ज्योती वाघमारे यांची महिला-बालविकास मंत्रालयाच्या समितीवर नियुक्ती

मुंबई: शिवसेनेच्या ज्येष्ठ आणि निष्ठेवान कार्यकर्त्या ज्योती वाघमारे यांच्या सामाजिक व राजकीय कार्याची दखल घेत केंद्र सरकारने त्यांना एक महत्त्वाची राष्ट्रीय जबाबदारी सोपवली आहे. केंद्र सरकारच्या महिला आणि बालविकास मंत्रालयाच्या सल्लागार समितीवर सदस्य म्हणून त्यांची अधिकृत नियुक्ती करण्यात आली आहे. १७ ऑगस्ट रोजी संसदीय कार्य मंत्रालया मार्फत काढण्यात आलेल्या अधिकृत अधिसूचनेद्वारे ही घोषणा करण्यात आली असून, यामुळे राष्ट्रीय स्तरावर महिला व बालकांच्या सक्षमीकरणासाठी काम करण्याची त्यांना एक महत्त्वाची संधी मिळाली आहे.

     या विशेष नियुक्तीनंतर ज्योती वाघमारे यांनी महाराष्ट्राचे उपमुख्यमंत्री एकनाथ शिंदे यांच्या प्रमुख उपस्थितीत आपले अधिकृत नियुक्तीपत्र स्वीकारले. महिला व बालकांच्या सर्वांगीण विकासासाठी आणि त्यांच्या हिताच्या रक्षणासाठी सतत कार्यरत असलेल्या या महत्त्वाच्या सल्लागार समितीमध्ये त्यांची भूमिका अत्यंत महत्त्वाची ठरणार आहे. या समितीच्या माध्यमातून महिला आणि बालकांशी संबंधित विविध शासकीय धोरणे, कायदे आणि कल्याणकारी कार्यक्रमांवर सखोल विचारविनिमय करून त्यांना योग्य दिशा देण्याचे महत्त्वपूर्ण काम केले जाते.

     राष्ट्रीय पातळीवरील या संवेदनशील आणि महत्त्वपूर्ण व्यासपीठावर ज्योती  वाघमारे यांना काम करण्याची संधी मिळाल्यामुळे त्यांच्या दीर्घकालीन अनुभवाचा आणि सामाजिक कार्याचा मोठा लाभ होईल, असा विश्वास व्यक्त केला जात आहे. त्यांच्या या निवडितून महिलांच्या हक्कांसाठी, सुरक्षेसाठी आणि त्यांच्या सर्वांगीण सक्षमीकरणासाठी सुरू असलेल्या प्रयत्नांना अधिक बळ मिळेल, अशी अपेक्षा संपूर्ण शिवसेनेसह राजकीय वर्तुळातून व्यक्त होत असून त्यांच्यावर अभिनंदनाचा वर्षाव होत आहे.