२५ जुलैला दहिवडीत मोफत नेत्र तपासणी व मोतीबिंदू शस्त्रक्रिया शिबिर

दहिवडी: 

माण तालुक्यातील दहिवडी शहरात गरजू रुग्णांसाठी एक अत्यंत महत्त्वाचा आणि मोफत सामाजिक उपक्रम राबवला जाणार आहे. आप्पा नाना फाउंडेशन, दहिवडी वकील संघाचे सचिव ॲड. गणेश देवकुळे आणि मित्र परिवार यांच्या संयुक्त विद्यमाने आगामी २५ जुलै रोजी भव्य मोफत नेत्र तपासणी व मोफत मोतीबिंदू ऑपरेशन शिबिराचे आयोजन करण्यात आले आहे. या विशेष सामाजिक कार्यात मुंबईच्या ममता ज्येष्ठ नागरिक संघ आणि पुण्यातील प्रसिद्ध भारती हॉस्पिटल (कात्रज) यांचे मोलाचे सहकार्य लाभले आहे. दहिवडी येथील ऐतिहासिक सिद्धनाथ मंदिर परिसरात सकाळी १० ते दुपारी ४ वाजेपर्यंत हे शिबिर पार पडणार असून, परिसरातील जास्तीत जास्त नागरिकांनी या सुविधेचा लाभ घ्यावा, असे आवाहन आयोजकांच्या वतीने करण्यात आले आहे.

या एकदिवसीय आरोग्य शिबिरामध्ये तज्ज्ञ डॉक्टरांच्या पथकाद्वारे रुग्णांची सखोल तपासणी केली जाणार आहे. यामध्ये प्रामुख्याने लांबचे किंवा जवळचे कमी दिसणे, डोळ्यांची सतत होणारी जळजळ व दुखणे, डोळ्यांवर मांस वाढणे आणि डोळे लाल होणे अशा विविध विकारांवर मोफत सल्ला व उपचार दिले जातील. याशिवाय, शिबिरस्थळी रुग्णांना गरजेनुसार अत्यंत अल्प दरात चष्मयांचे वितरण देखील केले जाणार आहे. ज्या रुग्णांना मोतीबिंदूचा त्रास असल्याचे निष्पन्न होईल, त्यांच्यावर पुण्यातील भारती हॉस्पिटल येथे सर्व प्रकारच्या मोतीबिंदू शस्त्रक्रिया पूर्णपणे मोफत केल्या जाणार आहेत. या मोफत शस्त्रक्रियेचा व शिबिराचा लाभ घेण्यासाठी नागरिकांनी आपली ओळखपत्रे (उदा. आधार कार्ड, रेशन कार्ड) आणि पासपोर्ट आकाराचे फोटो सोबत आणणे बंधनकारक आहे. या शिबिराबाबत अधिक माहिती किंवा नोंदणीसाठी नागरिकांना ८०१००५५३७४ किंवा ९३७११३२३८८ या मोबाईल क्रमांकांवर संपर्क साधता येईल.