शाळांतील त्रुटींवर अभिजीत दीपके यांच्या सूचनांना शिक्षणमंत्र्यांचा प्रतिसाद

मुंबई: राज्यातील शाळांमधील शैक्षणिक दर्जा, व्यवस्थापन आणि विविध त्रुटींवर सातत्याने बोट ठेवणारे आणि सुधारणांसाठी आक्रमक भूमिका घेणारे अभिजीत दीपके यांनी मांडलेल्या निरीक्षणांची शालेय शिक्षण विभागाने गंभीर दखल घेतली आहे. शालेय शिक्षण मंत्री दादा भुसे यांनी नुकतेच अभिजीत दीपके यांनी शाळांसंदर्भात केलेल्या सर्व सूचनांचे आणि निरीक्षणांचे खुलेआम स्वागत केले असून, शाळांमधील कारभार अधिक सुधारण्यासाठी आवश्यक त्या उपाय योजना लवकरात लवकर अमलात आणल्या जातील, असे स्पष्ट संकेत दिले आहेत.

       राज्यातील काही शाळांमध्ये आजही प्रशासकीय व शैक्षणिक पातळीवर अनेक प्रकारच्या त्रुटी आणि अव्यवस्था असल्याचा मुद्दा अभिजीत दीपके यांनी सातत्याने समोर आणला होता. या सर्व बाबींवर प्रतिक्रिया देताना शिक्षणमंत्री दादा भुसे यांनी स्पष्ट केले की, दीपके ज्या पद्धतीने शाळांमधील त्रुटी व अव्यवस्था प्रशासनाच्या निदर्शनास आणून देत आहेत, त्या सर्व गोष्टींना सरकार अतिशय सकारात्मकतेने घेत आहे. विद्यार्थ्यांच्या हितासाठी आणि शाळांमधील शिक्षण प्रणाली अधिक पारदर्शक व सक्षम करण्यासाठी अशा प्रकारच्या रचनात्मक सूचना अत्यंत मोलाच्या ठरतात, असे मत त्यांनी यावेळी व्यक्त केले.

      राज्यातील प्रत्येक विद्यार्थ्याच्या उज्ज्वल भविष्यासाठी आणि त्यांना सर्वोत्कृष्ट तसेच गुणवत्तापूर्ण शिक्षण मिळवून देण्यासाठी राज्य सरकार आणि शालेय शिक्षण विभाग पूर्णपणे कटिबद्ध असल्याचे मंत्री भुसे यांनी नमूद केले. अभिजीत दीपके यांनी केलेल्या महत्त्वपूर्ण सूचनांची सखोल छाननी करून त्यांची तातडीने अंमलबजावणी कशी करता येईल, या दिशेने सध्या शिक्षण विभागांतर्गत युद्ध पातळीवर काम सुरू आहे. शाळांमधील गैरसोयी दूर करून शैक्षणिक गुणवत्तेत वाढ करण्यासाठी शासनाकडून सातत्याने योग्य ती पावले उचलली जात असून, शिक्षणमंत्र्यांच्या या भूमिकेमुळे राज्यातील शिक्षण क्षेत्रातील सुधारणांना अधिक मोठे बळ मिळेल, असा विश्वास व्यक्त केला जात आहे.