लोणावळ्याच्या वाहतूक कोंडीवर तोडगा; रस्ता रुंदीकरणाच्या कामाला वेग

लोणावळा: लोणावळा आणि परिसरातील वाढती वाहतूक कोंडी दूर करण्यासाठी आणि पर्यटकांना सुलभ प्रवास अनुभवता यावा यासाठी मावळ तालुक्यात प्रशासकीय पातळीवर अत्यंत महत्त्वाची पावले उचलली जात आहेत. कुरवंडे येथील प्रसिद्ध टायगर व लायन्स पॉईंट विकास आराखड्यातील विविध कामांना गती देण्यासाठी आमदार सुनील शेळके आणि पीएमआरडीएचे महानगर आयुक्त अभिजीत चौधरी यांनी नुकतीच संयुक्तपणे प्रत्यक्ष स्थळ पाहणी केली. या दौऱ्या दरम्यान कुमार चौक ते टायगर पॉईंट या अतिशय महत्त्वाच्या रस्त्याचे काम ७ मीटर रुंदीने वेगाने पूर्ण करण्याचे स्पष्ट निर्देश आयुक्तांनी संबंधित यंत्रणेला दिले आहेत, ज्यामुळे लवकरच लोणावळ्यातील प्रवासाचा तिढा सुटण्यास मोठी मदत होणार आहे.

          मावळ तालुक्यातील पर्यटनस्थळांवर पर्यटकांची सतत वाढणारी संख्या आणि त्यातून उद्भवणारी वाहतूक कोंडी ही एक मोठी समस्या बनली होती. यावर शाश्वत उपाय शोधण्यासाठी आमदार सुनील शेळके सातत्याने पाठपुरावा करत आहेत. याच पार्श्वभूमीवर झालेल्या या पाहणी दौऱ्यात रस्त्याच्या कामातील सर्व तांत्रिक व भौतिक अडथळे दूर करण्यावर भर देण्यात आला. लोणावळा नगरपरिषद हद्दीत या रस्त्याच्या कामासाठी आवश्यक असलेल्या उर्वरित जागांचे लवकरात लवकर कायदेशीर भूसंपादन करून त्या जागा तातडीने पीएमआरडीएच्या ताब्यात देण्याचे स्पष्ट आदेश नगरपरिषदेचे मुख्याधिकारी अशोक साबळे यांना देण्यात आले आहेत. प्रशासकीय आणि भूसंपादन प्रक्रियेला वेग मिळाल्यामुळे आता रखडलेले रस्ता रुंदीकरणाचे काम निर्धारित वेळेत पूर्ण होईल, असा विश्वास व्यक्त केला जात आहे.

      या विकासकामा मुळे केवळ पर्यटकांचा प्रवास सुखकर होणार नाही, तर स्थानिक अर्थव्यवस्थेलाही मोठी नवी उभारी मिळणार आहे. रस्ते रुंद व व्यवस्थित झाल्यामुळे मावळमध्ये येणाऱ्या पर्यटकांची संख्या अधिक वाढेल, ज्याचा थेट व सकारात्मक फायदा हॉटेल व्यावसायिक, चहापानगृहे, स्थानिक खाद्यपदार्थ विक्रेते, वाहतूकदार आणि लहान-मोठ्या व्यावसायिकांना होईल. पर्यटनाशी संबंधित विविध व्यवसायांतून स्थानिकांसाठी रोजगाराच्या नवीन संधी निर्माण करणे आणि मावळचा सर्वांगीण पर्यटन विकास साधणे हा या प्रकल्पामागील मुख्य उद्देश असल्याचे स्पष्ट झाले आहे. प्रशासनातील विविध विभागांमध्ये योग्य समन्वय साधून रखडलेली कामे मार्गी लावल्यामुळे मावळच्या पर्यटन क्षेत्राला येत्या काळात नवी झळाळी मिळणार आहे.

       या उच्चस्तरीय पाहणी दौऱ्यावेळी पीएमआरडीएच्या सहआयुक्त (जमीन व मालमत्ता) पूनम मेहता, मुख्य अभियंता शिवप्रसाद बागडी, कार्यकारी अभियंता शिवकुमार कुपल, अनधिकृत बांधकाम निर्मूलन विभागाचे सहआयुक्त हिम्मत खराडे, लोणावळा नगरपरिषदेचे मुख्याधिकारी अशोक साबळे आणि सार्वजनिक बांधकाम विभागाचे अधीक्षक अभियंता भरतकुमार बाविस्कर यांच्यासह विविध विभागांचे वरिष्ठ अधिकारी व कर्मचारी मोठ्या संख्येने उपस्थित होते.