CJP चे आंदोलन पेटले! जंतर-मंतरवर हजारो तरुणांचा एल्गार; पोलिसांकडून कडक बंदोबस्त

नवी दिल्ली: राजधानी दिल्लीतील ऐतिहासिक जंतर-मंतर मैदानावर पुन्हा एकदा प्रचंड गोंधळ आणि तणावाचे वातावरण निर्माण झाले आहे. कॉकरोच जनता पार्टीच्या (CJP) नेतृत्वाखाली सुरू असलेल्या या आंदोलनाला देशभरातून तरुणांचा अफाट प्रतिसाद मिळत असून हजारो आंदोलकांनी जंतर-मंतरवर ठिय्या मांडला आहे. केंद्रीय शिक्षणमंत्र्यांच्या तात्काळ राजीनाम्याच्या मागणीवर आंदोलक तरुण ठाम असून, अचानक आंदोलक आक्रमक झाल्यामुळे जंतर-मंतर परिसरात मोठ्या प्रमाणात गोंधळाची परिस्थिती निर्माण झाली आहे. वाढता तणाव पाहता सुरक्षेच्या कारणास्तव दिल्ली पोलिसांनी संपूर्ण परिसरात कडेकोट बंदोबस्त तैनात केला आहे.

जंतर-मंतरवर सीजेपीचे संस्थापक अभिजित दीपके यांच्या नेतृत्वाखाली हजारो तरुण गेल्या काही दिवसांपासून सातत्याने निदर्शने करत आहेत. आंदोलनाला पाठिंबा देण्यासाठी आणि विरोधकांचा पाठपुरावा वाढवण्यासाठी लोकसभेचे विरोधी पक्षनेते राहुल गांधी यांनी यापूर्वी पंतप्रधान निवासाबाहेर ठिय्या दिल्यानंतर आता त्यांनी गांधी स्मृती भवनाकडे आपला मोर्चा वळवला आहे. राजकीय हालचाली वेगाने घडत असतानाच दुसरीकडे जंतर-मंतरवरील आंदोलकांनी अचानक आक्रमक पवित्रा घेतला. यामुळे पोलीस आणि आंदोलकांमध्ये बाचाबाची होऊन वातावरण कमालीचे तापले आहे.

परिस्थिती हाताबाहेर जाऊ नये आणि कायदा-सुव्यवस्थेचा प्रश्न निर्माण होऊ नये यासाठी दिल्ली पोलिसांनी जंतर-मंतर परिसराला छावणीचे रूप दिले आहे. रस्ते बंद करून अतिरिक्त पोलीस फौजफाटा आणि दंगल नियंत्रण पथके (RFP) घटनास्थळी तैनात करण्यात आली आहेत. शिक्षणमंत्र्यांचा राजीनामा घेतल्याशिवाय आणि मागण्या मान्य झाल्याशिवाय एक पाऊलही मागे हटणार नाही, असा इशारा आंदोलकांनी दिला आहे. या आंदोलनामुळे दिल्लीतील राजकीय तापमान भयंकर तापले असून प्रशासनावर मोठा दबाव निर्माण झाला आहे.