संसदेबाहेर प्रियंका गांधींचा पत्रकारांवर भडका! "आम्हाला सोडून आधी सरकारला प्रश्न विचारा"

नवी दिल्ली: संसदेच्या पावसाळी अधिवेशनात दिल्लीतील तीव्र विद्यार्थी आंदोलनाचे पडसाद उमटत असून, विरोधकांच्या जोरदार गदारोळामुळे संसदेचे कामकाज वारंवार ठप्प होत आहे. आज पुन्हा एकदा कामकाज स्थगित झाल्यानंतर संसदेबाहेर पडलेल्या काँग्रेस खासदार प्रियंका गांधी यांना पत्रकारांनी "संसदेचे कामकाज का चालत नाही?" असा प्रश्न विचारला. या प्रश्नावर प्रियंका गांधी कमालीच्या भडकल्या आणि त्यांनी पत्रकारांनाच धारेवर धरत केंद्र सरकारला धिटाईने प्रश्न विचारण्याचे थेट आव्हान दिले.

पत्रकारांच्या प्रश्नाला उत्तर देताना प्रियंका गांधी यांनी संतप्त प्रतिक्रिया व्यक्त केली. "तुम्ही दरवेळी सरकारला हवे असलेलेच प्रश्न विरोधकांना का विचारता? हेच प्रश्न सरकारला विचारण्याची हिम्मत का दाखवत नाही?" असा सवाल त्यांनी उपस्थित केला. देशभरातील हजारो तरुण रस्त्यावर उतरून आपल्या हक्कासाठी एवढे मोठे आंदोलन करत आहेत, तरीही पंतप्रधान एकदाही संसदेत येऊन यावर बोललेले नाहीत. मंत्री बाहेर येऊन उत्तरे देतात, पण पंतप्रधान मौन बाळगून आहेत; अशा वेळी संसदेचे कामकाज का चालत नाही असा प्रश्न आम्हाला विचारण्याऐवजी सरकारला विचारला पाहिजे, अशा शब्दांत त्यांनी आपला रोष व्यक्त केला.

आपला आक्रमक पवित्रा कायम ठेवत प्रियंका गांधी पुढे म्हणाल्या की, पत्रकारांनी शिक्षणमंत्री धर्मेंद्र प्रधान यांना राजीनाम्याबाबत आणि गृहमंत्री अमित शाह यांना विद्यार्थ्यांवर झालेल्या लाठीचाराबाबत जाब विचारला पाहिजे. आंदोलनकर्त्या विद्यार्थ्यांवर राष्ट्रीय सुरक्षा कायदा (NSA) का लावला? ते काय दहशतवादी आहेत का? तसेच इंटरनेट सेवा बंद करून विद्यार्थ्यांचा त्यांच्या पालकांशी असलेला संपर्क का तोडला गेला? रुग्णालयात दाखल झालेल्या निष्पाप विद्यार्थ्यांच्या प्रश्नांवर जेव्हा तुम्ही सरकारला प्रश्न विचारण्यास सुरुवात कराल, तेव्हाच मी तुमच्या प्रश्नांची उत्तरे देईन, असा सणसणीत टोला त्यांनी माध्यमांना लगावला. या घडामोडींमुळे संसदेच्या आवारातील राजकीय वातावरण अधिकच तापले असून आगामी काळात काँग्रेस या मुद्द्यावरून सरकारला अधिकच घेरण्याची शक्यता आहे.