पुणे: काश्मीर खोऱ्यात सार्वजनिक गणेशोत्सव साजरा करणाऱ्या कार्यकर्त्यांना यंदा अतिरेकी संघटनांकडून जीवे मारण्याची थेट धमकी देण्यात आली असली, तरी या भ्याड धमक्यांना न जुमानता काश्मीर मधील गणेश मंडळांच्या कार्यकर्त्यांनी यंदाही अत्यंत उत्साहात आणि दणक्यात गणेशोत्सव साजरा करण्याचा अटल निर्धार केला आहे. या अभूतपूर्व साहसाला आणि राष्ट्रभक्तीला बळ देण्यासाठी पुण्यातील मानाच्या गणपतींच्या मूर्ती काश्मीर मधील कार्यकर्त्यांकडे विधिवत पूजा करून सुपूर्द करण्यात आल्या आहेत. युवा उद्योजक पुनीत बालन यांच्यासह पुण्यातील मानाच्या गणेश मंडळांच्या वतीने सलग पाचव्या वर्षी हा प्रेरणादायी उपक्रम राबविण्यात आला असून, यामुळे काश्मीरमधील गणेशोत्सवाचा मार्ग अधिक सुकर झाला आहे.
तब्बल ३४ वर्षे काळोखात गेलेल्या आणि बंद असलेल्या काश्मीर मधील ऐतिहासिक लाल चौकात २०२२ पासून सार्वजनिक गणेशोत्सवाला पुन्हा एकदा मोठ्या दिमाखात सुरुवात झाली. त्यानंतर गेल्या तीन वर्षांत काश्मीर खोऱ्यातील विविध भागांत अत्यंत उत्साही वातावरणात बाप्पाचे आगमन होत आहे. यंदा या उत्सवाचा विस्तार करत काश्मीरच्या चार ते पाच जिल्ह्यांमध्ये सार्वजनिक गणेशोत्सव साजरा करण्याचे भव्य नियोजन करण्यात आले आहे. मात्र, या सांस्कृतिक व धार्मिक प्रवाहावर विघ्न आणण्यासाठी काही अतिरेकी संघटनांनी गणेशोत्सव साजरा करणाऱ्या कार्यकर्त्यांना थेट जीवे मारण्याची धमकी दिली आहे. परंतु, या धमक्यांना थारा न देता काश्मीरमधील तरुणांनी आणि कार्यकर्त्यांनी आपली संस्कृती जपण्याचा निर्धार कायम ठेवला आहे.
या पार्श्वभूमीवर, पुण्यातील मानाचा पहिला श्री कसबा गणपती, मानाचा दुसरा श्री तांबडी जोगेश्वरी आणि मानाचा तिसरा गणपती गुरुजी तालीम या प्रतिष्ठित मानाच्या गणपतींच्या मूर्ती विधिवत पूजा व मंत्रोच्चारात काश्मीरमधील गणेश मंडळांच्या कार्यकर्त्यांकडे सुपूर्द करण्यात आल्या. या पवित्र मूर्ती स्वीकारण्यासाठी काश्मीर मधून मोहित भान, रिषभ चाकू, शिशंत चाकू, संदीप रैना, संजीव रैना, हितेश रैना आणि संदीप कौल हे प्रमुख पदाधिकारी पुण्यात आवर्जून उपस्थित होते. श्रीमंत भाऊसाहेब रंगारी गणपती ट्रस्टचे उत्सवप्रमुख व विश्वस्त पुनीत बालन, अलंकार पोलिस ठाण्याचे वरिष्ठ पोलिस निरीक्षक उल्हास कदम, गुरुजी तालीम मंडळाचे प्रविण परदेशी, तुळशीबाग मंडळाचे अध्यक्ष विकास पवार, तांबडी जोगेश्वरी मंडळाचे प्रशांत टिकार आणि अखिल मंडई मंडळाचे सूरज थोरात यांच्या प्रमुख उपस्थितीत हा सोहळा पार पडला.
यावेळी बोलताना श्रीमंत भाऊसाहेब रंगारी गणपती ट्रस्टचे उत्सव प्रमुख पुनीत बालन यांनी काश्मीर मधील कार्यकर्त्यांच्या अफाट साहसाचे भरभरून कौतुक केले. काश्मीरमधील चार ते पाच जिल्ह्यांमध्ये यंदा सार्वजनिक गणेशोत्सव साजरा करण्याचे नियोजन करण्यात आले होते, मात्र अतिरेकी संघटनांनी कार्यकर्त्यांना जीवे मारण्याच्या धमक्या दिल्या. परंतु, या कोणत्याही धमक्यांना न जुमानता आणि स्वतःच्या जीवाची पर्वा न करता गणेशोत्सव साजरा करण्याचा कार्यकर्त्यांचा हा अटळ उत्साह नक्कीच वाखाणण्यासारखा असून, त्यांच्या या अफाट धाडसाला आपण सलाम केला पाहिजे, असे पुनीत बालन यांनी स्पष्ट केले. या संपूर्ण उपक्रमामुळे देशभरात एक भक्कम संदेश गेला असून, यंदाचा काश्मीरमधील गणेशोत्सव संपूर्ण देशवासीयांसाठी एक अभिमानास्पद पर्व ठरणार आहे.
