चंद्रकांत पाटलांविषयी आक्षेपार्ह वक्तव्य; डेक्कन पोलिसांत दोघांवर गुन्हा

पुणे: उच्च आणि तंत्रशिक्षण मंत्री चंद्रकांत पाटील यांच्याबद्दल अत्यंत अवमानकारक, शिवराळ आणि बदनामीकारक भाषा वापरून सोशल मीडियावर व्हिडिओ प्रसारित केल्याप्रकरणी डेक्कन पोलिसांनी एका सोशल मीडिया इन्फ्लुएन्सरसह दोघांवर गंभीर स्वरूपाचा गुन्हा दाखल केला आहे. भारतीय जनता पक्षाचे नगरसेवक सुनील पांडे यांनी या प्रकरणी डेक्कन पोलीस ठाण्यात अधिकृत फिर्याद दिली असून, या कठोर कारवाईमुळे राजकीय वर्तुळात मोठी चर्चा रंगली आहे.

       पोलिसांनी दिलेल्या सविस्तर माहितीनुसार, संतोष पंडित आणि त्याच्या एका अज्ञात साथीदाराने मिळून ‘राजकारण एक्सप्रेस’ (Rajkaran Express) या सोशल मीडिया प्लॅटफॉर्मच्या अकाउंटवर २७ ऑगस्ट रोजी एक वादग्रस्त व्हिडिओ प्रसारित केला होता. या व्हिडिओमध्ये "जनतेच्या प्रश्नांची उत्तरे नेते देत नाहीत, आणि चंद्रकांत पाटील हे नेते त्यातीलच एक आहेत," असे म्हणत अत्यंत अश्लील, अर्वाच्य आणि अपमानकारक भाषेचा वापर करण्यात आला होता. सार्वजनिक ठिकाणी नेत्यांची नाहक बदनामी करणारा आणि समाजात आक्षेपार्ह संदेश देणारा हा व्हिडिओ संतोष पंडित याने स्वतः कॅमेऱ्यासमोर बोलून तयार केला, तर त्याच्या साथीदाराने त्याचे चित्रीकरण करून तो विविध सोशल मीडिया माध्यमांवर व्हायरल केला.

      हा बदनामीकारक व्हिडिओ भाजप नगरसेवक सुनील पांडे यांच्या निदर्शनास आल्यानंतर त्यांनी तात्काळ या प्रकरणाची गंभीर दखल घेतली. त्यानंतर त्यांनी डेक्कन पोलीस ठाण्यात जाऊन यासंदर्भात सविस्तर फिर्याद नोंदवली. नागरिकांच्या तक्रारीवरून पोलिसांनी तात्काळ कायदेशीर पावले उचलत आरोपीं  विरुद्ध भारतीय न्याय संहितेच्या (BNS) कलम ३५६, २९६ आणि ३ (५) अन्वये गुन्हा दाखल केला आहे. या प्रकरणाचा पुढील सखोल तपास सहायक पोलीस निरीक्षक गणेश जाधव करत आहेत. सोशल मीडियाचा गैरवापर करून राजकारण्यां विरोधात किंवा कोणत्याही व्यक्ती विरोधात असभ्य भाषा वापरून द्वेष पसरवणाऱ्यांवर पोलीस आता अत्यंत कडक कारवाई करण्याच्या भूमिकेत असल्याचे या घटनेवरून स्पष्ट होत आहे.