विद्यार्थिनीच्या सतर्कतेने टळला अनर्थ! वाघोलीत मोठी दुर्घटना टळली

वाघोली: पुण्यातील वाघोली परिसरात असलेल्या जी एच रायसोनी अभियांत्रिकी महाविद्यालयाच्या मुलींच्या वसतिगृहात मंगळवारी मध्यरात्री गॅस गळतीची एक अत्यंत थरारक आणि गंभीर घटना घडली. वसतिगृहाच्या कॅन्टीनमध्ये अचानक झालेल्या या गॅस गळतीमुळे परिसरात काही काळ तीव्र घबराट आणि गोंधळाचे वातावरण निर्माण झाले होते. मात्र, एका विद्यार्थिनीच्या सतर्कतेमुळे वेळीच मोठा अनर्थ टळला असून, या घटनेत कोणतीही जीवितहानी किंवा आग लागण्याची दुर्घटना घडलेली नाही.

मिळालेल्या माहितीनुसार, मंगळवारी मध्यरात्रीच्या सुमारास कॅन्टीनमधील गॅस सिलेंडरमधून अचानक गॅसची गळती सुरू झाली. याच दरम्यान पाणी पिण्यासाठी वसतिगृहाच्या रुमबाहेर आलेल्या एका विद्यार्थिनीला गॅसचा तीव्र वास आला आणि तिच्या ही गंभीर बाब लक्षात आली. तिने क्षणाचाही विलंब न लावता तत्काळ आरडाओरडा करत इतरांना सावध केले. मुलींचा आवाज ऐकून वसतिगृहातील सुरक्षारक्षक आणि कर्मचारी तातडीने घटनास्थळी धावले.

प्रसंगावधान राखत वसतिगृहातील सर्व विद्यार्थिनींना सुरक्षेचा उपाय म्हणून तातडीने इमारतीबाहेर सुरक्षितस्थळी हलवण्यात आले. त्यानंतर कर्मचाऱ्यांनी कॅन्टीनमध्ये जाऊन गॅस गळती रोखण्याचे प्रयत्न सुरू केले आणि परिस्थिती नियंत्रणात आणली. सुदैवाने गॅसचा संपर्क कोणत्याही आगीच्या किंवा विजेच्या ठिणगीशी आला नाही, ज्यामुळे एक मोठी दुर्घटना टळली. या घटनेनंतर वसतिगृहातील सुरक्षेच्या आणि कॅन्टीनमधील गॅस व्यवस्थेच्या तपासणीबाबत गांभीर्याने विचार केला जात आहे.