मंचर: राज्यात गाजत असलेल्या दूध भेसळ प्रकरणावरून सुरू असलेल्या राजकीय आरोप-प्रत्यारोपांच्या पार्श्वभूमीवर, आंबेगाव विधानसभा मतदारसंघाचे आमदार तथा महाराष्ट्राचे माजी गृहमंत्री दिलीप वळसे पाटील यांनी विरोधकांना थेट आणि ललकारत खुले आव्हान दिले आहे. "दूध भेसळ किंवा कोणत्याही बेकायदेशीर प्रकरणात माझा दूरान्वयानेही संबंध असल्याचे पुराव्यानिशी सिद्ध झाले, तर एका मिनिटाचाही विलंब न लावता मी सार्वजनिक जीवनातून कायमची निवृत्ती घेईन," अशी ठाम घोषणा त्यांनी केली आहे. एका व्हिडिओ संदेशाद्वारे त्यांनी जनतेशी संवाद साधत विरोधकांच्या आरोपांचे जोरदार खंडन केले आहे.
सध्या आंबेगाव तालुक्यात काही विरोधकांकडून सातत्याने दूध भेसळ प्रकरणावरून चुकीचे आरोप करून जनतेची दिशाभूल केली जात आहे, असे सांगत वळसे पाटील म्हणाले की, सध्या राज्यात अन्न व औषध प्रशासन (FDA) दूध व्यवसायाशी संबंधित ठिकाणी नियमांनुसार तपासणी करून कायदेशीर कारवाई करत आहे. या कारवाईला आपला पूर्ण पाठिंबाच आहे. मात्र, या प्रशासकीय कारवाईचा आधार घेत काही राजकीय विरोधक जाणीवपूर्वक आपले नाव या प्रकरणाशी जोडत आहेत आणि आपली राजकीय प्रतिमा मलीन करण्याचा अत्यंत हीन प्रयत्न करीत आहेत, असा आरोप त्यांनी केला.
भेसळ करणारी व्यक्ती, संस्था किंवा कंपनी कोणतीही असो, अशा बेकायदेशीर कृत्य करणाऱ्या कोणाच्याही पाठीशी आपण कधीही उभे राहणार नाही आणि राहिलेले नाही, असे स्पष्ट करत त्यांनी एफडीए आणि पोलीस प्रशासन दोषींवर कठोर कारवाई करण्यास पूर्णपणे सक्षम असल्याचे सांगितले. कायद्यापुढे सर्वजण समान आहेत, असे सांगत वळसे पाटील यांनी विरोधकांना सज्जड दम भरला आहे. खोटे आणि बिनबुडाचे आरोप करून राजकीय षड्यंत्र रचण्याचे हे प्रकार तातडीने थांबवले नाहीत, तर संबंधितांविरुद्ध उच्च न्यायालयात फौजदारी गुन्हा दाखल करण्यासोबतच मोठ्या आर्थिक अब्रूनुकसानीचा (Defamation) दावा देखील ठोकण्यात येईल, असा इशारा त्यांनी दिला.
आपल्या राजकीय प्रवासावर बोलताना माजी गृहमंत्री म्हणाले की, "मी माझ्या संपूर्ण राजकीय आयुष्यात नेहमी स्वच्छ, पारदर्शक आणि जनतेच्या विश्वासावर आधारित राजकारण केले आहे. लवकरच सत्य जनतेसमोर येईल आणि शेवटी सत्याचाच विजय होईल." यादरम्यान त्यांनी नागरिक, समाजमाध्यमे आणि प्रसारमाध्यमांनी कोणत्याही अफवांवर विश्वास न ठेवता केवळ वस्तुस्थितीची दखल घ्यावी, असे आवाहनही केले आहे. त्यांच्या या आक्रमक भूमिकेमुळे पुणे जिल्ह्यासह राज्यातील राजकीय वर्तुळात मोठी चर्चा रंगली आहे.
