बुलढाणा: स्टोअर्स आणि राजकीय वर्तुळात नेहमीच चर्चेत राहणाऱ्या बुलढाणा जिल्ह्यामध्ये भाजप आणि शिवसेना (शिंदेसेना) यांच्यातील अंतर्गत वाद आता पराकोटीला पोहोचला आहे. भाजपच्या महिला आमदार श्वेता महाले आणि शिंदेसेनेचे आक्रमक आमदार संजय गायकवाड यांच्यातील विधानांचे युद्ध आता वैयक्तिक टीकेवर आले असून, एका गाण्यावरून सुरू झालेला हा वाद आता थेट धमकी आणि कायदा-सुव्यवस्थेच्या मुद्द्यावर येऊन ठेपला आहे. "बाप तो बाप रहेगा" या गाण्यावर श्वेता महाले यांनी केलेल्या नृत्याचा व्हिडिओ आणि त्यानंतर संजय गायकवाड यांनी दिलेली अत्यंत वादग्रस्त प्रतिक्रिया यामुळे संपूर्ण राजकीय वर्तुळात खळबळ उडाली आहे. या वादानंतर आमदार श्वेता महाले यांनी थेट बुलढाण्याची तुलना 'बिहार'शी करत स्थानिक राजकारणात हुकूमशाही चालणार नाही, असा इशारा दिला आहे.
या संपूर्ण वादाची सुरुवात एका जाहीर कार्यक्रमातील नृत्यापासून झाली. आमदार श्वेता महाले एका कार्यक्रमादरम्यान "बाप तो बाप रहेगा" या गाण्यावर थिरकल्या होत्या. हा व्हिडिओ आणि त्यामागील राजकीय संदेश विरोधकांसह सत्ताधारी गोटातही चर्चेचा विषय ठरला. जेव्हा यावर प्रसार माध्यमांनी शिंदेसेनेचे आमदार संजय गायकवाड यांच्याकडे प्रतिक्रिया विचारली, तेव्हा त्यांनी अत्यंत वादग्रस्त शब्दांत प्रत्युत्तर दिले. माणसाने "बाप तो बाप रहेगा" असे म्हणणे शोभून दिसते, परंतु एखाद्या महिलेने बापाबद्दल किंवा अशा प्रकारे वक्तव्य केल्यावर बापासारखे शरीर किंवा ताकद कुठून आणणार, असा उपरोधिक आणि आक्षेपार्ह सवाल त्यांनी केला होता. गायकवाड यांच्या या विधानामुळे महायुती मधील अंतर्गत सुसंवाद पूर्णपणे बिघडल्याचे दिसून आले, तर दुसरीकडे आमदार श्वेता महाले यांनी या टीकेला अत्यंत आक्रमक शब्दांत प्रत्युत्तर देत पलटवार केला आहे.
या वादावर बोलताना आमदार श्वेता महाले यांनी बुलढाणा जिल्ह्याच्या सद्यस्थितीवर तीव्र चिंता व्यक्त केली आहे. बुलढाण्याची अवस्था आज 'बिहार'सारखी झाली असून, आपल्याला हा शांत बुलढाणा पुन्हा पूर्ववत आणायचा आहे, असा निर्धार त्यांनी व्यक्त केला. मतदार संघात कुठल्याही प्रकारची गुंडगिरी, दडपशाही किंवा हुकूमशाही अजिबात खपवून घेतली जाणार नाही, असा सज्जड दम त्यांनी भरला. एवढेच नव्हे, तर स्थानिक पातळीवर एका सत्कार कार्यक्रमाचे आयोजक असलेल्या विजुभाऊ यांच्या पत्नीलाही उचलेगिरी करण्याची आणि गायब करण्याची थेट भाषा वापरली गेल्याचा अत्यंत गंभीर आरोप त्यांनी केला. या धडक आरोपामुळे स्थानिक पातळीवरील गुन्हेगारी आणि राजकीय दबावाचे राजकारण चव्हाट्यावर आले आहे.
दुसरीकडे, या राजकीय संघर्षाच्या पार्श्वभूमीवर काँग्रेस मधून भाजपमध्ये प्रवेश करण्याच्या चर्चा आणि त्यामागील राजकीय हालचालींमुळेही जिल्ह्यात उलटसुलट चर्चा सुरू आहेत. काँग्रेस नेते राहुल बोंद्रे यांच्या भाजप प्रवेशाची चर्चा ऐन मोक्यावर थांबली आणि थेट हायकमांड पातळीवरून आलेल्या फोननंतर राजकीय समीकरणे बदलली, ज्याचा अप्रत्यक्ष फटका भाजपला बसल्याची चर्चा आहे. अशातच महायुतीमधील दोन प्रमुख पक्षांचे आमदार एकमेकांसमोर उभे ठाकल्यामुळे युतीच्या वरिष्ठ नेत्यांसमोर मोठा पेच निर्माण झाला आहे. स्थानिक स्तरावरील हा वाढता कलह आगामी निवडणुकीच्या तोंडावर महायुतीसाठी डोकेदुखी ठरण्याची शक्यता वर्तवली जात असून, यावर पक्षश्रेष्ठी काय भूमिक घेतात, याकडे सर्वांचे लक्ष लागले आहे.
2.jpg)
3.jpg)
