MPSC परीक्षा पुढे ढकलल्या! ३ ऑक्टोबर पासूनच्या राज्यसेवा मुख्य परीक्षेसह महत्त्वाच्या परीक्षांवर मोठा निर्णय

मुंबई: महाराष्ट्र लोकसेवा आयोगाच्या (MPSC) वतीने स्पर्धा परीक्षांची तयारी करणाऱ्या लाखो तरुण-तरुणींसाठी एक अत्यंत महत्त्वाची आणि मोठी बातमी समोर आली आहे. आगामी ३ ऑक्टोबर २०२६ पासून आयोजित करण्यात आलेल्या विविध महत्त्वाच्या मुख्य परीक्षा अनिश्चित काळासाठी पुढे ढकलण्याचा महत्त्वपूर्ण निर्णय आयोगाने घेतला आहे. राज्य सेवा मुख्य परीक्षा २०२५ च्या उत्तरपत्रिकांचे पुनर्मूल्यांकन करण्याचा निर्णय घेण्यात आल्यामुळे आणि परीक्षा पद्धतीत आवश्यक त्या सुधारणा सुचवण्यासाठी राज्य शासनाने नेमलेल्या उच्चस्तरीय समितीच्या शिफारसी लवकरच अपेक्षित असल्यामुळे हा मोठा बदल करण्यात आला आहे. स्पर्धा परीक्षांच्या वर्तुळात गेल्या काही दिवसांपासून सातत्याने सुरू असलेल्या चर्चा, विद्यार्थी संघटनांचे आक्रमक पवित्रे आणि वाढत्या मागण्यांच्या पार्श्वभूमीवर आयोगाचे हे पाऊल अत्यंत महत्त्वपूर्ण मानले जात आहे.

          मागील काही काळापासून स्पर्धा परीक्षा मधील पारदर्शकता, उत्तरपत्रिकांचे मूल्यांकन आणि एकूणच कार्यपद्धतीवरून विद्यार्थी संघटना आणि विविध राजकीय पक्षांकडून तीव्र आक्षेप घेतला जात होता. विशेषतः, राज्य सेवा मुख्य परीक्षा २०२५ मधील गुणांकन आणि मूल्यांकना बाबत अनेक विद्यार्थ्यांनी व संघटनांनी आयोगाकडे अधिकृतपणे आक्षेप नोंदवून फेरतपासणीची मागणी केली होती. विद्यार्थ्यांच्या या वाढत्या असंतोषाची आणि परीक्षा प्रणालीतील सुधारणांच्या मागण्यांची गंभीर दखल घेत आयोगाने अखेर राज्य सेवा मुख्य परीक्षा २०२५ च्या उत्तरपत्रिकांचे सविस्तर पुनर्मूल्यांकन करण्याचा निर्णय घेतला आहे. याच पार्श्वभूमीवर, विद्यार्थ्यांच्या हिताचा आणि सर्वंकष विचाराचा हवाला देत येत्या ३ ऑक्टोबर २०२६ पासून सुरू होणार या ‘राज्य सेवा मुख्य परीक्षा-२०२६’, ‘महाराष्ट्र स्थापत्य अभियांत्रिकी मुख्य परीक्षा-२०२६’ तसेच ‘महाराष्ट्र गट-ब (अराजपत्रित) मुख्य परीक्षा-२०२६’ या सर्व प्रमुख परीक्षा तात्काळ लांबणीवर टाकण्यात आल्या आहेत.

          परीक्षा अचानक पुढे ढकलण्यात आल्यामुळे राज्यभरातून अभ्यास करणाऱ्या हजारो परीक्षार्थींच्या नियोजनावर आणि मानसिक तयारीवर तात्पुरता परिणाम झाला असला, तरी या निर्णयामुळे मूल्यमापनातील पारदर्शकतेला मोठा वाव मिळेल, अशी अपेक्षा व्यक्त होत आहे. आयोगाने स्पष्ट केले आहे की, सद्यस्थितीत या परीक्षा पुढे ढकलण्यात आल्या असल्या तरी नवीन व सुधारित परीक्षांच्या तारखा अद्याप घोषित करण्यात आलेल्या नाहीत. प्रशासकीय प्रक्रिया, उत्तरपत्रिकांचे पुनर्मूल्यांकन आणि उच्चस्तरीय समितीच्या शिफारसी अंतिम झाल्यानंतर या सर्व परीक्षांच्या नवीन व कालबद्ध तारखा स्वतंत्रपणे आणि लवकरच जाहीर केल्या जातील, असे आयोगाकडून स्पष्ट करण्यात आले आहे. या निर्णयामुळे आता आगामी काळातील परीक्षांचे वेळापत्रक कसे असणार आणि सुधारित तारखा कधी जाहीर होणार, याकडे संपूर्ण राज्यातील स्पर्धा परीक्षांच्या विद्यार्थ्यांचे लक्ष लागले आहे.