टंचाईग्रस्त भागात पालकमंत्री संजय शिरसाटांची पाहणी; नुकसानग्रस्त पिकांचे तातडीने पंचनामे करण्याचे निर्देश

छत्रपती संभाजीनगर : राज्यात पावसाने ओढ दिल्याने निर्माण झालेल्या गंभीर टंचाई परिस्थितीमुळे शेतकरी वर्ग चिंतेत सापडला असून, या पार्श्वभूमीवर प्रशासकीय पातळीवर हालचालींना वेग आला आहे. छत्रपती संभाजीनगर जिल्ह्याचे पालकमंत्री तथा सामाजिक न्यायमंत्री संजय शिरसाट यांनी वैजापूर तालुक्यातील टंचाईग्रस्त भागाचा प्रत्यक्ष दौरा करत तेथील बिकट पिकस्थितिची पाहणी केली. वैजापूर तालुक्यातील मौजे जांबरगाव येथे प्रत्यक्ष शेतात उतरून त्यांनी शेतकरी बांधवांशी संवाद साधला आणि त्यांच्या अडीअडचणी व समस्यांची अत्यंत सविस्तर माहिती जाणून घेतली. या उच्चस्तरीय पाहणी दौरे दरम्यान स्थानिक आमदार रमेश बोरनारे यांच्यासह महसूल विभागाचे तहसीलदार सुनील सावंत, जिल्हा अधीक्षक कृषी अधिकारी दीपक गवळी आणि इतर वरिष्ठ प्रशासकीय अधिकारी उपस्थित होते.

         जांबरगाव परिसरातील शेतात पोहोचल्यानंतर पालकमंत्र्यांनी तेथील सुकलेल्या व धोक्यात आलेल्या पिकांची स्वतः पाहणी केली. पावसाच्या अभावामुळे शेतकर्‍यांच्या हातातोंडाशी आलेला घास कसा हिरावला जात आहे, याची प्रत्यक्ष अनुभूती घेत त्यांनी शेतकऱ्यांचे म्हणणे शांतपणे ऐकून घेतले. यावेळी शेतकर्‍यांशी संवाद साधताना त्यांनी शेतकऱ्यांना धीर दिला आणि संकटकाळात राज्य सरकार बळीराजाच्या पाठीशी खंबीरपणे उभे असल्याचे स्पष्ट केले. शेतकर्‍यांनी कोणत्याही परिस्थितीत खचून जाऊ नये, असा विश्वास त्यांनी यावेळी दिला. पिकस्थितीची ही पाहणी केल्यानंतर पालकमंत्र्यांनी उपस्थित महसूल व कृषी विभागाच्या अधिकाऱ्यांना तात्काळ कडक निर्देश दिले. ज्या-ज्या भागात टंचाईमुळे पिकांचे मोठे नुकसान झाले आहे, त्या सर्व भागातील नुकसानग्रस्त पिकांचे पंचनामे कोणताही विलंब न लावता तातडीने पूर्ण करावेत, असे आदेश त्यांनी दिले.

         प्रशासनाने टंचाईग्रस्त भागातील परिस्थिती अत्यंत गांभीर्याने आणि संवेदनशीलतेने हाताळावी, असे सांगत पालकमंत्र्यांनी शेतकऱ्यांच्या प्रत्येक समस्येची तत्काळ नोंद घेऊन आवश्यक त्या सर्व उपाय योजना तातडीने राबवाव्यात, अशी तंबी अधिकाऱ्यांना दिली. शासनाच्या वतीने पूरस्थिती असो वा दुष्काळ, शेतकऱ्यांना वाऱ्यावर सोडले जाणार नाही आणि प्रत्येक पात्र नुकसान ग्रस्ताला शासना कडून न्याय मिळवून दिला जाईल, अशी ग्वाही त्यांनी दिली. पालकमंत्र्यांच्या या दौऱ्यामुळे आणि तात्काळ घेतलेल्या निर्णयामुळे वैजापूर तालुक्यातील टंचाईग्रस्त शेतकर्‍यांना काहीसा दिलासा मिळाला असून, प्रशासकीय यंत्रणा आता प्रत्यक्ष पाहणी व पंचनाम्यांच्या कामाला गती देणार असल्याचे स्पष्ट झाले आहे.