही एक मोठी कपात मानली जात आहे.
व्यावसायिक गॅस वापरकर्त्यांना मोठा दिलासा मिळाला असला, तरी सर्वसामान्य नागरिकांच्या स्वयंपाकघरातील खिशावर ताण कायम आहे. १४.२ किलो वजनाच्या घरगुती एलपीजी सिलिंडरच्या किमतीमध्ये कोणतेही बदल करण्यात आलेले नाहीत. घरगुती सिलिंडरचे दर मागीलप्रमाणेच कायम ठेवण्यात आले आहेत.
व्यावसायिक एलपीजी सिलिंडरच्या किमतीत मोठी घट झाल्यामुळे आता सर्वसामान्यांमध्ये पेट्रोल आणि डिझेलचे दर कधी कमी होणार, याबाबत जोरदार चर्चा सुरू झाली आहे. जागतिक बाजारात कच्च्या तेलाच्या (क्रूड ऑइल) दरात झालेली घट पाहता, येत्या काळात पेट्रोल व डिझेलचे दरही कमी होण्याची शक्यता वर्तवली जात आहे. मात्र, यासंदर्भात केंद्र सरकार किंवा तेल कंपन्यांकडून अद्याप कोणतीही अधिकृत घोषणा करण्यात आलेली नाही.
