दहिवडीत रहस्यमय मृत्यू; सिमेंट पाईपमध्ये आढळला ५० वर्षीय पुरुषाचा मृतदेह

दहिवडी: सातारा जिल्ह्यातील दहिवडी ते गोंदवले रस्त्यावर असलेल्या नाथाच्या तालीजवळील पुलाखाली एका सिमेंटच्या पाईपमध्ये अंदाजे ५० ते ६० वयोगटातील एका अज्ञात पुरुषाचा मृतदेह आढळल्याने परिसरात मोठी खळबळ उडाली आहे. रविवारी (दि. ६ सप्टेंबर) सकाळी ११ वाजण्याच्या सुमारास हा प्रकार उघडकीस आला असून, या प्रकरणी दहिवडी पोलीस ठाण्यात अकस्मात मृत्यूची नोंद करण्यात आली आहे. या घटनेमुळे परिसरात विविध चर्चांना उधाण आले असून, मृत व्यक्तीची नेमकी ओळख पटविण्याचे मोठे आव्हान आता पोलिसांसमोर उभे ठाकले आहे.

       मिळालेल्या अधिकृत माहितीनुसार, नगरपंचायत दहिवडी येथील मुकादम जयसिंग शंकर अवघडे (वय ५५) यांनी या घटनेची खबर तातडीने पोलीस ठाण्यात दिली. माहिती मिळताच दहिवडी पोलीस ठाण्याचे पथक त्वरित घटनास्थळी दाखल झाले. पोलिसांनी घटनास्थळाचा पंचनामा करून मृतदेह शवविच्छेदनासाठी पाठवण्याची व्यवस्था केली. संबंधित व्यक्तीचा मृत्यू नेमक्या कोणत्या कारणाने झाला, हे अद्याप स्पष्ट झालेले नाही असून शवविच्छेदन अहवाल आल्यानंतरच मृत्यूचे नेमके कारण समोर येईल, असे पोलिसांकडून स्पष्ट करण्यात आले आहे.

       मृत व्यक्ती पुरुष जातीची असून त्याचे वय अंदाजे ५० ते ६० वर्षे इतके आहे. मृतदेहाची कोणतीही ओळख पटू शकलेली नाही आणि मृत व्यक्तीचे नाव व पत्ता अद्याप अस्पष्ट आहे. या मृतदेहाची ओळख पटविण्यासाठी पोलीस प्रशासना कडून युद्धपातळीवर प्रयत्न सुरू आहेत. सदर प्रकरणाची नोंद सहायक पोलीस फौजदार पी. जी. हांगे यांनी केली असून, पोलीस हवालदार खांडेकर या प्रकरणाचा पुढील अधिक तपास करत आहेत. या मृतदेहा बाबत किंवा त्याच्या वारसांबाबत कोणालाही काहीही माहिती असल्यास त्यांनी तात्काळ दहिवडी पोलीस ठाणेशी अथवा तपासी अंमलदार पोलीस हवालदार खांडेकर (८४०८०१७८३८) आणि दाखल अंमलदार ए.एस.आय. हांगे (९८५००४९७००) यांच्याशी संपर्क साधून सहकार्य करावे, असे आवाहन पोलीस प्रशासनाकडून करण्यात आले आहे.