पुणे: पुणे शहरातून एक अतिशय गंभीर आणि खळबजनक घटना समोर आली असून, केंद्रीय राज्यमंत्री मुरलीधर मोहोळ यांच्या अधिकृत सुरक्षा ताफ्यात (कॉन्व्हाय) दारूच्या नशेत भरधाव कार घुसवत थेट मंत्र्यांच्या वाहनाला कट मारल्याचा प्रकार घडला आहे. या अत्यंत गंभीर सुरक्षा उल्लंघनाची आणि मद्यधुंद चालकाच्या मुजोरीची पुणे पोलिसांनी तातडीने दखल घेतली असून, शिवाजीनगर पोलीस ठाण्यात आरोपी वाहनचालका विरुद्ध विविध कलमांखाली गुन्हा दाखल करण्यात आला आहे. व्हीआयपी सुरक्षेच्या दृष्टीने संवेदनशील असणाऱ्या या प्रकारामुळे राजकीय आणि प्रशासकीय वर्तुळात मोठी चर्चा रंगली आहे.
पोलिसांनी दिलेल्या सविस्तर माहिती नुसार, हा थरारक प्रकार १३ सप्टेंबर २०२६ रोजी रात्री साडेआठ वाजण्याच्या सुमारास शिवाजीनगर येथील वर्दळीच्या संचेती चौक परिसरात घडला. केंद्रीय राज्यमंत्री मुरलीधर मोहोळ यांचा अधिकृत कॉन्व्हाय विमानतळावरून शिवाजीनगर मार्गे त्यांच्या कोथरूड येथील निवासस्थानाकडे निघाला होता. या दरम्यान, कॅम्प परिसरातील एका दुकानात काम करणारा शुभम विजय वनीत (वय ३२, रा. नाना पेठ, पुणे) याने प्रचंड मद्यप्राशन करून आपली कार अत्यंत भरधाव व वेडीवाकडी चालवण्यास सुरुवात केली. सुरक्षेसाठी तैनात असलेल्या पोलिसांच्या स्पष्ट इशांकडे आणि सूचनांकडे जाणीवपूर्वक दुर्लक्ष करत हा मद्यधुंद चालक थेट मंत्र्यांच्या सुरक्षित ताफ्यात शिरला. संचेती चौकात पुढे जाण्याच्या घाईत त्याने बेफिकीरपणे वाहन चालवून थेट केंद्रीय मंत्री मुरलीधर मोहोळ यांच्या वाहनाला धोकादायक रीतीने कट मारला आणि पुढे निघून जाण्याचा प्रयत्न केला.
मंत्र्यांच्या सुरक्षेचा प्रश्न ऐरणीवर आल्यामुळे ताफ्यातील सुरक्षा यंत्रणेने व पोलिसांनी तात्काळ अत्यंत सतर्कता दाखवत या बेछूट चालकाला जागीच रोखले आणि त्याला ताब्यात घेतले. त्यानंतर त्याला तातडीने शिवाजीनगर पोलिसांच्या हवाली करण्यात आले. याप्रकरणी केंद्रीय मंत्री मुरलीधर मोहोळ यांचे अंगरक्षक म्हणून कर्तव्यावर असलेले सहायक पोलीस फौजदार ईश्वर लक्ष्मण भिकुले (वय ५०, रा. कोथरूड) यांनी शिवाजीनगर पोलीस ठाण्यात अधिकृत फिर्याद दिली आहे.
या तक्रारीच्या आधारे पोलिसांनी आरोपी शुभम विजय वनीत याच्या विरोधात भारतीय न्याय संहितेच्या (BNS) कलम २८१ तसेच मोटर वाहन कायदा (MV Act) कलम १८४, १८५ आणि ११९/१७७ नुसार गुन्हा नोंदवला आहे. तसेच पोलीस प्रक्रियेचा भाग म्हणून त्याला भारतीय नागरी सुरक्षा संहितेच्या (BNSS) कलम ३५(३) नुसार नोटीस बजावण्यात आली आहे. या संपूर्ण प्रकरणाचा पुढील तपास पोलीस उपनिरीक्षक विकास काटे करत असून, व्हीआयपी सुरक्षेच्या नियमांना हरताळ फासणाऱ्या अशा समाजकंटकांवर कठोर कारवाई केली जाईल, असा संदेश या घटनेमुळे दिला गेला आहे.
2.jpg)
.webp)
