पुणे/सातारा: ऑक्सफर्ड युनिव्हर्सिटी प्रेस इंडियाने छत्रपती शिवाजी महाराजांबद्दल ऐतिहासिक तथ्यांची पडताळणी न करता आक्षेपार्ह विधाने प्रसिद्ध केल्याबद्दल अखेर छत्रपतींचे वंशज आणि खासदार श्रीमंत छत्रपती उदयनराजे भोसले तसेच समस्त शिवप्रेमींची बिनशर्त माफी मागितली आहे. नेमके प्रकरण काय? २००३ मध्ये ऑक्सफर्ड युनिव्हर्सिटी प्रेसने "शिवाजी: हिंदू किंग इन इस्लामिक इंडिया" (Shivaji: Hindu King in Islamic India) हे पुस्तक प्रकाशित केले होते. या पुस्तकातील पृष्ठ क्रमांक ३१, ३३, ३४ आणि ९३ वर छत्रपती शिवाजी महाराजांच्या संदर्भात काही विधाने करण्यात आली होती. ही विधाने ऐतिहासिक दृष्टिकोनातून चुकीची आणि कोणत्याही प्रकारची पडताळणी न करता छापण्यात आली होती. ऑक्सफर्डने काय म्हटले? पुस्तकातील मजकुरामुळे श्रीमंत छत्रपती उदयनराजे भोसले आणि शिवप्रेमींच्या भावना दुखावल्या गेल्याची दखल घेत ऑक्सफर्डने आपली चूक मान्य केली आहे. प्रसिद्ध केलेल्या निवेदनात त्यांनी म्हटले आहे की: पुस्तकातील संबंधित विधाने ही पूर्वपडताळणी न करता प्रसिद्ध झाली होती, ज्याबद्दल आम्हाला खंत (Regret) वाटत आहे. यामुळे उदयनराजे भोसले आणि जनतेला जो मानसिक त्रास झाला, त्याबद्दल आम्ही क्षमस्व आहोत. व्यवस्थापकीय संचालकांकडून माफीनामा ऑक्सफर्ड युनिव्हर्सिटी प्रेस इंडियाचे माजी व्यवस्थापकीय संचालक यांच्या वतीने सईद मंझर खान यांनी ही जाहीर माफी मागितली आहे. छत्रपती शिवाजी महाराजांचा चुकीचा इतिहास मांडणाऱ्या संस्थांना हा एक मोठा दणका मानला जात असून, उदयनराजे भोसले यांनी यासंदर्भात घेतलेल्या भूमिकेचे सर्वत्र स्वागत होत आहे. शिवरायांच्या दैदीप्यमान इतिहासाची मोडतोड करणाऱ्या जागतिक स्तरावरील प्रकाशन संस्थेला माफी मागायला लावणे, हा सत्याचा आणि शिवप्रेमींच्या अस्मितेचा विजय मानला जात आहे.
