सिंहगड व्हॅली प्रकल्पाच्या नावाखाली १९ लाखांची फसवणूक; चौघांवर गुन्हा

पुणे: कोणतीही कायदेशीर परवानगी किंवा शासकीय मंजुरी नसताना ‘सिंहगड व्हॅली’ नावाचा बनावट भूखंड प्रकल्प तयार करून नागरिकांची फसवणूक केल्याचा गंभीर प्रकार पुण्यातील उत्तमनगर परिसरात उघडकीस आला आहे. प्रकल्पातील प्लॉटच्या व्यवहारापोटी घेतलेली मोठी रक्कम परत करताना दिलेले धनादेश न वटल्याने फसवणूक झालेल्या एका ज्येष्ठ नागरिकाने दिलेल्या फिर्यादीवरून, दोन जमीन मालकांसह एकूण चार जणांवर उत्तमनगर पोलीस ठाण्यात गुन्हा दाखल करण्यात आला आहे. या प्रकरणामुळे पुणे आणि लगतच्या ग्रामीण भागात एकच खळबळ उडाली आहे.

        रवींद्र रजपुत (वय ४५), अशिष कचरावत (वय ४०), कल्पेश माणिकचंद मंडलेचा (वय ४०, रा. ज्ञानेश सोसायटी, वारजे) आणि राजेंद्र शंकर भोसले (वय ४०, रा. वसंतनगर, केळेवाडी, ता. हवेली) अशी गुन्हा दाखल करण्यात आलेल्या संशयित आरोपींची नावे आहेत. याप्रकरणी यशवंत दगडू भिलारे (वय ६७, रा. आसावरी, नांदेडसिटी) यांनी उत्तमनगर पोलीस ठाण्यात फिर्याद दिली आहे. पोलिसांनी दिलेल्या सविस्तर माहितीनुसार, हा सर्व फसवणुकीचा प्रकार हवेली तालुक्यातील वडदरे येथील भूमापन क्रमांक व उपविभाग ६८९ च्या क्षेत्रात २०१५ पासून ते अलीकडच्या कालावधीत घडला आहे.

       पोलिसांच्या तपासात समोर आले की, आरोपी रवींद्र रजपूत आणि अशिष कचरावत यांनी संगनमत करून ‘सिंहगड व्हॅली’ नावाचा एक रिअल इस्टेट प्रकल्प उभा केला. या प्रकल्पाला कोणत्याही सक्षम प्राधिकरणाची किंवा शासनाची कोणतीही कायदेशीर मंजुरी नसताना, त्यांनी ग्राहकांसमोर सर्व परवानग्या मिळल्याचा बनाव रचला. फिर्यादी यशवंत भिलारे यांनी या प्रकल्पातील ५ हजार चौरस फुटांचे दोन प्लॉट विकत घेण्याचे ठरवून ३५ लाख रुपयांचा मोठा आर्थिक व्यवहार केला. या प्रकल्पाच्या ठिकाणी कल्पेश मंडलेचा व राजेंद्र भोसले हे दोघे मिळून व्यवस्थापन आणि कामकाज पाहत होते. भिलारे यांनी पैसे दिल्यानंतर त्यांना प्रकल्पाच्या वतीने खोट्या पावत्याही देण्यात आल्या.

        मात्र, काही कालावधीनंतर या प्रकल्पाला कोणत्याही शासकीय परवानग्या नसून आपली फसवणूक होत असल्याचे फिर्यादींच्या लक्षात आले. त्यांनी तातडीने हा व्यवहार रद्द करून आपले पैसे परत मागितले. त्यावेळी आरोपींनी ३० मार्च २०२४ ते ३० मार्च २०२५ या कालावधीत त्यांना एकूण १४ धनादेश दिले. परंतु, प्रत्यक्षात बँकेत वटवताना त्यातील केवळ १ लाख रुपयांचा एकच धनादेश पास झाला, तर उर्वरित १९ लाख रुपयांचे सर्व धनादेश खात्यात रक्कम न जुळल्यामुळे किंवा अन्य कारणांमुळे बाऊन्स होऊन परत आले. वारंवार पाठपुरावा करूनही आपले पैसे मिळत नसल्याने आणि आरोपी टाळाटाळ करत असल्याने अखेर यशवंत भिलारे यांनी पोलिसांत धाव घेत न्याय मागितला. या तक्रारीच्या आधारे उत्तमनगर पोलिसांनी चारही आरोपीं विरुद्ध फसवणुकीचा गुन्हा दाखल केला असून, सहायक पोलीस निरीक्षक पालवे या प्रकरणाचा सखोल तपास करत आहेत. अशा प्रकारच्या बनावट प्रकल्पांपासून नागरिकांनी सावध राहावे, असे आवाहन पोलिसांकडून करण्यात येत आहे.